ມາຮອດປະຈຸບັນ ວັກຊິນທີ ສປປ ລາວ ນໍາໃຊ້ມີ 4 ຊະນິດຄື: ຊິໂນຟາມ, ແອສຕາເຊເນກາ, ໄຟເຊີ ແລະ ສະປຸກນິກ ໃນນັ້ນໄດ້ສັກເຂັມທີ 1 ໃຫ້ປະຊາຊົນໄປແລ້ວ ຈໍານວນ 953.782 ຄົນ, ແລະ ສັກເຂັມທີ 2 ແລ້ວ 494.477 ຄົນ.
ອີງຕາມການຖະແຫຼງຂ່າວ ຂອງ ດຣ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ໃນຕອນເຊົ້າວັນທີ 23 ມິຖຸນາ 2021 ທີ່ກະຊວງສາທາລະນະສຸກ ໃຫ້ຮູ້ວ່າ: ລັດຖະບານລາວ ມີຄວາມມຸ່ງໝັ້ນ ຈະສູ້ຊົນເຮັດໃຫ້ອັດຕາການສັກວັກຊິນປ້ອງກັນ ພະຍາດໂຄວິດ-19 ໃຫ້ກວມໄດ້ 50%ຂອງປະຊາກອນ ສະນັ້ນ, ຈະຕ້ອງສັກໃຫ້ໄດ້ 3.700.000 ຄົນ, ເບື້ອງລັດຖະບານໄດ້ປະສານກັບອົງການສາກົນ ໃນການຈັດສັນວັກຊິນ, ເພື່ອສັກໃຫ້ປະຊາຊົນທຸກພາກສ່ວນ ໃນສັງຄົມໃຫ້ສາມາດບັນລຸຕາມຄາດໝາຍ ຫຼືຫຼາຍກວ່ານັ້ນ, ເຊິ່ງປະຈຸບັນ ສປປ ລາວ ມີໂຄຕ້າ ທີ່ຈະໄດ້ຮັບວັກຊິນທັງໝົດ 6.606.084 ຫຼອດ ແຕ່ຍ້ອນການຈັດສັນວັກຊິນນັ້ນ ອາດຈະບໍ່ຕອບສະໜອງໄດ້ຕາມຄວາມຕ້ອງການ ຂອງປະເທດເຮົາ, ເຖິງຢ່າງໃດກໍຕາມ ພັກ ແລະ ລັດຖະບານ ສປ ຈີນ ໄດ້ມີຄວາມເປັນຫ່ວງເປັນໃຍ ຕໍ່ປະຊາຊົນລາວ ແລະ ໄດ້ສະໜອງວັກຊິນແກ່ປະເທດເຮົາທັງໝົດເກືອບ 2 ລ້ານຫຼອດ, ເຊິ່ງກວມເອົາ 90% ຂອງວັກຊິນທີ່ມີໃນ ສປປ ລາວ.
ມາຮອດປະຈຸບັນ, ອົງການອະນາໄມໂລກ ໄດ້ຮັບຮອງໃຫ້ວັກຊິນຊິໂນຟາມ ສາມາດໃຊ້ໄດ້ກັບຜູ້ສູງອາຍຸ ແລະ ຜູ້ມີພະຍາດຊໍ້າເຮື້ອແລ້ວ, ສະນັ້ນບໍ່ໃຫ້ພໍ່ແມ່ປະຊົນລັ່ງເລໃຈ, ເມື່ອມີວັກຊິນເຂົ້າມາແລ້ວ ທາງຈຸດບໍລິການ ແຕ່ລະແຫ່ງຈະແຈ້ງໃຫ້ທ່ານຊາບ, ໃຫ້ແພດໝໍເປັນຜູ້ຕັດສິນໃຫ້.
ດຣ ພອນປະເສີດ ອຸນາພົມ ແຈ້ງໃຫ້ຮູ້ຕື່ມວ່າ: ສໍາລັບຢູ່ນະຄອນຫລວງວຽງຈັນ ວັກຊິນຊິໂນຟາມ ແລະ ໄຟເຊີເຂັມທີ 1 ໄດ້ສັກໝົດແລ້ວ, ແຕ່ຍັງສືບຕໍ່ສັກເຂັມທີ 2 ເທົ່ານັ້ນ, ສະນັ້ນຈຶ່ງຮຽກຮ້ອງໃຫ້ຜູ້ມີກໍານົດສັກເຂັມທີ 2 ຈົ່ງເຂົ້າໄປໃຊ້ບໍລິການ ຄືຊີໂນຟາມຄົບ 21 ຫາ 28 ວັນ ແລະ ແອສຕາເຊເນກາ 8 ຫາ 12ອາທິດ.
ຂ່າວດີ! ສໍາລັບເດືອນກໍລະກົດ ຈະມາເຖິງນີ້ ສປປ ລາວ ຈະໄດ້ຮັບວັກຊິນແອສຕາເຊເນກາ ແລະ ຈອນສັນແອນຈອນສັນ ຕື່ມອີກ.
ແຫຼ່ງຂ່າວ: