ໃນວັນທີ 19 ມິຖຸນາ 2021 ທາງເຈົ້າໜ້າທີ່ໄທໄດ້ເຂົ້າຈັບກຸມ ທ້າວ ສອນ ສິລະວັນດີ ອາຍຸ 38 ປີ ສັນຊາດລາວ ແລະ ເດັກນ້ອຍຜູ້ຍິງ ອາຍຸ 13 ປີ ສັນຊາດໄທ ໃນຂໍ້ຫາຮ່ວມກັນກະທໍາຄວາມຜິດໂດຍຮ່ວມກັນທໍາຮ້າຍຮ່າງກາຍຄົນອື່ນຈົນເຖິງແກ່ຄວາມຕາຍ ເຊິ່ງເຂົ້າຈັບກຸມໄດ້ທີ່ ແຂວງບາງຊັນ ເຂດຄອງສາມວາ, ກຸງເທບມະຫານະຄອນ.

ຫຼັງຈາກທີ່ຕໍາຫຼວດໄດ້ເຂົ້າກວດສອບທີ່ເກີດເຫດພົບເຫັນຜູ້ເສຍຊີວິດ 1 ຄົນ ຊື່ວ່າ ທ້າວ ຈີດ ຂຸນສັນເທັຍ ອາຍຸ 49 ປີ ໃນສະພາບນອນຫງາຍ, ໜ້າເອິກມີຮອຍຊໍ້າ ທາງເຈົ້າໜ້າທີ່ຈຶ່ງໄດ້ເກັບລວບລວມຫຼັກຖານຢູ່ບ່ອນເກີດເຫດ ແລະ ນໍາສົບຂອງຜູ້ເສຍຊີວິດໄປຊັນນະສູດເຖິງສາເຫດຂອງການເສຍຊີວິດ.

ເຈົ້າໜ້າທີ່ໄດ້ເຂົ້າສືບສວນກັບເດັກນ້ອຍຜູ້ຍິງຄົນດັ່ງກ່າວໂດຍໃຫ້ເຫດຜົນວ່າ: ຊາຍຜູ້ທີ່ເສຍຊີວິດຄົນດັ່ງກ່າວນັ້ນໄດ້ລັກປີນເຂົ້າຫ້ອງພັກຂອງຕົນເອງ ແລະ ໄດ້ຄົ້ນເຄື່ອງຂອງຕ່າງໆ ພ້ອມທັງລັກໂທລະສັບຂອງຕົນອອກໄປ ເດັກນ້ອຍຄົນດັ່ງກ່າວຈຶ່ງໄດ້ພະຍາຍາມຊອກຫາຈົນສາມາດພົບໂຕຈຶ່ງໄດ້ລົງມືທໍາຮ້າຍຮ່າງກາຍຈົນສະລົບ ແລະ ຊາຍຊາວລາວກໍໄດ້ເຂົ້າມາທໍາຮ້າຍອີກຄັ້ງກ່ອນທີ່ຈະໜີໄປ ແລະ ໃນຕອນນີ້ທາງເຈົ້າໜ້າທີ່ໄທກໍກໍາລັງລວບລວມຫຼັກຖານເພື່ອດໍາເນີນຄດີກັບທັງສອງຄົນຕາມກົດໝາຍ.