ກອງທັບອິດສະລາແອນ ເປີດສາກໂຈມຕີທາງອາກາດກຸ່ມຮາມາດ ໃນເຂດສະນວນກາຊາ ໂດຍບອກວ່າເປັນການຕອບໂຕ້ ທີ່ທາງປາແລັດສະຕິນ ໄດ້ປ່ອຍປຸມເປົ້າໄຟ ທີ່ເປັນຕົ້ນເຫດໃຫ້ເກີດໄຟໄໝ້ຫຼາຍຈຸດ ໃນພື້ນທີ່ຂອງອິດສະລາແອນ.
ມີລາຍງານ ໄດ້ຍິນສຽງລະເບີດດັງມາຈາກ ໃນເມືອງກາຊາຕອນຊ່ວງເຊົ້າມືດ ຂອງວັນທີ 16 ມິຖຸນາ 2021 ທີ່ຜ່ານມາ ຕາມເວລາທ້ອງຖິ່ນ ຖືເປັນການປະທະກັນຄັ້ງໃຫຍ່ນັບຕັ້ງແຕ່ 2 ຝ່າຍ ບັນລຸຂໍ້ຕົກລົງຢຸດຍິງໃສ່ກັນ ເມື່ອວັນທີ 21 ພຶດສະພາ ທີ່ຜ່ານມາ, ຫຼັງຈາກການສູ້ຣົບກັນຢ່າງຕໍ່ເນື່ອງ ຍາວນານຈົນຮອດ 11 ມື້ ໃນຊ່ວງຕົ້ນເດືອນ ພຶດສະພາ.
ເຫດການນີ້ ຍັງເປັນການປະທະກັນຄັ້ງທຳອິດ ນັບແຕ່ ທ່ານ ເບນຈາມິນ ເນທັນຍາຮູ ອອກຈາກຕຳແໜ່ງນາຍົກລັດຖະມົນຕີ ແລະ ລັດຖະບານປະສົມໃໝ່ທີ່ນຳພາໂດຍ ທ່ານ ນາຕາລີ ເບນເນັດ ເຂົ້າຮັບຕຳແໜ່ງ ເມື່ອອາທິດທີ່ຜ່ານມາ. ໜ່ວຍດັບເພີງ ຂອງອິດສະລາແອນລາຍງານວ່າ: ປຸມເປົ້າໄຟ ຖືກປ່ອຍມາຈາກທາງເຂດສະນວນກາຊາ ເຂົ້າມາທາງອິດສະລາແອນ ເມື່ອວັນທີ 15 ມິຖຸນາ 2021 ເຮັດໃຫ້ມີໄຟໄໝ້ 20 ບ່ອນ ໃນພື້ນທີ່ກະສິກຳ ທາງພາກໃຕ້ ຂອງອິດສະລາແອນ.