ອີງຕາມການລາຍງານ ຂອງ ຂປລ ໃຫ້ຮູ້ວ່າ: ເພື່ອສ້າງສິ່ງອຳນວຍຄວາມສະດວກ ໃຫ້ແກ່ການສັນຈອນພາຍ ໃນເທດສະບານນະຄອນຫຼວງພະບາງ ເພາະທີ່ຜ່ານມາ, ຍັງມີເສັ້ນທາງເຂດອ້ອມຮອບເທດສະບານ ມີຄວາມແອອັດ ໃນໄລຍະໂມງໄປການ, ເລີກການ ແລະ ໄລຍະມີງານບຸນ ດັ່ງນັ້ນ, ເທສະບານນະຄອນຫຼວງພະບາງ ຈຶ່ງໄດ້ຂະຫຍາຍເສັ້ນທາງເທສະບານ ເພື່ອອຳນວຍຄວາມສະດວດໃຫ້ແກ່ການສັນຈອນ.
ທ່ານ ບຼົ່ງວ່າງ ຫວ່າງເຈຍຊາ ຫົວໜ້າພະແນກໂຍທາທິການ ແລະ ຂົນສົ່ງ ແຂວງຫຼວງພະບາງ ໄດ້ໃຫ້ສຳພາດເມື່ອບໍ່ນານມານີ້ວ່າ: ໂຄງການປັບປຸງ ແລະ ຂະຫຍາຍເສັ້ນທາງ ພາຍໃນເທດສະບານນະ ຄອນຫລວງພະບາງ ແມ່ນໄດ້ນຳສະເໜີກະຊວງ ກ່ອນຈະໄດ້ຮັບການອານຸມັດ ໃນການຈັດຕັ້ງປະຕິບັດໃນປີ 2021 ນີ້.
ໃນນັ້ນ, ມີເສັ້ນທາງນັບແຕ່ ບ້ານ ນາສໍາພັນ ຫາບ້ານຂົວທີໜຶ່ງ ໄລຍະທາງ 1.800 ແມັດ, ໂດຍນຳໃຊ້ງົບປະມານທັງໝົດ 16 ຕື້ກ່ວາກີບ, ໂດຍໄດ້ຂະຫຍາຍຄວາມກວ້າງບາງເຂດຈາກ 7 ແມັດ ເປັນ 14 ແມັດ ແລະ ບາງເຂດ ຈາກ 7 ແມັດ ເປັນ 10-11 ແມັດ. ປັດຈຸບັນໄດ້ສໍາເລັດໜ້າວຽກເປັນສ່ວນໃຫຍ່, ຍັງພຽງວຽກລະອຽດບາງຈຸດ, ສ່ວນເສັ້ນທາງແຕ່ສາມແຍກອານຸສາວະລີ ປະທານໄກສອນ ພົມວິຫານ ຫາ ສົ້ນຂົວນ້ຳດົງ ໄດ້ຂະຫຍາຍໜ້າທາງຈາກ 7 ແມັດ ເປັນ 11-12 ແມັດ ແລະ ຈະມີການກໍ່ສ້າງທາງຍ່າງທັງສອງເບື້ອງ ແຕ່ສາມແຍກອານຸສາວະລີ ປະທານໄກສອນ ພົມວິຫານ ໄປຫາຕະຫລາດໂພສີ.
ນອກນັ້ນ, ແມ່ນຈະມີການຂະຫຍາຍແຕ່ໜ້າທາງ ແລະ ສ້ອມແປງຮ່ອງລະບາຍນ້ຳ, ມູນຄ່າການກໍ່ສ້າງສ້ອມແປງ 6 ຕື້ກ່ວາກີບ, ໂດຍນໍາໃຊ້ກອງທືນທາງ ບ້ວງສ້ອມແປງທາງຫລວງແຫ່ງຊາດ ແລະ ເງິນເກີນແຜນ 40% ຂອງແຂວງ. ປັດຈຸບັນພວມດຳເນີນການກໍ່ສ້າງ, ໂດຍໄດ້ສໍາເລັດການຍົກຍ້າຍສີ່ງກີດຂວາງ ແລະ ພວມດຳເນີນການກໍ່ສ້າງຮ່ອງລະບາຍນ້ຳຂ້າງທາງຢູ່ບາງຈຸດ.
ສຳລັບເສັ້ນທາງແຕ່ສາມແຍກອານຸສາວະລີ ປະທານໄກສອນ ພົມວິຫານ ຫາ ສົ້ນຂົວນ້ຳດົງ ບາງຈຸດອາດຈະດຳເນີນໄປຕາມແຜນການ ແຕ່ບາງຈຸດ ອາດຈະມີການປັບປ່ຽນເລັກນ້ອຍ, ໂດຍສະເພາະແມ່ນຈຸດທີ່ມີເສົາໄຟຟ້າ ເນື່ອງຈາກບໍ່ງົບປະມານໃນການຍົກຍ້າຍເສົາ, ສ່ວນການປະຕິບັດວຽກງານຕົວຈິງຈະໃຫ້ສໍາເລັດຕາມແຜນການພາຍໃນ 5 ເດືອນ.
ທ່ານ ບຼົ່ງວ່າງ ຫວ່າງເຈຍຊາ ກ່າວຕື່ມວ່າ: ເມື່ອບໍ່ດົນມານີ້, ຢູ່ແຂວງຫຼວງພະບາງ ໄດ້ມີການສ້າງ ແລະ ສ້ອມແປງເສັ້ນທາງ ແຕ່ສົ້ນຂົວນໍ້າຄານ ເຂດບ້ານ ເມືອງງາ ຫາ ສວນສາທາລະນະລ້ານຊ້າງ ໄລຍະທາງປະມານ 200 ແມັດ, ຂະຫຍາຍຄວາມກວ້າງ ຈາກ 7 ເປັນ 12-14 ແມັດ, ລວມທັງເສັ້ນທາງ 13 ເໜືອ, ໂດຍແມ່ນໂຄງການສ້ອມແປງ ເສັ້ນທາງຫຼວງແຫ່ງຊາດ ເພື່ອເຮັດໃຫ້ການສັນຈອນມີຄວາມສະດວກສະບາຍຂຶ້ນຕື່ມ.