ອີງຕາມການລາຍງານ ຂອງສະພາແຫ່ງຊາດ, ເມື່ອວັນທີ 28 ພຶດສະພາ 2021 ທີ່ສຳນັກງານສູນກາງພັກ ທີ່ຜ່ານມາ, ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ແຫ່ງ ສປປ ລາວ ພົບປະທາງໄກ ກັບ ສະຫາຍ ລີ້ ຈ້ານຊູ ກຳມະການຄະນະປະຈຳກົມການເມືອງສູນກາງພັກກອມມູນິດຈີນ ປະທານສະພາຜູ້ແທນປະຊາຊົນທົ່ວປະເທດ ແຫ່ງ ສປ ຈີນ ເພື່ອໂອ້ລົມແລກປ່ຽນສະພາບການພົ້ນເດັ່ນ ຂອງແຕ່ລະປະເທດ ແລະສະພາບການໃນການຕ້ານ, ສະກັດກັ້ນ ແລະ ຮັບມືກັບການແຜ່ລະບາດ ຂອງພະຍາດໂຄວິດ-19 ຢູ່ ສປປ ລາວ.

ໃນຂະນະທີ່ໂອລົມກັນນັ້ນ, ມີບາງຕອນ ທ່ານ ລີ ຈ້ານຊູ ໄດ້ຕາງໜ້າ, ພັກ, ລັດຖະບານຈີນ ປະກາດໃຫ້ການຊ່ວຍເຫຼືອ ຢາວັກຊິນ ຈໍານວນ 500.000 ໂດສ ໃຫ້ແກ່ ສປປ ລາວ ຕື່ມອີກ ເພື່ອຮັບມືກັບພະຍາດໂຄວິດ-19 ໃນປັດຈຸບັນ.