ສຳລັບປະເທດເພື່ອນບ້ານຂອງອິນເດຍຄືປະເທດເນປານກໍ່ກຳລັງພົບກັບການລະບາດຂອງໂຄວິດ-19 ຢ່າງຮຸນແຮງຄືກັນ. ຫຼ້າສຸດປະເທດປານມີຍອດສະສົມຜູ້ຕິດໂຄວິດ-19 ແລະ ເສຍຊີວິດປະຈຳໃນຕົວເລກທີ່ໜ້າເປັນຫ່ວງ ດ້ານຜູ້ຊ່ຽວຊານຕ່າງພາກັນສະແດງຄວາມກັງວົນຕໍ່ສະພາບການລະບາດຂອງໂຄວິດໃນເນປານ ອາດຄ້າຍຄືກັບໃນອິນເດຍ.
ຈາກການລາຍງານເມື່ອວັນອັງຄານທີ່ຜ່ານມາ ເນປານພົບຜູ້ຕິດເຊື້ອກໍລະນີໃໝ່ 9,300 ຄົນ ພາຍໃນເວລາ 24 ຊົ່ວໂມງ ນັບເປັນຍອດຜູ້ຕິດເຊື້ອປະຈຳວັນສູງສຸດນັບຕັ້ງແຕ່ມີການລະບາດ.
ຈຳນວນຜູ້ຕິດເຊື້ອໃໝ່ກຳລັງເພີ່ມຂຶ້ນຢ່າງໄວວາ ໃນຕົ້ນເດືອນເມສາທີ່ຜ່ານມາຜູ້ຕິດເຊື້ອໃໝ່ 100-300 ກໍລະນີ ແລະ ໃນວັນອັງຄານແມ່ນມີຍອດຜູ້ຕິດເຊື້ອປະຈຳວັນທີ່ 9,300 ເພີ່ມຂຶ້ນສູງເຖິງ 1,200% ພາຍໃນເວລາບໍ່ເຖິງໜຶ່ງເດືອນ ສ່ວນຍອດຜູ້ເສຍຊີວິດໃນມື້ນີ້ມີ 225 ຄົນ ຈາກເມື່ອກ່ອນສະເລ່ຍ 100 ຄົນ ເນປານມິີຍອດຜູ້ຕິດເຊື້ອສະສົມກວ່າ 413,000ຄົນ,ເສຍຊີວິດ 4,000ຄົນ.
ປະເທດເນປານແມ່ນປະເທດທີ່ມີລະບົບສຸຂະພາບທີ່ອ່ອນແອຢູ່ແລ້ວ. ມີປະຊາກອນທັງໝົດປະມານ 28 ລ້ານຄົນ, ແຕ່ວ່າມີຕຽງສຳລັບປິ່ນປົວຜູ້ປ່ວຍໜັກພຽງແຕ່ 1,595 ຕຽງ ແລະ ເຄື່ອງຊ່ວຍຫາຍໃຈພຽງ 480 ເຄື່ອງເທົ່ານັ້ນ ເມື່ອມີການລະບາດຂຶ້ນຮອບສອງຜູ້ປ່ວຍກໍ່ຫຼົ້ນໂຮງໝໍຢ່າງໄວວາ. ອົກຊີເຈນບໍ່ພຽງພໍ ສະຖານທີ່ເຜົາສົບຜູ້ເສຍຊີວິດບໍ່ພຽງພໍ.
ລັດຖະບານເນປານໄດ້ຮ້ອງຂໍຄວາມຊ່ວຍເຫຼືອຈາກນານາຊາດ ໂດຍສະເພາະອົກຊີເຈນສຳລັບຜູ້ປ່ວຍທີ່ຕອນນີ້ກຳລັງຕ້ອງການເລັ່ງດ່ວນ.
ຮຽບຮຽງຂ່າວ:ພຸດສະດີ