ສຳນັກຂ່າວ ບີບີຊີ ລາຍງານວ່າ: ອິນເດຍກຳລັງພົບກັບພະຍາດອັນຕະລາຍອີກຊະນິດໜຶ່ງ ທ່າມກາງການແຜ່ລະບາດຂອງໂຄວິ-19 ໂດຍທາງແພດແຈ້ງວ່າ: ການຕິດເຊື້ອພະຍາດ Mucormycosis ຫຼື ພະຍາດເຊື້ອຣາດຳ ໃນກຸ່ມຜູ້ປ່ວຍໂຄວິດ-19 ທີ່ກຳລັງພັກຟື້ນ ແລະ ຟື້ນຕົວແລ້ວ.
ພະຍາດ Mucormycosis ຫຼື ພະຍາດເຊື້ອຣາດຳ ແມ່ນການຕິດເຊື້ອທີ່ຫາໄດ້ຍາກ ເຊິ່ງເກີດຈາກການໄປສຳຜັດ ກັບເຊື້ອຣາທີ່ພົບເຫັນທົ່ວໄປໃນດິນ, ພືດ, ຝຸ່ນ, ແລະ ຜັກໝາກໄມ້ທີ່ເນົ່າເປື່ອຍ ສ່ວນຫຼາຍ ແມ່ນພົບໃນຄົນເຈັບທີ່ມີພູມຕ້ານທານຕໍ່າ ແລະ ມັກຈະພົບລວມກັບພະຍາດເບົາຫວານ ເຊິ່ງເປັນການຕິດເຊື້ອທີ່ມີເຕີບໃຫຍ່ຢ່າງໄວ ແລະ ມີອັດຕາການເສຍຊີວິດຮ້ອຍລະ 50 ເຖິງ 100%.
ການຕິດເຊື້ອ ຂອງພະຍາດເຊື້ອຣານີ້ ສົ່ງຜົນກະທົບຕໍ່ ຮູດັງ, ສະໝອງ ແລະ ປອດ ອັນຕະລາຍຕໍ່ຊີວິດສຳລັບຜູ້ປ່ວຍທີ່ເປັນພະຍາດເບົາຫວານ ຫຼື ຄົນທີ່ມີພູມຄຸ້ມກັນບົກຜ່ອງ ເຊັ່ນ: ຜູ້ປ່ວຍມະເຮັງ ຫຼື ຜູ້ປ່ວຍ HIV.
ປັດຈຸບັນ ພົບຜູ້ຕິດເຊື້ອຣາດຳ 40 ຄົນ ໃນໂຮງໝໍ 3 ແຫ່ງ ທີ່ມຸມໃບ ອິນເດຍ ແລະ ຜູ້ປ່ວຍສ່ວນຫຼາຍແມ່ນມີພະຍາດປະຈຳໂຕຄືໂລກເບົາຫວານ ກ່ອນໜ້ານີ້ 2 ປີ ແມ່ນພົບຜູ້ຕິດເຊື້ອຊິນິດນີ້ບໍ່ຮອດ 10 ຄົນ. ໃນນັ້ນໂຮງໝໍໄຊອອນ ໃນມຸມໃບ ພົບຜູ້ຕິດເຊື້ອຣາດຳ 24 ຄົນ ໃນເວລາ 2 ເດືອນ ຜ່ານມາ ໂດຍຜູ້ປ່ວຍ 11 ຄົນ ຕ້ອງສູນເສຍດວງຕາ ແລະ 6 ຄົນ ແມ່ນເສຍຊີວິດ ສ່ວນໃຫຍ່ຈະແມ່ນຜູ້ທີ່ເປັນພະຍາດເບົາຫວານ ແລະ ຕິດເຊື້ອຣາດຳ 2 ອາທິດ ຫຼັງຈາກປິ່ນປົວຫາຍດີຈາກພະຍາດ ໂຄວິດ-19.