ສຳນັກຂ່າວຊິນຫົວລາຍງານເມື່ອວັນທີ 29 ເມສາ 2021 ວ່າ ຜົນການສຶກສາຈາກສຳນັກງານສາທາລະນະສຸກອັງກິດລະບຸວ່າ ການສັກວັນຊີນປ້ອງກັນໂຄວິດ-19 ພຽງໂດສດຽວ ສາມາດຫຼຸດການກະຈາຍຂອງເຊື້ອໄວຣັສໂຄໂຣນ່າສາຍພັນ SARS-CoV-2 ໄດ້ເຖິງ 50%.
ການສຶກສາເບື້ອງຕົ້ນລະບຸວ່າ ຜູ້ທີ່ຕິດເຊື້ອໂຄວິດຢ່າງໜ້ອຍ 3 ອາທິດ ມີແນວໂນ້ມແຜ່ເຊື້ອໃຫ້ຄົນໃນຄອບຄົວດຽວກັນຫຼຸດລົງ 38-49% ເມື່ອທຽບກັບຜູ້ທີ່ບໍ່ໄດ້ຮັບວັກຊີນ ໂດຍຜູ້ເຂົ້າຮ່ວມການວິໄຈໃນຄັ້ງນີ້ແມ່ນຜູ້ທີ່ໄດ້ຮັບວັກຊີນ ໄຟເຊີ (Pfizer) ຫຼື ເອາຕຣ້າເຊນເນກາ (AstraZeneca) ແລ້ວ ຈຳນວນ 1 ໂດສ.
ທ່ານ ປີເຕີ ອິງລິຊ ທີ່ປຶກສາຜູ້ອາວຸໂສຈາກສຳນັກງານຄວບຄຸມໂຣກລະບາດໃຫ້ສຳພາດກັບສຳນັກຂ່າວສະກາຍ ນິສ ວ່າ ການຄົ້ນພົບນີ້ເປັນເລື່ອງທີ່ໜ້າຍິນດີທີ່ສຸດ ເຮັດໃຫ້ມີຫຼັກຖານເພີ່ມຂຶ້ນຢ່າງຕໍ່ເນື່ອງວ່າການສັກວັກຊີນຈະຊ່ວງປ້ອງກັນປະຊາຊົນຈາກການຕິດເຊື້ອ ເຖິງຄົນທີ່ສັກວັກຊີນແລ້ວຈະຍັງຕິດເຊື້ອໂຄວິດ-19 ແຕ່ພວກເຂົາມີແນວໂນ້ມຈະບໍ່ແຜ່ເຊື້ອນີ້ໃຫ້ກັບຄົນອື່ນໄດ້.
ການສຶກສາດັ່ງກ່າວຍັງບໍ່ໄດ້ຖືກທົບທວນໂດຍຄົນທີ່ມີຄຸນວຸດທິ ຫຼາຍກວ່າ 57,000 ຄົນໄດ້ເຂົ້າຮ່ວມ, ອາໄສຢູ່ໃນ 24,000 ຄົວເຮືອນດ້ວຍການສັກວັກຊີນແລ້ວໜຶ່ງຄົນ. ໂດຍພວກເຂົາຖືກນຳມາປຽບທຽບກັບປະຊາຊົນເກືອບ 1 ລ້ານຄົນທີ່ຍັງບໍ່ໄດ້ຮັບວັກຊີນ.
ທັງນີ້, ປະເທດອັງກິດມີປະຊາຊົນໄດ້ຮັບວັກຊີນປ້ອງກັນໂຄວິດ-19 ໂດສທຳອິດແລ້ວ33.8 ລ້ານຄົນ ໂດຍ 1 ໃນ 4 ຂອງຜູ້ໃຫຍໃນປະເທດໄດ້ຮັບວັກຊີນຄົບ 2 ໂດສແລ້ວ ໃນຂະນະທີ່ໂູຄງການສັກວັກຊີນທົ່ວປະເທດໄດ້ຄວບຄຸມໄປເຖິງປະຊາຊົນທີ່ມີອາຍຸ 42 ປີຂຶ້ນໄປ.
ຮຽບຮຽງຂ່າວ: ພຸດສະດີ