- ອີງຕາມ ສະພາບການແຜ່ລະບາດ ຂອງ ພະຍາດ COVID-19 ທີ່ເພີ່ມທະວີຄວາມຮຸນແຮງຂຶ້ນປະຈຸບັນ.
- ອີງຕາມ ຜົນການປະເມີນທາງດ້ານກະແສລາຍຮັບ ແລະ ຜົນກະທົບ ຂອງ ພະຍາດ COVID-19 ຕໍ່ການດຳເນີນທຸລະກິດ ຂອງ ລັດວິສາຫະກິດໄຟຟ້າລາວ
- ອີງຕາມ ການຕົກລົງເຫັນດີ ຂອງ ປະທານສະພາບໍລິຫານ ຟຟລ ຄັ້ງວັນທີ 26 ເມສາ 2021
ລັດວິສາຫະກິດໄຟຟ້າລາວ (ຟຟລ) ຂໍຖືເປັນກຽດຮຽນມາຍັງ ທ່ານ ເພື່ອຊາບວ່າ: ສືບເນື່ອງ ຈາກການແຜ່ລະບາດ ຂອງ ພະຍາດ COVID 19 ພາຍໃນປະເທດຄັ້ງໃໝ່ ໃນເດືອນ ເມສາ ປີ 2021 ນີ້, ເຮັດໃຫ້ລັດຖະບານຕ້ອງອອກມາດຕະການ Lockdown ໃນຫຼາຍແຂວງທົ່ວປະເທດ, ເນື່ອງຈາກເປັນໄລຍະທີ່ມີອາກາດຮ້ອນອົບເອົ້າ ເຊິ່ງຈະສົ່ງຜົນໃຫ້ຄ່າໄຟຟ້າສູງຂຶ້ນເຊັ່ນກັນ.
ສະນັ້ນ, ເພື່ອເປັນການບັນເທົາຜົນກະທົບຂອງປະຊາຊົນ ໃນຊ່ວງໄລຍະທີ່ມີການ Lockdown, ຂໍຮຽນສະເໜີມາຍັງລັດຖະບານ ເພື່ອພິຈາລະນາບາງມາດມາດຕະການ ຊ່ວຍເຫຼືອຜູ້ທີ່ໄດ້ຮັບຜົນກະທົບ ດັ່ງລຸ່ມນີ້:
- ສະເໜີ ຫຼຸດຄ່າໄຟຟ້າສະເພາະພາກທີ່ຢູ່ອາໃສ 3% ຂອງມູນຄ່າໃນໃບບິນ (ບໍ່ລວມອາກອນມູນຄ່າເພີ່ມ).
- ສະເໜີ ຫັກເອົາລາຍຮັບຂອງ ຟຟລ ຈາກການຈຳໜ່າຍໄຟຟ້າພາກທີ່ຢູ່ອາໃສ 2%, (ສະເພາະເງິນທີ່ເກັບໄດ້ໃນເດືອນ) ເພື່ອປະກອບສ່ວນຊຸກຍູ້ດ້ານວັດຖຸທີ່ຈໍາເປັນຕໍ່ ວຽກງານຕ້ານ ພະຍາດ COVID 19 ເຊັ່ນ: ຜ້າອັດປາກ, ເຈວລ້າງມື, ຊຸດກາວປ້ອງກັນຂອງແພດ, ອົກຊີເຈນ, ວັກຊີນ ແລະ ວັດຖຸອື່ນໆ ຕາມຄວາມຈຳເປັນ ໃຫ້ກັບພາກສ່ວນຮັບຜິດຊອບ ເພື່ອຫຼຸດຜ່ອນພາລະຂອງລັດຖະບານ ຫຼື ມອບເງິນດັ່ງກ່າວ ໃຫ້ກັບ ລັດຖະບານເພື່ອເອົາໄປໃຊ້ໃນວຽກງານດັ່ງກ່າວ.
- ສະເໜີ ເລື່ອນໄລຍະການຊຳລະໜີ້ຄ່າໄຟ ຂອງ ລູກຄ້າອອກໄປຕື່ມ ຈາກ 2 ເດືອນ ເພີ່ມເປັນ 3 ເດືອນ.
- ຂໍຈັດຕັ້ງປະຕິບັດ ເລີ່ມແຕ່ ຮອບຜະລິດໃບບິນ ເດືອນ ພຶດສະພາ (ພະລັງງານຊົມໃຊ້ ເດືອນ ເມສາ) ຫາ ເດືອນ ກໍລະກົດ ປີ 2021 (ກຳນົດປະຕິບັດ 3 ເດືອນ) ແລະ ປະຕິບັດສະເພາະແຂວງທີ່ຖືກ Lockdown.