ອີງຕາມ ເວັບໄຊ້ Times of Israel ສື່ມວນຊົນທ້ອງຖິ່ນຂອງອິດສະຣາແອນ ໄດ້ລາຍງານໃນວັນທີ 15 ເມສາ 2021 ວ່າ: ລັດຖະບານອິດສະຣາແອນປະກາດ “ຍົກເລີກມາດຕະ
ການໃສ່ຜ້າອັດປາກ-ດັງ ໃນສະຖານທີ່ສາທາລະນະ” ເລີ່ມປະຕິບັດໃນວັນທີ 18 ເມສາ 2021 (ມື້ວານ) ເປັນຕົ້ນໄປ, ຫຼັງຈາກລັດຖະບານໄດ້ສັກວັກຊີນປ້ອງກັນພະຍາດໂຄວິດ-19 ໃຫ້ກັບປະຊາຊົນຫຼາຍກວ່າເຄິ່ງປະເທດ, ເຮັດໃຫ້ຈຳນວນຜູ້ຕິດເຊື້ອຫຼຸດລົງເຫຼືອພຽງແຕ່ຫຼັກຮ້ອຍ. ໃນຂະນະທີ່ຜູ້ຊ່ຽວຊານກ່າວວ່າ ໃນເວລານີ້ເກີດມີພາວະ “ພູມຕ້ານທານກຸ່ມ” ຂື້ນແລ້ວ.
ທ່ານ ຢິລິ ເອເດສະຕິນ (Yuli Delstein) ລັດຖະມົນຕີກະຊວງສາທາລະນະສຸກອິດສະຣາແອນ ໄດ້ອອກຖະແຫຼງການໃນວັນຊາດອິດສະຣາແອນ ວ່າ: ໃຫ້ຢຸດຕິຂໍ້ບັງຄັບທາງດ້ານສາທາລະນະສຸກໃນການໃສ່ຜ້າອັດປາກ-ດັງ ໃນເຂດສາທາລະນະລົງ ເຊິ່ງເລີ່ມປະຕິບັດຕັ້ງແຕ່ວັນທີ 18 ເດືອນເມສາ 2021 ເປັນຕົ້ນໄປ. ເຖິງຢ່າງໃດກໍ່ຕາມ, ມາດຕະການບັງຄັບໃຫ້ໃສ່ຜ້າອັດປາກ-ດັງ ໃນສະຖານທີ່ປິດ(ບ່ອນບໍ່ມີອາກາດຖ່າຍເທ) ນັ້ນຍັງຕ້ອງປະຕິບັດຢູ່.
ລາຍງານກ່າວອີກວ່າ: ຫຼັງຈາກອິດສະຣາແອນ ພົບກັບການແຜ່ລະບາດຂອງພະຍາດໂຄວິດ-19 ຢ່າງຮ້າຍແຮງ ໃນຮອບທີສາມແລ້ວ, ເຮັດໃຫ້ຮູ້ທິດທາງການແກ້ໄຂສະຖານະການໄດ້ດີຂື້ນຢ່າງໄວ ໃນໄລຍະເດືອນທີ່ຜ່ານມາ ຫຼັງຈາກທີ່ອິດສະຣາແອນ ເປັນຜູ້ດຳເນີນໂຄງການຊັກວັກຊີນທີ່ຄິດໄລ່ຕາມອັດຕາສ່ວນປະຊາກອນໄວທີ່ສຸດໃນໂລກ ໂດຍເລືອກໃຊ້ວັກຊີນຂອງ Pfizer / BioNTech.