ຄະນະກໍາມະການຄຸ້ມຄອງໄພພິບັດ ເມືອງ ພຽງ ແຂວງ ໄຊຍະບູລີ ໄດ້ລາຍງານໃຫ້ຮູ້ວ່າ: ໄດ້ເກີດມີລົມພາຍຸ ໃນວັນທີ 28 ມີນາ 2021 ທີ່ຜ່ານມາ, ເວລາ 18 ໂມງ 30 ນາທີ ເຮັດໃຫ້ເຮືອນປະຊາຊົນຈໍານວນ 3 ບ້ານໃນເມືອງພຽງໄດ້ຮັບຄວາມເສບຫາຍລວມມູນຄ່າເກືອບ 20 ຕື້ກີບ.

ໃນວັນທີ 31 ມີນາ 2021 ທີ່ຜ່ານມາ, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍພາກສ່ວນທີ່ກ່ຽວຂ້ອງຈາກແຂວງ ແລະ ເມືອງພຽງ ໄດ້ລົງກວດກາເບິ່ງຜົນເສຍຫາຍຕົວຈິງຢູ່ເຂດທີ່ຖືກຜົນກະທົບດັ່ງກ່າວ, ພ້ອມທັງໃຫ້ພາກສ່ວນທີ່ກ່ຽວຂ້ອງກວດກາ ແລະ ເກັບກໍາຂໍ້ມູນຜົນເສຍຫາຍຂອງປະຊາຊົນ ແລະ ບໍລິສັດທີ່ປູກກ້ວຍຄືນໃຫ້ລະອຽດ ເພື່ອໃຫ້ການຊ່ວຍເຫຼືອໃນເບື້ອງຕົ້ນໃຫ້ແກ່ຄອບຄົວທີ່ຖືກກະທົບໜັກຢ່າງຮີບດ່ວນ.

ສຳລັບ ຜູ້ທີ່ໄດ້ຮັບຜົນກະທົບ ແລະ ເສຍຫາຍປະກອບມີຢູ່ 3 ບ້ານຄື: ບ້ານ ນາແລ ໄດ້ຮັບຜົນກະທົບ 5 ຄອບຄົວ ມູນຄ່າເສຍຫາຍ 11 ລ້ານກີບ, ບ້ານ ວັງຄໍາ ໄດ້ຮັບຜົນກະທົບ 2 ຄອບຄົວ ມູນຄ່າຜົນເສຍຫາຍ 1 ລ້ານກວ່າກີບ, ບ້ານໜອງບົວທອງ ໄດ້ຮັບຜົນກະທົບ 1 ຄອບຄົວ ມູນຄ່າເສຍຫາຍ 2 ແສນກວ່າກີບ, ໂຮງຮຽນປະຖົມໂພນຊຽງ ມູນຄ່າເສຍຫາຍ 2 ລ້ານກວ່າກີບ, ໂຮງຮຽນປະຖົມນາແລ ມູນຄ່າເສຍຫາຍ 1 ລ້ານກວ່າກີບ, ຫ້ອງການບ້ານ ນາແລ ມູນຄ່າ 3 ລ້ານກີບ, ສວນກ້ວຍຂອງບໍລິສັດ ບົວບານ ໄດ້ຮັບຜົນກະທົບເນື້ອທີ່ 63 ເຮັກຕາ ແລະ ຈໍານວນຕົ້ນກ້ວຍ 142,000 ຕົ້ນ, ລວມມູນຄ່າເສຍຫາຍ 16 ຕື້ກີບ, ບໍລິສັດ ຕາຄິງ ໄດ້ຮັບຜົນກະທົບເນື້ອທີ່ 10 ເຮັກຕາ, ມີຈໍານວນຕົ້ນກ້ວຍ 31,000 ຕົ້ນ, ມູນຄ່າເສຍຫາຍ 3 ຕື້ກວ່າກີບ ແລະ ຊັບສິນຂອງລັດອີກ 3 ແຫ່ງ ເຊິ່ງລວມມູນຄ່າເກືອບ 20 ຕື້ກີບ.