ບັນດານັກຮຽນຈາກໂຮງຮຽນໃນທ້ອງຖິ່ນ, ໂຮງຮຽນນານາຊາດ ແລະ ໂຮງຮຽນເອກະຊົນໃນນະຄອນຫຼວງວຽງຈັນ ໄດ້ຖືກຮັບເຊີນເຂົ້າຮ່ວມການແຂ່ງຂັນດ້ານໄຫວພິບຄວາມສາມາດໃນງານແຂ່ງຂັນຄະນິດສາດປະຈຳປີຄັ້ງທີ 13 (ISMO) ທີ່ເປັນເຈົ້າພາບຈັດງານໂດຍໂຮງຮຽນນານາຊາດລາວ. ບັນດາລາຍຊື່ຜູ້ຊະນະ ແລະ ອັນດັບໄດ້ຖືກປະກາດໃຫ້ຊາບໃນພິທີມອບລາງວັນທີ່ໄດ້ຈັດຂື້ນໃນວິທະຍາເຂດໜອງບອນຂອງໂຮງຮຽນນານາຊາດລາວໃນຊ່ວງວັນທີ 20 ມີນາ 2021 ທີ່ຜ່ານມາ.

ໃນປີນີ້, 3 ອັນດັບທໍາອິດຂອງປະເພດຊັ້ນປະຖົມແມ່ນຕົກເປັນຂອງນັກຮຽນຈາກ ໂຮງຮຽນນານາຊາດປັນຍາທິບ ເຊິ່ງໄດ້ແກ່ ນະຊາຍົດສະນັນ ແສງທອງສິຣີກະມົນ (Nachayossanan Saengtongsrikamon) ໃນອັນດັບທີ 1, ແສງໄຊ ສີຊົມພູ (Sengxay Sixomphou) ຢູ່ອັນດັບ 2 ແລະ ຈໍແດນ ເທ (Jordan Tay) ພ້ອມກັບ ສິລິໂຊກ ໄຊຍະເວດ (Sirisok Xayyaveth) ຈາກໂຮງຮຽນ ວິລະຖາວອນ ແມ່ນໄດ້ອັນດັບ 3 ຮ່ວມກັນ. ນອກນັ້ນ ຍັງຕາມມາດ້ວຍ ພຸດທະສອນ ດັ່ງປັນຍາ ຈາກໂຮງຮຽນຈີນຫຼຽວໂຕ້ຢູ່ອັນດັບທີ 4 ແລະ ຄຳມຸງຄຸນ ລໍບູແນງ ຈາກໂຮງຮຽນນານາຊາດປັນຍາທິບຢູ່ອັນດັບທີ 5.

ສ່ວນປະເພດມັດທະຍົມ, ອັນດັບ 1 ໄດ້ແກ່ ສຸລິຍາ ບືງວັດທະນາ ຈາກໂຮງຮຽນ ນິຣະດາ, ອັນດັບ 2 ເປັນຂອງ ຮຽວ ອຸນ ຣີ (Hyo Un Ri) ຈາກໂຮງຮຽນນານາຊາດ ກຽດຕິສັດ ພ້ອມກັບ ມຸກດາວັນ ບານຸວົງ ຈາກໂຮງຮຽນພອນສະຫວັນ ນໍາມາໃນອັນດັບ 3. ສ່ວນອັນດັບ 4 ໄດ້ແກ່ ອີ ວູ ວອນ (Lee woo Won) ຈາກໂຮງຮຽນນານາຊາດປັນຍາທິບ ແລະ ອັນດັບ 5 ແມ່ນ ລັດຕະມາໄທສານ ແກ້ວດາຣາ ຈາກໂຮງຮຽນມັດທະຍົມສົມບູນວຽງຈັນ.

ນັກຮຽນ 3 ອັນດັບທໍາອິດໃນແຕ່ລະປະເພດໄດ້ຮັບລາງວັນເປັນເງິນສົດມູນຄ່າສູງເຖິງ 1,000,000 ກີບ ສຳລັບອັນດັບທີໜຶ່ງ, 750,000 ກີບ ສຳລັບອັນດັບສອງ, 500,000 ກີບ ສຳລັບອັນດັບສາມ ພ້ອມກັບໃບຢັ້ງຢືນ. ສໍາລັບນັກຮຽນທີ່ບໍ່ໄດ້ຢູ່ໃນສາມອັນດັບທໍາອິດແມ່ນໄດ້ຮັບຫຼຽນລາງວັນ ແລະ/ຫຼື ໃບຢັ້ງຢືນຄວາມຕັ້ງໃຈພະຍາຍາມຂອງພວກເຂົາ.

ການແຂ່ງຂັນຄະນິດສາດລະຫວ່າງໂຮງຮຽນເປັນການແຂ່ງຂັນປະຈຳປີດ້ານຄະນິດສາດສຳລັບນັກຮຽນຊັ້ນປະຖົມ (ເກຣດ 3, 4, 5) ແລະ ຊັ້ນມັດທະຍົມ (ເກຣດ 6, 7, 8, 9).