ສຳນັກຂ່າວຕ່າງປະເທດລາຍງານເມື່ອວັນທີ 10 ມີນາ 2021ວ່າ ອົງການອາວະກາດຣັດເຊຍ ແລະ ສຳນັກງານອາວະກາດແຫ່ງຊາດຈີນ ອອກຖະແຫຼງການຮ່ວມກັນເມື່ອວັນພຸດທີ່ຜ່ານມາວ່າທັງສອງຝ່າຍລົງນາມຮ່ວມກັນ ໃນຂໍ້ຕົກລົງກ່ຽວກັບການສ້າງສຸນປະຕິບັດການເທິງດວງຈັນ ເຊິ່ງທັງສອງປະເທດຢືນຢັນວ່າ ຈະເປີດກ້ວາງຮັບຄວາມຮ່ວມມືຈາກທຸກປະເທດທີ່ສົນໃຈ.
ຄຳຖະແຫຼງການດັ່ງກ່າວໄດ້ຖືກປະກາດເນື່ອງໃນໂອກາດທີ່ປີນີ້ຣັດເຊຍສະຫຼອງຄົບຮອບ 60ປີ ການສົ່ງມະນຸດເດີນທາງທ່ອງທ່ຽວອາວະກາດ.
ໃນຂະນະທີ່ຈີນມີແຜນສົ່ງນັກບິນອາວະກາດຢ່າງໜ້ອຍ 4 ຊຸດໃນປີນີ້ ເພື່ອຂຶ້ນໄປປະຈຳການທີ່ ທຽນເຫີ ທີ່ເປັນໂມດູນຫຼັກຂອງສະຖານີອາວະກາດຈີນ ເຊິ່ງມີກຳນົດທີ່ຈະເດີນທາງເຂົ້າສູ່ວົງໂຄຈອນໃນລະດູໃບໄມ້ປົ່ງຂອງປີນີ້ ໂຄງສ້າງທັງໝົດຂອງສະຖານີອະວະກາດມີກຳນົດສ້າງສຳເລັດພາຍໃນປີໜ້າ.
ຮຽບຮຽງຂ່າວ: ພຸດສະດີ