ສຳນັກຂ່າວ NHK ລາຍງານໃນວັນອາທິດທີ 14 ກຸມພາ 2021 ທີ່ຜ່ານມາວ່າ: ແຜ່ນດິນໄຫວລະດັບ 7.1 ແມັກນິຈູດ ເຊິ່ງເກີດຂື້ນໃນເວລາປະມານ 23:08 ຂອງວັນເສົາຕາມເວລາທ້ອງຖິ່ນ. ເຫດດັ່ງກ່າວເຮັດໃຫ້ເກີດດິນເຈື່ອນຂັດຂວາງ ເສັ້ນທາງດ່ວນຂະໜານ “Jo Ban”, ຖະໜົນໃຫຍ່ໃນແຂວງຟູກູຊິມະ ໃນຂະນະທີ່ທາງດ່ວນອີກແຫ່ງໜຶ່ງໃນແຂວງມິຍາງິຖືກຍົກຂຶ້ນມາເປັນໄລຍະທາງເກືອບ 10 ແມັດ.
ໃນຂະນະທີ່ເສັ້ນທາງຫຼວງຫຼາຍແຫ່ງໃນໂຕໂຮຄຸ ໄດ້ຖືກປິດບາງສ່ວນ, ບໍລິການລົດໄຟ ຊິນກັນເຊັນ ໃນສາຍໂຕໂຮຄຸ ລະຫວ່າງສະຖານີ ນາສຸຊິໂອບາຣະ ແລະ ໂມຣິໂອກະ ກໍ່ຖືກຍົກເລີກໃນຕອນເຊົ້າຂອງວັນອາທິດເຊັ່ນດຽວກັນກັບສາຍຍາມາກາຕະ ໂດຍຈະເປີດໃໝ່ຫຼັງຈາກໄດ້ຮັບການຢືນຢັນວ່າທາງລົດໄຟມີຄວາມປອດໄພແລ້ວ.
ສຳນັກຂ່າວ NHK ແຈ້ງວ່າ ຕອນນີ້, ຈຳນວນຜູ້ບາດເຈັບໃນບໍລິເວນທີ່ເກີດແຜ່ນດິນໄຫວໄດ້ເພີ່ມຂຶ້ນເປັນ 109 ຄົນ ໃນ 8 ແຂວງ ໃນນັ້ນລວມມີ ແຂວງມິຍາງິ ແລະ ແຂວງຟູກູຊິມະ ແຕ່ບໍ່ມີລາຍງານຜູ້ເສຍຊີວິດ ໂດຍຊາວບ້ານບາງຄົນບອກກັບສື່ມວນຊົນວ່າ: ແຜ່ນດິນໄຫວທີ່ເກີດຂຶ້ນເຮັດໃຫ້ພວກເຂົານຶກເຖິງແຜ່ນດິນໄຫວຄັ້ງໃຫຍ່ທີ່ເກີດຂື້ນໃນຂົງເຂດດຽວກັນເມື່ອ 10 ປີກ່ອນ.
ອົງການກວດສອບນິວເຄຼຍຂອງຍີ່ປຸ່ນຢືນຢັນວ່າ ບໍ່ພົບຄວາມຜິດປົກກະຕິໃນໂຮງງານນິວເຄຼຍຕາມແຄມຝັ່ງມະຫາສະໝຸດປາຊີຟິກ ລວມທັງຢູ່ໂຮງງານໄຟຟ້ານິວເຄຼຍຟູກູຊິມະ-ໃດອິຈິ ເຊິ່ງແຜ່ນດີນໄຫວເມື່ອ 10 ປີກ່ອນເຮັດໃຫ້ເກີດຄື້ນຍັກສຶນາມິພັດໃສ່ເຕົາປະຕິກອນນິວເຄຼຍລະເບີດ ກາຍເປັນວິກິດການນິວເຄຼຍຄັ້ງໃຫຍ່ຂອງໂລກ.
ແຜ່ນດິນໄຫວຄັ້ງນີ້ຍັງເຮັດໃຫ້ໄຟຟ້າດັບກະທົບຕໍ່ປະຊາຊົນຫຼາຍກວ່າ 850,000 ຄອບຄົວໃນເຂດໂຕໂຮຄຸ ແລະ ຄັນໂຕ ອີກດ້ວຍ ແຕ່ສະຖານະການໄດ້ເລີ່ມກັບຄືນສູ່ສະພາບປົກກະຕິຕະຫຼອດມື້ຄືນທີ່ຜ່ານມາ ໃນຂະນະທີ່ບາງເມືອງຂອງແຂວງມິຍາງິ ແລະ ແຂວງຟູກູຊິມະ ມີບັນຫານໍ້າປະປາບໍ່ມາ ຍ້ອນທໍ່ນໍ້າແຕກໃນບາງບ່ອນ ເຊັ່ນ: ໃນເມືອງ ອິຊິໂນະມາກິIshinomaki ຢູ່ແຂວງມິຢາງິ ເຮັດໃຫ້ມີນໍ້າຖ້ວມຫຼາຍເສັ້ນທາງ.
ອົງກອນອຸຕຸນິຍົມວິທະຍາຍີ່ປຸ່ນ (JMA) ກ່າວວ່າແຜ່ນດິນໄຫວຄັ້ງລ່າສຸດ ອາດຈະເປັນແຮງສັ່ນສະເທືອນຂອງແຜ່ນດິນໄຫວຂະໜາດໃຫຍ່ເມື່ອ 10 ປີກ່ອນ ເຊິ່ງມີຄວາມແຮງເຖິງ 9,1 ຣິກເຕີ ແລະເຮັດໃຫ້ມີຜູ້ເສຍຊີວິດເກືອບ 16,000 ຄົນ.
ຮຽບຮຽງຂ່າວ: ມົນລະດີ