“ບໍ່ມີວັນຈາກ” ຮູບເງົາທີ່ຄວ້າລາງວັນໃນຫລາຍເທສະການໂລກ ແລະ ກັບຄືນສູ່ການສາຍຮອບປະຖົມມະເລີກທີ່ບ້ານເກີດ
ຮູບເງົາທີ່ຄວ້າມາໄດ້ຫຼາຍລາງວັນ ເລື່ອງ “ບໍ່ມີວັນຈາກ” ໄດ້ນຳເຂົ້າສາຍຮອບພິເສດຢູ່ບ້ານເກີດຄື ສປປ ລາວໃນຕອນຄໍ່າວັນຈັນທີ່ຜ່ານມາ ທີ່ນະຄອນຫຼວງວຽງຈັນ.
ຖືວ່າ ເປັນຮູບເງົາລາວເລື່ອງທຳອິດ ທີ່ຄວ້າໄດ້ຫລາຍລາງວັນມາຝາກແຟນໆຫນັງ ກັບຮູບເງົາເລື່ອງ “ບໍ່ມີວັນຈາກ” ຈາກຝີມືການກຳກັບ ໂດຍຜູ້ກຳກັບຍິ່ງຄົນທຳອິດ ທີ່ມີເຊື້ສາຍລາວ ນັ້ນກໍ່ຄື ແມັດຕີ້ ໂດ ແລະ ໄດ້ເປີດໂຕ ໃນຮອບສື່ມວນຊົນ ໃນວັນຈັນ ທີ 8 ກຸມພາ ທີ່ຜ່ານມາ.
ຮອບປະຖົມມະເລີກຄັ້ງນີ້ ຈັດຂຶ້ນທີ່ໂຮງໜັງເມເຈີແພລັດຕິນຳ ຊີນີເພລັກ ນະຄອນຫຼວງວຽງຈັນ, ໃຫ້ກຽດເຂົ້າຮ່ວມງານໂດຍ ທ່ານ ຄຳເພົ້າ ວັນນະວົງ – ຫົວໜ້າກົມຮູບເງົາ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ດຣ. ປິເຕີຣ໌ ເອັມ ເຮມອນ – ເອກອັກຄະລັດຖະທູດສະຫະລັດອາເມລິກາປະຈຳລາວ, ມີບັນດາລັດຖະທູດ, ເຈົ້າໜ້າທີ່ລະດັບສູງ, ແລະ ແຂກທີ່ຖືກເຊີນເຂົ້າຮ່ວມ.
ຮູບເງົາເລື່ອງນີ້ ຜະລິດໂດຍບໍລິສັດ ລາວອາດມີເດຍ (Lao Art Media) ຮ່ວມກັບ ສຄຣີນ ດິວິເຊິນ (Screen Division) ຈາກປະເທດສະເປນ, ແລະ ບໍລິສັດໂປດັກຊັ່ນຂອງສິງກະໂປ ອີກດ້ວຍ. ຮູບເງົາ “ບໍ່ມີວັນຈາກ” ເປັນຮູບເງົາເລື່ອງທໍາອິດໃນປະຫວັດສາດຂອງວົງການຫນັງລາວທີ່ໄດ້ເຂົ້າສາຍໃນຮອບປະຖົມມະເລີກ ໃນເທສະການຮູບເງົາໃຫຍ່ໆ ທີ່ໂດ່ງດັງ ໃນຫຼາຍແຫ່ງທົ່ວໂລກມາແລ້ວ.
“ບໍ່ມີວັນຈາກ” ໄດ້ຮັບການເຂົ້າສາຍໃນງານຫລາກຫລາຍເທສະການຮູບເງົາ ຊັ້ນນຳຂອງໂລກ ເຊັ່ນ: ເທສະການຮູບເງົາສາກົນເວນິສ, ໂທຣອນໂຕ (TIFF), ບູຊານ, ໂກເທບອກ, ເທສະການຮູບເງົາສາກົນຣັອດເຕີອະດັມ, ເທສະການຮູບເງົາສາກົນໂຕກຽວ, ເທສະການຮູບເງົາສາກົນວໍຣ໌ຊໍ, FIFF Namur, ແລະ ເທສະການຮູບເງົາຊິດຈັສ.
ຮູບເງົາເລື່ອງນີ້ນຳສະແດງໂດຍນັກສະແດງລາວຜູ້ຊົງຄຸນນະວຸດ ນັ້ນກໍ່ຄື ນະວຸດທິ ຈັນທະລັງສີ ທີ່ຄົນລາວຮູ້ຈັກກັນດີ ໃນຊື່ ພໍ່ຊຽງຍານ, ຕາມມາດ້ວຍ ນັກສະແດງຫນ້າໃຫມ່ ປໍ ສີລັດສາ, ນຸດນະພາ ສ້ອຍດາລາ, ຈັນສະໝອນ ອິນອຸດົມ ແລະ ຕັອດລີ່ນາ ວິລຸນາ ເພັດມະນີ ນັກສະແດງຄູ່ຂວັນ ຂອງແມັດຕີ້.
ນອກຈາກນັ້ນ, ຮູບເງົາໄດ້ຮັບລາງວັນຫຼາກຫຼາຍໃນຕ່າງປະເທດເຊັ່ນ: ລາງວັນນັກສະແດງນຳຊາຍດີເດັ່ນໃນສະຫະລັດອາເມລິກາ ແລະ ຟີລິບປິນ (ຊຽງຍານ ແລະ ປໍ) , ຮາງວັນຊ່າງພາບດີເດັ່ນໃນສະຫະລັດອາເມລິກາ (ແມັດທິວ ມາຄາຣ໌), ລາງວັນຜູ້ກຳກັບດີເດັ່ນ ໃນມະຫະກຳຮູບເງົາ ສິດເຈສ ວີຊັນ (ສະເປນ) ແລະ ມະຫະກຳຮູບເງົາສາກົນລູສກາ (ປໍໂຕຣີໂກ) (ແມັດຕີ້ ໂດ), ແລະ ລາງວັນນະວັດຕະກຳດ້ານການເລົ່າເລື່ອງໃນສະຫະລັດອາເມລິກາ.
ສຳລັບເນື້ອໃນຂອງຮູບເງົາເລື່ອງນີ້ ແມ່ນເວົ້າເຖິງຄວາມດີ້ນຮົນຕໍ່ສູ້ຂອງຊາຍໄວຊະລາຄົນຜູ້ໜຶ່ງທີ່ອາໄສຢູ່ໃນເຂດຊົນນະບົດ ໃນຂະນະທີ່ລາວຕ້ອງໄດ້ປະເຊີນໜ້າກັບຄວາມເຈັບປວດເສຍໃຈ ແລະ ຄວາມບອບຊໍ້າທາງຈິດໃຈຈາກການສູນເສຍແມ່ຕັ້ງແຕ່ຕອນຍັງນ້ອຍ. ເມື່ອລາວໄດ້ຄົ້ນພົບວ່າຕົນຍັງມີໂອກາດທີ່ຈະເດີນທາງຍ້ອນເວລາໄດ້ ເພື່ອຈະໄດ້ກັບໄປທົບທວນຕົນເອງໃນສະໄໝທີ່ຍັງເປັນເດັກນ້ອຍຄືນອີກຄັ້ງ, ລາວໄດ້ພະຍາຍາມປັບປ່ຽນເສັ້ນເວລາ, ທັງພະຍາຍາມປ່ຽນແປງຊີວິດໄວເດັກ ກັບໄວປັດຈຸບັນຂອງຕົນເອງ ເພື່ອໃຫ້ເປັນຕາມສິ່ງທີ່ຫວັງໄວ້ ແຕ່ມັນກໍ່ຍິ່ງແປງໄປໃນຮູບແບບທີ່ບໍ່ຄາດຝັນມາກ່ອນ.
ທ່ານ ນາງ ແມັດຕີ້ ໂດ, ຜູ້ກຳກັບຮູບເງົາໄດ້ກ່າວໃນງານວ່າ “ຂ້າພະເຈົ້າຫວັງຢ່າງຍິ່ງວ່າ ຮູບເງົາເລື່ອງນີ້ຈະຖືກໃຈທ່ານຜູ້ຊົມພາຍໃນປະເທດຂອງພວກເຮົາ. ພວກເຮົາຮູ້ສຶກພາກພູມໃຈເປັນຢ່າງຍິ່ງທີ່ໄດ້ຮັບການຕອບຮັບເປັນຢ່າງດີໃນລະດັບສາກົນ, ແລະ ປັດຈຸບັນນີ້ ຮູບເງົາເລື່ອງນີ້ໄດ້ນໍາເຂົ້າມາສາຍໃນປະເທດບ້ານເກີດແລ້ວ ແລະ ພວກເຮົາຫວັງວ່າທ່ານຜູ້ຊົມຂອງພວກເຮົາຈະມີຄວາມພາກພູມໃຈ ແລະ ດີໃຈທີ່ໄດ້ໃຫ້ການສະໜັບສະໜູນສິລະປິນ ແລະ ຄວາມບັນເທີງຈາກປະເທດບ້ານເກີດຂອງພວກເຮົາ.”
ຮູບເງົາເລື່ອງ “ບໍ່ມີວັນຈາກ” ຈະເຂົ້າສາຍໃນໂຮງຮູບເງົາ ທີ່ ເມເຈີຊີນີເພລັກ (Major Cineplex) ແລະ ຊີຕີເພລັກດົງໂດກ (Cityplex Dongdok) ໃນວັນພະຫັດ(11 ກຸມພາ 2021)ທີ່ຈະມາເຖິງນີ້ ພ້ອມມີຄຳບັນລະຍາຍເປັນພາສາອັງກິດພ້ອມ.