ບໍລິສັດ Suzuki Motor Corp ປະກາດໂຈະການຜະລິດພາຫະນະຢູ່ສອງໂຮງງານໃນມຽນມາ. ເພື່ອຮັບປະກັນຄວາມປອດໄພຂອງພະນັກງານຂອງບໍລິສັດພາຍຫຼັງລັດຖະບານທະຫານມຽນມຢຶດອຳນາດຈາກລັດຖະບານພົນລະເຮືອນ.
Suzuki, ຜູ້ຜະລິດລົດຍົນຍີ່ປຸ່ນກ່າວໃນມື້ນີ້ ບໍລິສັດໄດ້ໂຈະການຜະລິດລົດຢູ່ໂຮງງານໃນເມືອງ Yangon ໃນມື້ວານນີ້ບ່ອນທີ່ໂຮງງານທັງສອງແຫ່ງມີພະນັກງານທັງ ໝົດ 400 ຄົນ, ບໍລິສັດ Suzuki ຍັງບໍ່ທັນຕັດສິນໃຈວ່າຈະສືບຕໍ່ຜະລິດລົດຢູ່ມຽນມາໃນເວລາໃດ.
ກອງທັບມຽນມາໄດ້ເຂົ້າຢຶດອຳນາດລັດຖະບານໃນມື້ວານນີ້. ໃນຂະນະທີ່ກັກຂັງ ທ່ານນາງ ອອງ ຊານ ຊູຈີທີ່ປຶກສາແຫ່ງລັດ ແລະ ຜູ້ນຳອື່ນໆ ແລະ ໄດ້ປະກາດພາວະສຸກເສີນທົ່ວປະເທດເປັນເວລາ 1 ປີໃນຂະນະທີ່ສັນຍາວ່າຈະມີການເລືອກຕັ້ງທົ່ວໄປຫຼັງຈາກນັ້ນ.
ກອງທັບມຽນມາອ້າງເຖິງເຫດຜົນຂອງການກໍ່ລັດຖະປະຫານຄັ້ງນີ້ ເກີດຈາກການສໍ້ໂກງໃນການເລືອກຕັ້ງເມື່ອເດືອນພະຈິກທີ່ຜ່ານມາ. ເຊິ່ງສົ່ງຜົນໃຫ້ພັກ NLD ຂອງທ່ານນາງ ອອງ ຊານ ຊູຈີ ໄດ້ຮັບໄຊຊະນະຢ່າງຖ້ວມລົ້ນ.
ຮຽບຮຽງຂ່າວ: ພຸດສະດີ