ຮອງເຈົ້າແຂວງບໍ່ແກ້ວ ໄດ້ສັ່ງປິດເທດສະບານເມືອງຕົ້ນເຜິ້ງ ເປັນຄັ້ງທີ 2 ຫຼັງຈາກມີຂ່າວວ່າແຮງງານຈີນຕິດເຊື້ອພະຍາດໂຄວິດ-19.
ອີງຕາມການລາຍງານຈາກ ໜັງສືພິມວຽງຈັນທາມ ໃຫ້ຮູ້ວ່າ: ຜູ້ຕິດເຊື້ອຄົນນີ້ ມີອາການໄຂ້ ແລະ ໄດ້ເຂົ້າປິ່ນປົວຢູ່ໂຮງໝໍເມືອງຕົ້ນເຜິ້ງ ໃນວັນທີ 8 ມັງກອນ ປີ 2021 ທີ່ຜ່ານມາ ຈາກນັ້ນລາວໄດ້ຖືກຍົກຍ້າຍໄປໂຮງໝໍ ແຂວງບໍ່ແກ້ວ ກ່ອນທີ່ຈະຖືກຍ້າຍໄປປະເທດຈີນ.
ສ່ວນຜູ້ໃກ້ຊິດ ແລະ ບັນດາພະນັກງານແພດທີ່ໄດ້ມີການພົວພັນກັບຜູ້ຕິດເຊື້ອ, ແມ່ນຈະຖືກກັກໂຕຢ່າງເຂັ້ມງວດ.
ການປິດເທດສະບານເມືອງຕົ້ນເຜີ້ງ ແລະ ເຂດເສດຖະກິດພິເສດສາມຫຼ່ຽມຄຳ (ເປັນເວລາ 14 ວັນ) ເລີ່ມແຕ່ວັນທີ 12 ມັງກອນ ເຖິງ 25 ມັງກອນ 2021 ໂດຍມີຂໍ້ຈຳກັດໃນການເດີນທາງ, ຍົກເວັ້ນການເດີນທາງທີ່ ຈຳເປັນເຊັ່ນ: ໄປໂຮງໝໍ, ໄປໂຮງຮຽນ ແລະ ຊື້ເຄື່ອງຂອງຕ່າງໆ.
ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ແຫ່ງຊາດ ໄດ້ເລີ່ມຕິດຕາມການຕິດຕໍ່ພົວພັນກັບເຈົ້າໜ້າທີ່ລາວ ແລະຈີນ, ໃນຂະນະທີ່ ອຳນາດການປົກຄອງແຂວງໄດ້ຮັບຄຳສັ່ງໃຫ້ເກັບຕົວຢ່າງຈາກຜູ້ໃດທີ່ມີອາການຄ້າຍຄືກັບພະຍາດໂຄວິດ-19.
ຕາມການລາຍງານຈາກຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ແຫ່ງຊາດ ລະບຸວ່າ: ໃນລາວ ມີຈຳນວນ 96,939 ຄົນ ທີ່ໄດ້ຮັບການກວດຫາເຊື້ອໄວຣັສ ໂຄວິດ-19 ເຊິ່ງໃນນັ້ນມີຜູ້ຕິດເຊື້ອ ຈຳນວນ 41 ຄົນ.