ສຳນັກຂ່າວຕ່າງປະເທດ ລາຍງານຈາກຊາຍແດນໄທ-ມຽນມາ ກົງກັນຂ້າມກັບເມືອງທ່າສອງຍາງ ຈັງຫວັດຕາກ ວ່າ ຫຼັງຈາກທີ່ລັດຖະບານມຽນມາມີຄຳສັ່ງໃຫ້ປົດຜູ້ບັນຊາການທະຫານ 3 ທ່ານ ອອກຈາກຕໍາແໜ່ງໃນຂໍ້ຫາສົມຮູ້ຮ່ວມຄິດກັບຊາວຕ່າງຊາດສ້າງຄວາມເສຍຫາຍໃຫ້ກັບປະເທດ ເມື່ອ 2 ວັນທີ່ຜ່ານມາ ສົ່ງຜົນກະທົບຕໍ່ສະຖານະການຊາຍແດນໃນມຽນມາກ່ຽວກັບການແຜ່ລະບາດຂອງໂຄວິດ-19 ແລະ ຍັງສຸ່ມສ່ຽງເກີດການປະທະລະຫວ່າງທະຫານຝ່າຍລັດຖະບານມຽນມາກັບກອງກຳລັງຕິດອາວຸດ ພາຍໃຕ້ການນຳຂອງນາຍທະຫານ 3 ທ່ານທີ່ຫາກໍ່ຖືກປົດອອກຈາກຕໍາແໜ່ງ.
ຫຼ້າສຸດ, ກອງກຳລັງທະຫານມຽນມາໄດ້ເປີດສາກໂຈມຕີກອງກຳລັງຊົນກຸ່ມນ້ອຍຕິດອາວຸດຫຼັງໝູ່ບ້ານ Ser Kaw Der ເຂດ 5 ໃນລັດກະຫຼ່ຽງ ແຂວງຜາອັນ ປະເທດມຽນມາກົງກັນຂ້າມກັບເມືອງທ່າສອງຢາງ ຈັງຫວັດຕາກ ທັງສອງຝ່າຍໄດ້ເກີດການປະທະກັນຢ່າງຮຸນແຮງໂດຍໃຊ້ອາວຸດໜັກໂຈມຕີກັນ ສຽງປືນໃຫຍ່ດັງຮອດຝັ່ງໄທ ເຮັດໃຫ້ປະຊາຊົນຊົນເຜົ່າກະຫຼ່ຽງ 3 ໝູ່ບ້ານ ຈຳນວນ 80 ຄອບຄົວ ລວມ 588 ຄົນ ໜີອອກຈາກໝູ່ບ້ານຂອງຕົວເອງ ໄປອາໃສຢູ່ປ່າ ແລະ ໃນຖໍ້າ ລີ້ລູກປືນໃນຂຸມຫຼົບໄພທ່າມກາງສະພາບອາກາດທີ່ໜາວເຢັນ ເຊິ່ງບໍລິເວນດັ່ງກ່າວຢູ່ໃກ້ຊາຍແດນໄທ.
ໃນຂະນະທີ່ ພົນໂທອະທິເຊດ ຊື່ສັດ ຜູ້ບັນຊາການກອງທັບເຂດ 3 ກ່າວວ່າ ການປົດຜູ້ນຳລະດັບສູງຂອງກອງທັບຊົນກຸ່ມນ້ອຍ ເຊື່ອວ່າຍັງບໍ່ສາມາດນຳໄປສູ່ຄວາມຮຸນແຮງ ແລະ ຍັງບໍ່ສົງຜົນກະທົບຕໍ່ໄທ ເນື່ອງຈາກເປັນຄວາມຂັດແຍ້ງດ້ານຜົນປະໂຫຍດຫຼາຍກວ່າ ແລະ ຖືວ່າເປັນເລື່ອງພາຍໃນປະເທດມຽນມາ.
ຮຽບຮຽງຂ່າວ: ພຸດສະດີ