ສຳນັກຂ່າວຕ່າງປະເທດ ລາຍງານວ່າ ທ່ານ ແຈັກໝ່າ ມະຫາເສດຖີນັກທຸລະກິດຈີນ ແລະ ຜູ້ກໍ່ຕັ້ງບໍລິສັດ ອາລີບາບາ ບໍ່ປະກົດຕົວຕໍ່ສາທາລະນະເປັນເເວລາ ເດືອນແລ້ວ ຫຼັງຈາກທີ່ເຂົາໄດ້ກ່າວທ້າທາຍລະບຽບການເງິນທະນາຄານຂອງປະເທດ ຈົນເຮັດໃຫ້ລັດຖະບານຈີນຂັດຂວາງການເປີດຂາຍຫຸ້ນຄັ້ງທຳອິດຂອງ ບໍລິສັດ Ant Group ເຊິ່ງເປັນໜຶ່ງໃນບໍລິສັດຂອງແຈັກໝ່າ.
ກ່ອນໜ້ານີ້ສຳນັກຂ່າວ Bloomberg ໄດ້ອ້າງແຫຼ່ງຂ່າວທີ່ຄຸ້ນເຄີຍກ່ຽວກັບເລື່ອງນີ້ວ່າ ລັດຖະບານຈີນແນະນຳໃຫ້ແຈັກໝ່າ ຢູ່ໃນປະເທດຈີນຢ່າງໜ້ອຍຈົນເຖິງເດືອນທັນວາ 2020.
ຈາກເຫດການທີ່ເກີດຂຶ້ນດັ່ງກ່າວເຮັດໃຫ້ສັງຄົມເຊື່ອວ່າຕອນນີ້ ແຈັກໝ່າ ກຳລັງຕົກຢູ່ໃນຄວາມຫຍຸ້ງຍາກ.
ທັງນີ້,ນອກຈາກເຂົາຈະຫາຍຕົວໄປຈາກສາທາລະນະແລ້ວ ຈາກການລາຍງານຂອງສຳນັກຂ່າວ Bloomberg ທ່ານ ແຈັກ ໝ່າ ຕ້ອງເສຍເງິນ 11,000 ລ້ານໂດລາ ນັບຕັ້ງແຕ່ທ້າຍເດືອນທັນວາ 2020 ເຊິ່ງຕອນນີ້ມູນຄ່າຊັບສິນຂອງເຂົາຢູ່ທີ່ 50,000 ລ້ານໂດລາ. ເຊິ່ງກ່ອນໜ້ານີ້ແຈັກໝ່າມີຊັບສິນສູງເຖິງ 61,700 ລ້ານໂດລາ.
ຊັບສິນທີ່ຫຼດລົງໄດ້ເກີດຂຶ້ນໃນຊ່ວງທີ່ ແຈັກໝ່າ ຖືກລັດຖະບານຈີນກວດສອບຢ່າງໜັກເລື່ອງການເຮັດທຸລະກິດຜູກຂາດ ໂດຍສະເພາະແມ່ນການທີ່ລັດຖະບານຈີນສັ່ງໂຈະການເປີດຂາຍຫຸ້ນຄັ້ງທຳອິດຂອງ ບໍລິສັດ Ant Group ທີ່ແຈັກໝ່າໄດ້ສ້າງຂຶ້ນໃຫ້ກາຍເປັນຟິນເທດຊັ້ນນຳຂອງໂລກ ເຊິ່ງຫາກຂາຍ IPO ສຳເລັດ ແຈັກໝ່າ ອາດຈະກາຍເປັນຄົນລວຍທີ່ສຸດໃນອາຊີທັນທີ.
ຮຽບຮຽງຂ່າວ: ພຸດສະດີ