ການສ້ອມແປງໃຫຍ່ເຮືອບິນ ແອບັສ໌ 320 ຄັ້ງທຳອິດ ໂດຍພະແນກວິສະວະກຳ ແລະ ສ້ອມບຳລຸງເຮືອບິນ ຂອງລັດວິສາຫະກິດການບິນລາວ.
ຕາມການລາຍງານຂອງ ການບິນລາວ ໃຫ້ຮູ້ວ່າ ພາຍໃຕ້ການຊີ້ນຳນຳພາ ຂອງຄະນະພັກຄະນະອຳນວຍການລັດວິສາຫະກິດການບິນລາວ, ແລະໂດຍໄດ້ຮັບການຢັ້ງຢືນ ອະນຸມັດຈາກກົມການບິນພົນລະເຮືອນລາວ AMO Approved Maintenance Organization ຕາມມາດຕະຖານຂອງອົງການການບິນພົນລະເຮືອນສາກົນ ICAO International Civil Aviation Organization, ລັດວິສາຫະກິດການບິນລາວ ໄດ້ດຳເນີນການສ້ອມບຳລຸງຮັກສາຕາມຮອບວຽນໃຫຍ່ (ຕາມກຳນົດ 8 ປີ ພາຍຫຼັງອອກຈາກໂຮງງານຜະລິດ C4 Check) ເຮືອບິນຊະນິດອາຍພົ່ນ ແອບັສ໌ 320 ໂດຍພະແນກວິສະວະກຳສ້ອມບຳລຸງເຮືອບິນ ດ້ວຍຕົນເອງເປັນຄັ້ງທຳອິດ ໃນປະຫວັດສາດຂອງການສ້າງຕັ້ງສາຍການບິນແຫ່ງຊາດລາວ.
ລັດວິສາຫະກິດການບິນລາວ ໄດ້ມີແຜນໃນການພັດທະນາຄວາມສາມາດເພື່ອໃຫ້ໄດ້ການຮອງຮັບ ຈາກກົມການບິນພົນລະເຮືອນຂອງ ຢູໂຣບ ພາກ 145 (EASA 145 European Aviation Safety Agency part 145), ທັງນີ້ກໍ່ເພື່ອສ້າງລາຍຮັບເພີ້ມ ໂດຍການດຶງດູດເອົາເຮືອບິນຂອງຕ່າງປະເທດມາສ້ອມບຳລຸງຮັກສາທີ່ອູ່ສ້ອມແປງຂອງ ລັດວິສາຫະກິດການບິນລາວ ແລະ ກະກຽມໃສ່ການຕໍ່ໃບຢັ້ງຢືນເທື່ອທີ 3 ຕາມມາດຕະຖານຄວາມປອດໄພການບິນ ຂອງ ສະມາຄົມຂົນສົ່ງທາງອາກາດສາກົນ (IOSA- IATA Oversign Safety Audit) ເພື່ອສືບຕໍ່ຮັກສາການເປັນສະມາຊິກຂອງ IATA (International Air Transport Association) ໃຫ້ໝັ້ນຄົງ.
ຮຽບຮຽງຂ່າວ: ພຸດສະດີ