ຄະນະກຳມາທິການອີຢູສະເໜີໃຫ້ສະມາຊິກທັງ 27 ປະເທດ ເລີ່ມແຄັມເປນແຈກຢາຍວັກຊີນປ້ອງກັນໂຄວິດ-19 ໃນວັນດຽວກັນ ເພື່ອເປັນສັນຍາລັກຂອງ “ຄວາມສາມັກຄີ” ໃນການຕໍ່ສູ້ກັບວິກິດດ້ານສາທາລະນະສຸກ.
ສຳນັກຂ່າວຕ່າງປະເທດລາຍງານຈາກນະຄອນຫຼວງບຣັສເຊລ ປະເທດເບລຢຽມ ເມື່ອວັນທີ 17 ທັນວາ 2020 ວ່າ ທ່ານ ນາງ ອົວຊູລາ ຟອນ ແດຮ໌ ເລເຢນ ປະທານຄະນະກຳມາທິການເອີຣົບ ເຊິ່ງເປັນອົງກອນຝ່າຍບໍລິຫານຂອງສະຫະພັນເອີຣົບ (ອີຢູ) ໄດ້ກ່າວຕໍ່ທີ່ປະຊຸມສະພາເອີຣົບ ເມື່ອວັນພຸດທີ່ຜ່ານມາ ກ່ຽວກັບຄວາມຄືບໜ້າດ້ານນະໂຍບາຍປ້ອງກັນເຊື້ອໄວຣັສໂຄໂຣນາສາຍພັນໃໝ່ໃນລະດັບພາກພື້ນ ວ່າປະຊາຊົນຢ່າງໜ້ອຍ 70% ໃນທະວີບເອີຣົບ ຕ້ອງໄດ້ຮັບວັກຊີນປ້ອງກັນ ເພື່ອໃຫ້ພາລະກິດຕອບສະໜອງຕໍ່ວິກິດດ້ານສາທາລະນະສຸກຄັ້ງນີ້ ດຳເນີນໄປຢ່າງມີປະສິດຕິພາບທີ່ສຸດ.
ຕົວເລກດັ່ງກ່າວຖືເປັນຈຳນວນມະຫາສານ ເມື່ອທຽບກັບຈຳນວນປະຊາກອນໃນທະວີບເອີຣົບ ເຊິ່ງມີເກືອບ 450 ລ້ານຄົນ ດ້ວຍເຫດຜົນນີ້ ທ່ານ ນາງ ຟອນ ແດຣ໌ ເລເຢນ ຈຶ່ງຂໍເຊີນຊວນສະມາຊິກອີຢູທັງ 27 ປະເທດ ໃຫ້ເລີ່ມສັກວັກຊີນໂຄວິດໃນວັນດຽວກັນ ເພື່ອເປັນສັນຍາລັກທີ່ສະແດງເຖິງຄວາມສາມັກຄີພາຍໃນພາກພື້ນ.
ອົງການຢາເອີຣົບ (EMU), ເຊິ່ງມີສິດອຳນາດໂດຍກົງໃນການກວດກາ, ອະນຸມັດ ແລະ ແຈກຢາຍຜະລິດຕະພັນດ້ານການແພດ ແລະ ສາທາລະນະສຸກໃນພາກພື້ນ. ກອງປະຊຸມມີກຳນົດໃນວັນທີ 21 ທັນວາ ນີ້, ເພື່ອພິຈາລະນາອອກໃບຢັ້ງຢືນ “ຢາໂຄສະນາ” ສຳລັບຢາວັກຊິນ ໂຄວິດ-19 ທີ່ຜະລິດໂດຍ US Pfizer ຮ່ວມກັບບໍລິສັດຊີວະວິທະຍາເຢຍລະມັນ.
ຮຽບຮຽງຂ່າວ: ພຸດສະດີ