ຊຶ້ງນໍ້າໃຈພົນລະເມືອງດີເຂົ້າຊ່ວຍຊີວິດຄົນເຈັບເຊິ່ງເປັນຍິງສອງຄົນ ພ້ອມເດັກນ້ອຍຊາຍອາຍຸປະມານປີປາຍ ກຳລັງນອນໝົດສະຕິຈາກອຸບັດເຫດລົດຈັກຕຳກັນມື້ວານນີ້ ທີ່ເຂດໄຟແດງໜອງບຶກ-ດົງໂດກ.
ຈາກການບອກເລົ່າຂອງທ່ານ ຄຳຫຼ້າ ພອນອີນສານ, ພົນລະເມືອງດີຜູ້ເຂົ້າຊ່ວຍປໍ້າຫົວໃຈຄົນເຈັບຮູ້ວ່າ: ເຫດເກີດປະມານ 4:00 ຫາ 5:00 ໂມງແລງມື້ວານນີ້ ທີ່ເຂດໄຟແດງໜອງບຶກ-ດົງໂດກ, ນະຄອນຫຼວງວຽງຈັນ ຂະນະທີ່ກຳລັງເດີນທາງກັບຈາກວຽກສ່ວນຕົວ ພໍມາເຖິງຈຸດເກີດເຫດກໍພົບເຫັນຍິງສອງຄົນນອນໝົດສະຕິ ແຕ່ທີ່ໜ້າເສົ້າໃຈກໍແມ່ນເດັກນ້ອຍປະມານໜຶ່ງປີກວ່າຢູ່ໃນອາການດຽວກັນນອນຢູ່ກາງຖະໜົນໂຊກດີທີ່ຫົວໃຈຂອງເດັກຍັງເຕັ້ນຢູ່ ເຊິ່ງມີອີກຄົນກຳລັງຊ່ວຍປໍ້າຫົວໃຈໃຫ້ແມ່ຍິງຄົນໜຶ່ງແຕ່ບໍ່ໄດ້ຜົນ.
ພົນລະເມືອງດີທ່ານນີ້ຈິ່ງຕັດສິນໃຈເຂົ້າໄປຊ່ວຍປໍ້າຫົວໃຈໃຫ້ແມ່ຍິງອີກຄົນທີ່ກຳລັງສະຫຼົບຢູ່ນັ້ນ ຈົນສາມາດຊ່ວຍໃຫ້ຫົວໃຈກັບມາເຕັ້ນຄືເກົ່າ, ຫຼາຍຄົນຢາກຊ່ວຍເອົາເດັກນ້ອຍໄປໂຮງໝໍກ່ອນ ແຕ່ເນື່ອງຈາກແມ່ຂອງເດັກນ້ອຍຍັງບໍ່ຟື້ນ ຈິ່ງບໍ່ສາມາດນຳເດັກໄປໂຮງໝໍໄດ້.
“ຂ້າພະເຈົ້າໄດ້ໂທຫາກູ້ໄພ 1624 ປະມານ 20 ນາທີກູ້ໄພກໍມາເຖິງ ພ້ອມຊ່ວຍຄົນເຈັບໄປໂຮງໝໍ ແຕ່ຍັງບໍ່ຮູ້ວ່າອາການຂອງຄົນເຈັບຕອນນີ້ເປັນແນວໃດ ພຽງແຕ່ພາວັນນາໃຫ້ເຂົາເຈົ້າປອດໄພທຸກຄົນ.” ທ່ານ ຄຳຫຼ້າ ພອນອີນສານ ກ່າວຕໍ່ທີມງານລາວໂພສ.
ພົນລະເມືອງດີທ່ານນີ້ກ່າວຕື່ມວ່າ: ຢາກຮຽກຮ້ອງໃຫ້ທຸກຄົນມີສະຕິໃນການຂັບຂີ່ຕາມທ້ອງຖະໜົນ ໂດຍສະເພາະຄວນສວມຫມວກນີລະໄພທຸກຄັ້ງທີ່ຂັບຂີ່ລົດຈັກເພື່ອຄວາມປອດໄພເບື້ອງຕົ້ນ, ກໍລະນີມີເຫດການບໍ່ຄາດຝັນເກີດຂຶ້ນກໍຢາກຮຽກຮ້ອງໃຫ້ຄົນທີ່ເຫັນເຫດການເຂົ້າຊ່ວຍປະຖົມພະຍາບານຂັ້ນຕົ້ນເທົ່າທີ່ສາມາດເຮັດໄດ້, ບໍ່ຄວນຢ້ານກົວເກີນເຫດ ຫຼື ຮີບຮ້ອນໂທຫາກູ້ໄພກໍໄດ້.