ປ້ອງກັນຄວາມສະຫງົບນະຄອນຫຼວງວຽງຈັນ ລາຍງານໃຫ້ຮູ້ວ່າ ໃນກອງປະຊຸມສະຫຼຸບວຽກງານປ້ອງກັນໂຄງການກໍ່ສ້າງທາງລົດໄຟລາວ-ຈີນ ໄລຍະ 6 ເດືອນທ້າຍປີ 2020 ແລະ ວາງທິດທາງ 6 ເດືອນ ຕົ້ນ ປີ 2021 ທີ່ຈັດຂຶ້ນໃນຕອນເຊົ້າຂອງວັນທີ 27 ພະຈິກ 2020 ຢູ່ ຫ້ອງປະຊຸມກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ, ໄລຍະ 6 ເດືອນຜ່ານມາ ກໍາລັງປ້ອງກັນ ແລະ ພາກສ່ວນກ່ຽວຂ້ອງໃນການຮັກສາຄວາມສະຫງົບ ສາມາດກັກຕົວຜູ້ຖືກຫາໄດ້ 4 ຄົນ.
ພັທ ສົມພຽງ ສຸກປະເສີດ ຫົວໜ້າຫ້ອງການ ກອງບັນຊາການ ປກສ ນວ ໄດ້ຂຶ້ນຜ່ານບົດສະຫຼຸບວຽກ ງານປ້ອງກັນໂຄງການກໍ່ສ້າງເສັ້ນທາງລົດໄຟລາວ-ຈີນ ໄລຍະ 6 ເດືອນທ້າຍປີ 2020 ແລະ ວາງທິດທາງແຜນການ 6 ເດືອນຕົ້ນປີ 2021 ວັນທີ 27 ພະຈິກ 2020 ໃຫ້ຮູ້ວ່າ: ໄລຍະ 6 ເດືອນຜ່ານມາ ກໍາລັງປ້ອງກັນ ແລະ ພາກສ່ວນກ່ຽວຂ້ອງໃນການຮັກສາຄວາມສະຫງົບ ສາມາດກັກຕົວຜູ້ຖືກຫາໄດ້ 4 ຄົນ, ໃນນີ້, ມີຄ້າຂາຍຢາເສບຕິດ 1 ຄົນ, ລັກຊັບ 03 ຄົນ, ກວດພົບຂອງກາງຢາບ້າ 119 ເມັດ, ເຫຼັກສໍາເລັດຮູບ 4 ທ່ອນນໍ້າໜັກ 32 ກິໂລ, ເຫຼັກຈັບລາງລົດໄຟ 4 ອັນ; ລົງກວດກາຮ້ານຮັບຊື້ເຫຼັກເສດ1 ຮ້ານ ຢູ່ບ້ານໜອງພະຍາພົບເຫັນເຫຼັກທີ່ຄົນລັກມາຂາຍມີຄື: ເຫຼັກແຜ່ນຈໍານວນ 30 ແຜ່ນ, ເຫຼັກກຽວໃຫຍ່ 7 ໂຕ, ເຫຼັກກຽວກາງ 262 ໂຕ, ເຫຼັກກຽວນ້ອຍ 14 ໂຕ.
ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນວ ໄດ້ເນັ້ນໃຫ້ກໍາລັງ ປກສ ທີ່ເຮັດວຽກງານປ້ອງກັນດັ່ງກ່າວ ໂດຍສະເພາະບັນດາ ປກສ ເມືອງ, ປກສ ກຸ່ມ ທີ່ຖືກແຕ່ງຕັ້ງຮັບຜິດຊອບປ້ອງກັນໂຄງການດັ່ງກ່າວ ຕ້ອງໄດ້ເອົາໃຈໃສ່ ແລະ ເຂັ້ມງວດໃນການປ້ອງກັນໃຫ້ຫຼາຍຂຶ້ນກວ່າເກົ່າ ເພື່ອຮັກສາຊີວິດ, ຊັບສິນ ແລະ ອຸປະກອນໃນການກໍ່ສ້າງ ບໍ່ໃຫ້ຄົນບໍ່ດີມາລັກເອົາໄດ້ ເປັນຕົ້ນແມ່ນ ເຫຼັກທີ່ນໍາໃຊ້ເຂົ້າໃນການກໍ່ສ້າງ, ໃນນີ້, ຕ້ອງປະສານສົມທົບກັບບັນດາບ້ານ ໃຫ້ມີສ່ວນຮ່ວມເປັນເຈົ້າການໃນການປ້ອງກັນ ແລະ ລົງເຮັດບົດບັນທຶກກັບບັນດາຮ້ານຮັບຊື້ເຫຼັກເສດ, ຫ້າມຮັບຊື້ອຸປະກອນກໍ່ສ້າງເສັ້ນທາງລົດໄຟ; ພ້ອມນີ້ ໃຫ້ສ່ອງແສງລາຍງານສະພາບການໃຫ້ເປັນປົກກະຕິ ເພື່ອເກັບກໍາສະພາບການຕ່າງໆ ຖ້າຫາກພົບເຫັນກໍລະນີລັກອຸປະກອນໃນການກໍ່ສ້າງເສັ້ນທາງລົດໄຟທຸກປະເພດ ຕ້ອງດໍາເນີນຄະດີຕໍ່ຜູ້ກະທໍາຜິດຢ່າງເດັດຂາດ ເພື່ອຮັບປະກັນບໍ່ໃຫ້ໂຄງການກໍ່ສ້າງເສັ້ນທາງລົດໄຟລາວ-ຈີນຖືກລັກ ແລະ ຍັກຢອກເອົາຊັບໄປໄດ້ ທັງຮັບປະກັນໃຫ້ກໍາມະກອນ ແລະ ວິຊາການມີຄວາມປອດໄພຫຼາຍຂຶ້ນກວ່າເກົ່າ.
ຮຽບຮຽງຂ່າວ: ພຸດສະດີ