ລັດຖະບານ ແຫ່ງ ຣາຊະອານາຈັກໄທ ໄດ້ໃຫ້ການຊ່ວຍເຫຼືອເງິນ ຈໍານວນ 200.000 ບາດ ໃຫ້ລັດຖະ ບານ ແຫ່ງ ສປປ ລາວ, ເພື່ອ ເປັນການປະກອບສ່ວນ ຊື້ເຄື່ອງຄົວເຮືອນທີ່ຈຳເປັນ ແລະ ເຂົ້າສານອາຫານ ຈໍານວນໜຶ່ງໄປຊ່ວຍເຫຼືອປະຊາຊົນຜູ້ປະສົບໄພພິບັດນໍ້າຖ້ວມຢູ່ບັນດາແຂວງພາກກາງ ແລະ ພາກໃຕ້ຂອງລາວ.
ໜັງສືພິມວຽງຈັນທາມ ລາຍງານວ່າ ພິທີມອບ-ຮັບເງິນຊ່ວຍເຫຼືອດັ່ງກ່າວ ໄດ້ຈັດຂຶ້ນວັນທີ 17 ພະຈິກ 2020 ຢູ່ນະຄອນຫຼວງວຽງຈັນ, ລະຫວ່າງ ຕາງໜ້າໃຫ້ລັດຖະບານ ແຫ່ງ ສປປ ລາວ ໂດຍ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ທ່ານ ຄຳແພງ ໄຊສົມແພງ ແລະ ຕາງໜ້າໃຫ້ຣາຊະອານາຈັກໄທ ໂດຍອຸປະທູດຮັກສາການສະຖານເອກອັກຄະຣາຊະທູດ ແຫ່ງຣາຊະອານາຈັກໄທ ປະຈໍາລາວ, ທ່ານ ນາງ ອຸຣະວະດີ, ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ໃນໂອກາດດັ່ງກ່າວ ທ່ານ ຄຳແພງ ໄຊສົມແພງ ໄດ້ສະແດງຄວາມຂອບ ໃຈເປັນຢ່າງສູງຕໍ່ລັດຖະບານ ແລະ ປະຊາຊົນ ແຫ່ງ ຣາຊະອາ ນາຈັກໄທທ່ີ່ໄດ້ປະກອບສ່ວນຊ່ວຍເຫຼືອປະຊາຊົນຜູ້ປະສົບໄພໃນຄັ້ງນີ້ ແລະ ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືຊ່ວຍເຫຼືອຊຶ່ງກັນ ແລະ ກັນ ລະຫວ່າງ ລາວ-ໄທ ໃຫ້ນັບມື້ຂະຫຍາຍຕົວຍິ່ງໆຂຶ້ນ.
ຮຽບຮຽງຂ່າວ: ພຸດສະດີ