ສຳນັກຂ່າວສານປະເທດລາວ ລາຍງານ ອີງຕາມຂ່າວສານ ຫວຽດນາມ, ວັນທີ 2 ເດືອນພະຈິກ, ລັດຖະມົນຕີ ການເງິນກຸ່ມບັນດາ ພື້ນຖານ ເສດ ຖະກິດ ພັດທະນາ ເກີດໃໝ່ ແຖວໜ້າໃນໂລກ (G20) ຈະພິຈາລະນາ ເອກະພາບລົບລ້າງໜີ້ ບາງສ່ວນໃຫ້ແກ່ປະເທດທຸກຍາກ ເພື່ອຊ່ວຍປະເທດດັ່ງກ່າວ ໃນການປະຕິບັດ ມາດຕະການຕ່າງໆ ເພື່ອຮັບມືກັບ ພະຍາດໂຄວິດ-19. ບັນດາ ລັດຖະມົນຕິ ການເງິນ ແລະ ຜູ້ວ່າການ ທະນາຄານກາງ G20 ພວມມຸ່ງໄປສູ່ ການບັນລຸຂໍ້ຕົກລົງ ໃນໄລຍະດຳເນີນ ກອງປະຊຸມ ຜ່ານວີດີໂອໃນວັນທີ 13 ພະຈິກ 2020 ນີ້.
ຕາມແຜນການ ດັ່ງກ່າວ ໜີ້ຕົ້ນທຶນ ແລະ ອັດຕາດອກເບ້ຍໃໝ່ ຈະມີການຍົກເວັ້ນ ໂດຍອີງຕາມເງື່ອນໄຂ ເສດຖະກິດ ຂອງ ບັນດາ ປະເທດ ທ່ີກູ້ຢືມ. ບັນດາເຈົ້າໜີ້ ພາກເອກະຊົນ ອາດຈະຮຽກຮ້ອງໃຫ້ເຂົ້າຮ່ວມໃນໂຄງການດັ່ງກ່າວ. ກອງປະຊຸມ ຜ່ານວີດີໂອນີ້ ຈະຈັດຂຶ້ນກ່ອນກອງປະຊຸມສຸດຍອດ G 20, ຄາດວ່າ ຈະຈັດຂຶ້ນໃນວັນທີ 21 ແລະ 22 ພະຈິກ 2020 ຕາມຮູບແບບວີດີໂອ.
ເຖິງຢ່າງໃດກໍຕາມ, ທ່ານດາວີດ ມານພັສ (David Malpas) ປະທານທະນາຄານໂລກ ໃຫ້ຮູ້ວ່າ ການຫລຸດຜ່ອນ ບ້ວງໜີ້ ໃຫ້ແກ່ ບັນດາ ປະເທດທຸກຍາກ ກວມເອົາຈຳນວນໜ້ອຍ ເນື່ອງຈາກ ບໍ່ແມ່ນເຈົ້າໜີ້ ທຸກໆປະເທດ ເຂົ້າຮ່ວມ ໃນກອງປະຊຸມນີ້.
ຄາດວ່າຈະມີ 43 ປະເທດ ໃນຈຳນວນ 73 ປະເທດ ທ່ີໄດ້ຮັບ ຜົນປະໂຫຍດ ປະມານ 5 ຕື້ໂດລາ ສະຫະ ລັດ ຈາກ ການລີ່ເລີ່ມໂຈະການຊຳລະໜີ້(DSSI) ເພື່ອສະ ໜັບສະໜູນ ບັນດາ ບ້ວງເງິນ ສະຫວັດດີການ ສັງຄົມ, ສາທາລະນະສຸກ ແລະ ເສດຖະກິດ ເພື່ອຮັບມືກັບ ພະຍາດໂຄວິດ-19. ໃນຂະນະທ່ີ ລະດັບ ຕົວເລກທ່ີກຳນົດໄວ້ ແມ່ນ 8 ຕື້ ຫາ11 ຕື້ໂດລາສະຫະລັດ.
ຮຽບຮຽງຂ່າວ: ພຸດສະດີ