ເວັບໄຊ dailynews ລາຍງານ ໃນວັນທີ 12 ຕຸລາ 2020ວ່າ ສົມເດັດ ຮຸນເຊນ ນາຍົກລັດຖະມົນຕີກຳປູເຈຍ ພ້ອມທ່ານ ຫວັງ ອີ້ ລັດຖະມົນຕີວ່າການກະຊວງການຕ່າງປະເທດຈີນ ເປັນສັກຂີພະຍານໃນພິທີລົງນາມໃນສັນຍາການຄ້າເສລີ (FTA) ລະຫວ່າງສອງປະເທດ. ທີ່ທຳນຽບລັດຖະບານໃນນະຄອນພະນົມເປນ ເມື່ອວັນຈັນທີ່ຜ່ານມາ ໂດຍພິທີດັ່ງກ່າວໄດ້ດຳເນີນໃນມື້ທຳອິດທີ່ທ່ານ ຫວັງ ອີ້ ກຳລັງປະຕິບັດໜ້າທີ່ຢູ່ກຳປູເຈຍ.
ການບັນລຸສັນຍາການຄ້າເສລີ (FTA) ຄັ້ງນີ້ໃຊ້ເວລາໄວກວ່າທີ່ຫຼາຍຝ່າຍຄາດການໄວ້ ເນື່ອງຈາກຈີນ ແລະ ກຳປູເຈຍ ໄດ້ມີການເປີດການເຈລະຈາຢ່າງເປັນທາງການໃນທ້າຍປີທີ່ຜ່ານມາ, ຂໍ້ຕົກລົງສ່ວນ ໃຫຍ່ບໍ່ໄດ້ຖືກເປີດເຜີຍເນື້ອຫາສຳຄັນຂອງຂໍ້ຕົກລົງ ແລະ ຍັງບໍ່ມີການອະທິບາຍວ່າສັນຍາສະບັບນີ້ ມີການຊໍ້າຊ້ອນກັບຂໍ້ຕົກລົງທີ່ຈີນ ແລະ ສະມາຄົມອາຊຽນມີຄວາມຮ່ວມມືກັນ ຫຼື ບໍ່.
ຢ່າງໃດກໍ່ຕາມ, ໄດ້ມີການວິເຄາະວ່າ ການເປີດການຄ້າເສລີກັບຈີນແມ່ນຈະຊ່ວຍບັນເທົາແຮງກົດດັນໃຫ້ແກ່ກຳປູເຈຍໄດ້ ພາຍຫຼັງທີ່ຖືກສະຫະພາບເອີຣົບ (EU) ລະງັບສິດພິເສດທາງການຄ້າ ເມື່ອປີທີ່ຜ່ານມາ ຈາກປະເດັນຄວາມຂັດແຍ້ງດ້ານສິດທິມະນຸດ ແລະ ການຍຸບພັກກູ້ຊາດກຳປູເຈຍ (CNRP) ເຊິ່ງເປັນພັກການນຳຝ່າຍຄ້ານ ກ່ອນເຖິງການເລືອກຕັ້ງທົ່ວໄປ ເມື່ອເດືອນ ກໍລະກົດ 2018.
ຮຽບຮຽງຂ່າວ: ພຸດສະດີ