ສືບເນື່ອງມາຈາກຮ່ອງຄວາມກົດດັນອາກາດຕໍ່າທີ່ພາດຜ່ານເຂດພາກໃຕ້ ເຊິ່ງເຮັດໃຫ້ມີຝົນຕົກ ນັບຕັ້ງແຕ່ວັນທີ 5 ຕຸລາ ເປັນຕົ້ນມາ ປັດຈຸບັນ, ລະດັບແມ່ນໍ້າເຊບັ້ງຫຽງ ເພີ່ມສູງຂຶ້ນເປັນ 15,25 ແມັດ ເຊິ່ງກາຍເຂດອັນຕະລາຍແລ້ວ ນໍ້າໄດ້ໄຫຼເຂົ້າຖ້ວມເຮືອນປະຊາຊົນ ລວມມເຖິງເນື້ອທີ່ນາຂອງປະຊາຊົນແລ້ວ 1 ພັນກວ່າເຮັກຕາ.
ຕາມການລາຍງານຂອງສື່ຂ່າວທ້ອງຖິ່ນໃຫ້ຮູ້ວ່າ ບ້ານໄດ້ຮັບຜົນກະທົບມີ: ບ້ານລະຫານ້ຳ, ບ້ານທ່າຂາມລຽນ, ບ້ານສອງຄອນ, ບ້ານດົງສະຫວ່າງ, ບ້ານແກ້ງໂດນ, ບ້ານຫົວຫາດ, ບ້ານພະແລັງ ແລະ ບ້ານ ທ່າຊະໂນ ສ່ວນຜົນເສຍ. ປະຈຸບັນ ທາງພາກສ່ວນທີ່ກ່ຽວຂ້ອງພວມລົງພື້ນທີ່ເກັບກຳຕົວຈິງ ໃນລະເຂດ.
ສື່ທ້ອງຖິ່ນຍັງລາຍງານຕື່ມອີກວ່າ ໃນວັນທີ 11 ຕຸລາ 2020 ເຈົ້າຫນ້າທີ່ ຕຳຫຼວດ ຈາກກອງບັນຊາ ການ ປກສ ເມືອງສອງຄອນ ໄດ້ສົ່ງກຳລັງລົງພື້ນທີ່ຊ່ວຍເຫຼືອ ພໍ່ແມ່ປະຊາຊົນ ບ້ານລະຫານ້ຳ ໃນການເກັບກູ້ຜົນຜະລິດ ເນື້ອທີ່ນາເຂົ້າ ທີ່ສຸກແລ້ວ ໄປໄວ້ໃນເຂດທີ່ແຫ້ງ ແລະ ປອດໄພ.
ໃນເວລາ 16:00 ໂມງ ຂອງວັນທີ 8 ຕຸລາ 2020 ທີ່ຜ່ານມາ ທ່ານ ພັນເອກ ລຳພູນ ວໍລະວົງ ເຈົ້າເມືອງສອງຄອນ ພ້ອມດ້ວຍຄະນະກຳມະການຕ້ານໄພພິບັດຕ້ານແລ້ງ, ນໍ້າຖ້ວມຂັ້ນເມືອງ ໄດ້ລົງພື້ນທີ່ເປັນການຮີບດ່ວນ ແລະ ຕິດຕາມສະພາບລະດັບນໍ້າເຊບັ້ງຫຽງ ຢູ່ທີ່ສະຖານີລະຫານໍ້າ ເພື່ອວາງແຜນກະ ກຽມຄວາມພ້ອມເພື່ອຮັບມືແຕ່ຫົວທີກັບມວນນໍ້າເຊໂປນ, ເຊກອກ, ເຊລະນອງ, ເຊຈຳພອນ ແລະ ນໍ້າຈາກສາຍຫ້ວຍຕ່າງໆ ທີ່ໄຫຼລົງສູ່ແມ່ນນໍ້າເຊບັ້ງຫຽງ ເຊິ່ງອາດເຮັດໃຫ້ແມ່ນໍ້າເຊບັ້ງຫຽງໄຫຼລົ້ນຝັ່ງເຂົ້າຖ້ວມເຮືອນຊານ ແລະ ທີ່ນາຂອງປະຊາຊົນ.
ທ່ານ ເຈົ້າເມືອງສອງຄອນໄດ້ຊີ້ນຳໃຫ້ຄະນະກຳມະການທີ່ຖືກແຕ່ງຕັ້ງລວມທັງກຳລັງທະຫານ, ອຳນາດການປົກຄອງບ້ານ ຕ້ອງໄດ້ພັດປ່ຽນກັນປະຈຳການຕິດຕາມສະພາບລະດັບນໍ້າຢ່າງໃກ້ຊິດລວມທັງລາຍງານເປັນແຕ່ລະໄລຍະ. ພ້ອມນີ້ ດ້ານເຮືອຂົນສົ່ງ, ເຮືອອົບພະຍົບພໍ່ແມ່ປະຊາຊົນ ແລະ ສິ່ງຂອງຕ່າງໆກໍ່ໃຫ້ກຽມພ້ອມທຸກດ້ານກໍລະນີເກີດເຫດນໍ້າຖ້ວມຢ່າງໄວເພື່ອໃຫ້ການຊ່ວຍເຫຼືອພໍ່ແມ່ປະຊາຊົນຢ່າງທ່ວງທັນ. ທາງອຳນາດການປົກຄອງບ້ານກໍ່ໃຫ້ມີການປະກາດຂ່າວປ່າວເຕືອນໃຫ້ພໍ່ແມ່ປະຊາຊົນທີອາໄສຢູ່ລຸ່ມຕໍ່າລຽບຕາມສາຍເຊບັ້ງຫຽງ, ເຊຈຳພອນ ຜ່ານໂທລະໂຄ່ງຂອງບ້ານໃນແຕ່ລະວັນໃຫ້ມີສະຕິກຽມພ້ອມທຸກເວລາ.
ຂ່າວໂດຍ: ພຸດສະດີ