spot_img
Homeຂ່າວທ້ອງຖິ່ນເວທີເສວະນາລາຄາໄຟຟ້າ ສະເໜີ 7 ທາງເລືອກແກ່ພາກທີ່ຢູ່ອາໄສ

ເວທີເສວະນາລາຄາໄຟຟ້າ ສະເໜີ 7 ທາງເລືອກແກ່ພາກທີ່ຢູ່ອາໄສ

Published on

ກະຊວງພະລັງງານ ແລະ ບໍ່ແຮ່ ຮ່ວມກັບ ຂະແໜງການກ່ຽວຂ້ອງຈັດກອງປະຊຸມເສວະນາ ເພື່ອຕອບຄໍາຖາມທີ່ສັງຄົມມີຄວາມສົນໃຈໃນໄລຍະຜ່ານມາ ກ່ຽວກັບວຽກງານໄຟຟ້າ, ການປັບປຸງໂຄງສ້າງ ແລະ ນະໂຍບາຍຫຼຸດຜ່ອນຜົນກະທົບຂອງພະຍາດໂຄວິດ – 19 ພ້ອມສະເໜີ 7 ທາງເລືອກໃຫ້ແກ່ພາກທີ່ຢູ່ອາໄສເພື່ອຫາລາຄາທີ່ເໝາະສົມ ສົ່ງເສີມໃຫ້ມີການນໍາໃຊ້ເຂົ້າໃນການດໍາເນີນທຸລະກິດພາຍໃນ.

ໜັງສືພິມເສດຖະກິດ-ການຄ້າ ລາຍງານວ່າ ວັນທີ 5 ຕຸລາ 2020 ທີ່ຫ້ອງປະຊຸມໃຫຍ່ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດລາວ ໄດ້ມີກອງປະຊຸມປຶກສາຫາລືກ່ຽວກັບຮ່າງບົດສຶກສາລາຄາໄຟຟ້າສະບັບປັບປຸງໃໝ່ (ແບບວົງກວ້າງ) ໂດຍການເຂົ້າຮ່ວມຂອງ ທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍສະພາແຫ່ງຊາດ.

ທ່ານ ຈັນສະແຫວງ ບຸນຍົງ ຫົວໜ້າກົມນະໂຍບາຍ ແລະ ແຜນພະລັງງານ ກະຊວງພະລັງງານ ແລະ ບໍ່ແຮ່ ຂຶ້ນຜ່ານບົດສັງລວມການປັບປຸງໂຄງສ້າງລາຄາໄຟຟ້າ 2021 – 2025 ໂດຍມີເນື້ອໃນບາງຕອນສະເໜີ 7 ທາງເລືອກແກ່ພາກທີ່ຢູ່ອາໄສວ່າ:

ທາງເລືອກທີ 1 ປະຕິບັດຕາມຫົວໜ່ວຍລາຄາໄຟປະເພດທີ່ຢູ່ອາໄສສະບັບເກົ່າ ທີ່ປະຕິບັດແຕ່ເດືອນກໍລະກົດ 2016 ເຖິງ ເມສາ 2019 ເຊິ່ງໄດ້ຈັດແບ່ງຜູ້ຊົມໃຊ້ປະເພດທີ່ຢູ່ອາໄສເປັນ 6 ຂັ້ນ ໂດຍບໍ່ປັບຂຶ້ນລາຄາໃໝ່.

ທາງເລືອກທີ 2 ໃຊ້ລາຄາດຽວເປັນເອກະພາບສໍາລັບທຸກຄົວເຮືອນ ດ້ວຍລາຄາ 710 ກີບ; ສໍາລັບຜູ້ທີ່ໃຊ້ໄຟຕໍ່າກວ່າ 150 kwh/ເດືອນ ແມ່ນຈະໄດ້ຈ່າຍ 355 ກີບ/kwh ສ່ວນຕ່າງແມ່ນລັດຖະບານດຸນດ່ຽງໃຫ້.

ທາງເລືອກທີ 3 ໃຊ້ລາຄາດຽວເປັນເອກະພາບສໍາລັບທຸກຄົວເຮືອດ້ວຍລາຄາ 710 ກີບ/kwh ແລະ ລັດຖະບານມີນະໂຍບາຍໃຫ້ປະຊາຊົນຜູ້ໃຊ້ໄຟຕໍ່າກວ່າ 100 kwh/ເດືອນ ໃນລາຄາ 355 ກີບ/kwh ແລະ ຜູ້ຊົມໃຊ້ໄຟໃນລະຫວ່າງ 101 – 200 kwh/ເດືອນ ໃນລາຄາ 532,5 ກີບ/kwh.

ທາງເລືອກທີ 4 ຈັດແບ່ງຜູ້ຊົມໃຊ້ເປັນ 3 ກຸ່ມ, ສໍາລັບຜູ້ທີ່ໃຊ້ໄຟ 0 – 200 kwh/ເດືອນ ຈະໄດ້ຈ່າຍລາຄາ 420 ກີບ/kwh ແລະ ສໍາລັບຜູ້ທີ່ໃຊ້ໄຟ 201 – 500 kwh/ເດືອນ ຈະໄດ້ຈ່າຍລາຄາ 630 ກີບ/kwh ແລະ ສໍາລັບຜູ້ທີ່ໃຊ້ໄຟຫຼາຍກວ່າ 500 kwh/ເດືອນ ເທົ່າກັບ 840 ກີບ/kwh.

ທາງເລືອກທີ 5 ຈັດແບ່ງປະເພດຜູ້ຊົມໃຊ້ປະເພດທີ່ຢູ່ອາໄສເປັນ 6 ກຸ່ມ ແຕ່ລາຄາດຽວຕາມການຊົມໃຊ້ປະລິມານຕົວຈິງ ຖືກຂັ້ນໃດກໍໃຫ້ຄູນລາຄາດຽວຂອງຂັ້ນນັ້ນເລີຍ.

ທາງເລືອກທີ 6 ຈັດແບ່ງປະເພດຜູ້ຊົມໃຊ້ປະເພດທີ່ຢູ່ອາໄສເປັນ 6 ຂັ້ນ ແຕ່ລາຄາດຽວຕາມການຊົມໃຊ້ປະລິມານຕົວຈິງ ຖືກຂັ້ນໃດກໍໃຫ້ຄູນລາຄາດຽວຂອງຂັ້ນນັ້ນເລີຍ ຄືກັບທາງເລືອກທີ 5 ພຽງແຕ່ຫຼຸດລາຄາລົງ 5%.

ທາງເລືອກທີ 7 ການຄິດໄລ່ປະສົມປະສານລະຫວ່າງຮູບແບບການດັດສົມສະເລ່ຍ ( Telescopic ) ແລະ ວິທີການມີຫຼາຍຂັ້ນຄິດໄລ່ແບບລາຄາດຽວ ( Non Telescopic ) ໝາຍຄວາມວ່າຜູ້ທີ່ຊົມໃຊ້ໄຟຕໍ່າກວ່າ 500 kwh ແມ່ນຄິດໄລ່ລາຄາແບບເກົ່າ, ສ່ວນຜູ້ຊົມໃຊ້ໄຟຫຼາຍກວ່າ 500 kwh ຂຶ້ນໄປ ແມ່ນນໍາໃຊ້ລາຄາສະເລ່ຍ 880 ກີບ/kwh.

ຂະນະດຽວກັນ, ທ່ານ ນາງ ວາລີ ເວດສະພົງ ຮອງປະທານ ສຄອຊ ໃຫ້ທັດສະນະວ່າ: ເວົ້າເລື່ອງໂຄງສ້າງລາຄາໄຟຟ້າຖືເປັນສິ່ງທີ່ສໍາຄັນທີ່ເປັນປັດໄຈເຮັດໃຫ້ລາຄາໄຟຟ້າສູງ ເຊິ່ງມັນກະທົບທັງໝົດຕໍ່ພາກທຸລະກິດ ໂດຍສະເພາະອຸດສາຫະກໍາທ່ອງທ່ຽວທັງຮ້ານອາຫານ, ໂຮງແຮມ, ຊາວກະສິກອນ. ດັ່ງນັ້ນ, ສິ່ງສໍາຄັນແມ່ນຕ້ອງຫາໂຄງສ້າງລາຄາ ຫຼື ບ່ອນອີງລາຄາທີ່ເໝາະສົມໃນການຄິດໄລ່ ແລະ ຫາກມີເວທີເສວະນາທີ່ລົງເລິກກວ່ານີ້ອີກຈະເປັນການດີ ເພື່ອໃຫ້ມີນັກຄົ້ນຄວ້າ, ນັກເສດຖະສາດ ມາວິເຄາະວິໄຈເຖິງສາເຫດຄັກແນ່. ແນວໃດກໍຕາມ, ເຊື່ອວ່າຫາກລາຄາໄຟຟ້າຍັງສູງແບບນີ້ ເຮັດແນວໃດຕົ້ນທຶນການຜະລິດຂອງພາກທຸລະກິດລາວກໍຍັງຈະສູງຢູ່.

ຮຽບຮຽງຂ່າວ: ພຸດສະດີ

ບົດຄວາມຫຼ້າສຸດ

ຄົ້ນພົບພຣະພຸດທະຮູບ ໃນລະຫວ່າງການປະຕິບັດ ງານເກັບກູ້ລະເບີດບໍ່ທັນແຕກ ຢູ່ບ້ານສ້າງປຸ່ງບອນ, ເມືອງຍົມມະລາດ, ແຂວງຄຳມ່ວນ

ອາທິດທີ່ຜ່ານມາ, ໃນລະຫວ່າງການປະຕິບັດງານເກັບກູ້ລະເບີດບໍ່ທັນແຕກ (UXO) ຂອງພຣະນັກງານພາກສະໜາມອົງການ MAG ຢູ່ທີ່ບ້ານສ້າງປຸ່ງບອນ ເມືອງຍົມມະລາດ ແຂວງຄຳມ່ວນ, ທີມງານໄດ້ພົບເຫັນ ‘ພຣະພຸດທະຮູບ’ ທີ່ຖືກຝັງຢູ່ໃຕ້ດິນໃນພື້ນທີ່ໄຮ່ນາ! ພຣະພຸດທະຮູບອົງນີ້ມີຂະໜາດປະມານ 5x9 ຊັງຕີແມັດ ແລະ...

ຕາມຫາແມ່ບ້ານຊາວລາວ ເພາະຕົກເປັນຜູ້ຕ້ອງສົງໃສ ໃນເຫດຄາຕະກຳ ອະດີດຄູຄົນໄທ ອາຍຸ 79 ປີ, ເຊິ່ງປັດຈຸບັນ ແມ່ບ້ານຄົນດັ່ງກ່າວໄດ້ຫາຍໂຕໄປຫຼັງເກີດເຫດ

ສຳນັກຂ່າວປະເທດໄທ ລາຍງານໃນວັນທີ 21 ມັງກອນ 2026 ເກີດເຫດການຄາຕະກຳສຸດສະເທືອນຂວັນ ອະດີດຄູຄົນໄທ ອາຍຸ 79 ປີ ນອນເສຍຊີວິດຄາບ້ານພັກ ໃນເຂດບຶງກຸ່ມ ກຸງເທບມະຫານະຄອນ ປະເທດໄທ...

ຄ່າເຊົ່າໃນບຸນພຣະທາດສີໂຄດຕະບອງ ໂຊນສະໄລ້ເດີ ລາຄາ 45,000,000 ກີບ, ໂຊນຮ້ານຂາຍເຄື່ອງທົ່ວໄປ ລາຄາ 500,000 ກີບ/ແມັດ, ໂຊນວົງດົນຕີ ລາຄາ 60,000,000 ກີບ/ວົງ

ອີງຕາມແຈ້ງການຂອງເມືອງທ່າແຂກ ແຂວງຄໍາມ່ວນ ເລກທີ 05/ຈມ.ທຂ ລົງວັນທີ 19 ມັງກອນ 2026 ເລື່ອງ: ແຈ້ງການກໍານົດລາຄາ ແລະ ໂຊນຂາຍເຄື່ອງຢູ່ງານບຸນພຣະທາດສີໂຄດຕະບອງ ປະຈໍາປີ 2026. ເມືອງທ່າແຂກ ຂໍຖືເປັນກຽດແຈ້ງການ...

ໄຂຂຶ້ນຢ່າງເປັນທາງການ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ ໃນລະຫວ່າງວັນທີ 20-25 ມັງກອນ 2026

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 20 ມັງກອນ 2026 ຢູ່ຫໍປະຊຸມແຫ່ງຊາດ ນະຄອນ ຫລວງຮ່າໂນ້ຍ ແລະ ຈະດໍາເນີນໄປຈົນຮອດ ວັນທີ...