ໜັງສືພິມວຽງຈັນທາຍ ລາຍງານວ່າ: ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ຈະໄດ້ດໍາເນີນມາດຕະການຕາມລະບຽບກົດໝາຍກັບທຸກພາກສ່ວນ ທີ່ສ້າງຕັ້ງຊື່ອອນລາຍຕ່າງໆ ໂດຍບໍ່ໄດ້ລົງທະບຽນ ຫຼື ບໍ່ໄດ້ຮັບອະນຸຍາດ ແຕ່ຖືວ່າຜິດກັບກົດໝາຍສື່ມວນຊົນ (ສະບັບປັບປຸງ) ເລກທີ 01/ສພຊລົງວັນທີ 04 ພະຈິກ 2016 ແລະ ລະເມີດລະບຽບການທີ່ກ່ຽວຂ້ອງ.
ເພື່ອໃຫ້ເຂົ້າສູ່ລະບົບ ແລະ ສອດຄ່ອງກັບກົດໝາຍສື່ມວນຊົນ, ຫ້ອງການ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວໄດ້ອອກແຈ້ງການເມື່ອບໍ່ດົນມານີ້ເຖິງທຸກພາກສ່ວນ ທີ່ສ້າງຕັ້ງໜ້າຂ່າວໂດຍຜ່ານ ເຟສບຸກ (Facebook), ຢູທູບ (Youtube) ແລະ ເວັບໄຊ (Website) ໃຫ້ມາລົງທະບຽນ ເຊິ່ງສາມາດດາວໂລດແບບຟອມລົງທະບຽນ ຢູ່ທີ່ເວັບໄຊ www.medialaos.com ຫຼື ເອົາຢູ່ກົມສື່ມວນຊົນ ກະຊວງ ຖວທ ເພື່ອປະກອບຂໍ້ມູນ ແລະ ສາມາດສົ່ງຟອມລົງທະບຽນ ເຂົ້າທາງອີເມວ: info@medialaos.com.
ການແຈ້ງການໃຫ້ລົງທະບຽນດັ່ງກ່າວນີ້ກໍ່ເພື່ອໃຫ້ເຂົ້າກັບລະບຽບກົດໜາຍຂອງສື່ມວນຊົນ, ສະດວກໃນການກວດສອບ ແລະ ຕິດຕາມ ທັງເປັນການຮັບປະກັນໃນການສະໜອງຂໍ້ມູນຂ່າວສານແກ່ຜູ້ອ່ານຢ່າງຖືກຕ້ອງ, ເປັນຈິງ ໂດຍໄລຍະທີ່ຜ່ານມາເຫັນໄດ້ວ່າມີຫຼາຍໆສື່ສັງຄົມອອນລາຍທີ່ບໍ່ໄດ້ລົງທະບຽນໄດ້ປ່ອຍຂ່າວປອມສູ່ສັງຄົມໂດຍສະເພາະແມ່ນມີການບິດເບືອນຂໍ້ມູນ, ຂ່າວໃສ່ຮ້າຍປ້າຍສີພັກ-ລັດ, ຂ່າວບໍ່ມີມູນຄວາມຈິງ ແລະ ຂ່າວອື່ນໆ ເຊິ່ງໄດ້ກໍ່ໃຫ້ເກີດຄວາມບໍ່ສະຫງົບໃນສັງຄົມ.
ຮຽບຮຽງຂ່າວ: ພຸດສະດີ