ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນໃນວັນທີ 16 ກັນຍາ 2020ນີ້ວ່າ ເນື່ອງຈາກວ່າພາຍຸເຂດຮ້ອນ ໂນອິນ (Noul) ຫົວທີ 11 ປະຈຳປີ 2020 ເຊິ່ງໃນເວລາ 7:30 ຂອງວັນທີ 16 ກັນຍາ 2020 ມີຈຸດສຸນກາງຢູ່ເສັ້ນຂະໜານທີ 13.0 ອົງສາ ແລະ ເສັ້ນແວງທີ 117.8 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກດ້ວຍຄວາມໄວ 15 ກິໂລແມັດຕໍ່ຊົ່ວໂມງ. ຄາດຄະເນວ່າພາຍຸຫົວນີ້ຈະຂຶ້ນຝັ່ງເຂດເມືອງ ດານັງ ສສ ຫວຽດນາມ ໃນຕອນບ່າຍຂອງວັນທີ 18 ກັນຍາ 2020 ແລະ ຈະສືບຕໍ່ເຄື່ອນທີ່ຜ່ານແຂວງ ສາລະວັນ, ສະຫວັນນະເຂດ ແລະ ຄຳມ່ວນ ໃນຄືນວັນທີ 18 ກັນຍາ 2020 ຫາ ຕອນເຊົ້າວັນທີ 19 ກັນຍາ 2020ນີ້ ຈາກນັ້ນຈະອ່ອນກຳລັງລົງເປັນພາຍຸດິເປຼຊັນ ແລະ ບ່ອນຄວາມກົດດັນອາກາດຕໍ່າ ເຄື່ອນທີ່ຜ່ານປະເທດໄທຕາມລຳດັບ. ເຊິ່ງຈະເຮັດໃຫ້ມີຝົນຕົກໜັກ ແລະ ລົມພັດແຮງຢູ່ບັນດາແຂວງພາກເໜືອ ລົງຫາ ພາກກາງ ແລະ ພາກໃຕ້ ໃນໄລຍະວັນທີ 18-20 ກັນຍາ 2020ນີ້.
ດັ່ງນັ້ນ, ຈຶ່ງແຈ້ງເຕື່ອນເຖິງພໍ່ແມ່ປະຊາຊົນ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໄສຢູ່ແຂວງພາກເໜືອ, ພາກກາງ ແລະ ພາກໃຕ້ເຊັ່ນ: ແຂວງ ຫົວພັນ, ຊຽງຂວາງ, ບໍ່ແກ້ວ, ຫຼວງພະບາງ, ໄຊຍະບຸລີ, ວຽງຈັນ, ນະຄອນຫຼວງວຽງຈັນ, ໄຊສົມບຸນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ມີຕົ້ນໄມ້ຫັກ ແລະ ເສົາໄຟຟ້າລົ້ມ, ເຮືອນເປ່ເພ, ນໍ້າຖ້ວມຊຸ, ດິນເຈື່ອນ ແລະ ນໍ້າຖ້ວມອັ່ງ.
ຮຽບຮຽງຂ່າວ: ພຸດສະດີ