ສານຈີນລົງໂທດປະຫານຊີວິດ ອະດີດເຈົ້າໜ້າທີ່ລະດັບສູງກະຊວງການລົດໄຟ ຫລັງຮັບເງິນສິນບົນລວມເກືອບ 50 ລ້ານຢວນ.
ສຳນັກຂ່າວຕ່າງປະເທດລາຍງານ ໃນວັນທີ 17 ຕຸລາຜ່ານມານີ້ວ່າ ສານປະຊາຊົນນະຄອນຫລວງປັກກິ່ງ ປະກາດຄຳຕັດສິນ
ລົງໂທດປະຫານຊີວິດ ໂດຍພາກໂທດໄວ້ເປັນເວລາ 2 ປີ ໃຫ້ແກ່ ທ່ານ ຈັງ ສູ່ ກວງ ອາຍຸ 58 ປີ ອະດີດນັກວິສະວະກອນ ຜູ້ອອກ
ແບບໂຄງຂ່າຍລົດໄຟຄວາມໄວສູງຂອງຈີນ ຫລັງພິສູດພົບຄວາມຜິດ ຮັບເງິນສິນບົນຈຳນວນ 47.6 ລ້ານຢວນ ຫລື ປະມານ
59 ຕື້ກີບ ລະຫວ່າງປີ 2000 – 2011.
ກ່ອນໜ້ານີ້ ທ່ານ ຈັງ ສູ່ ກວງ ເຄີຍດຳລົງຕຳແໜ່ງຮອງຫົວໜ້າຝ່າຍວິສະວະກຳ ແລະ ຫົວໜ້າສຳນັກງານຂົນສົ່ງມວນຊົນ
ກະຊວງການລົດໄຟຂອງຈີນ, ແຕ່ດ້ວຍຄວາມບໍ່ຊື່ສັດໃນໜ້າທີ່ ຈິ່ງເຮັດໃຫ້ເຂົາຖືກຈັບກຸມມາດຳເນີນຄະດີຕາມກົດໝາຍໃນ
ທີ່ສຸດ.
ໃນຂະນະທີ່ສະຖານີໂທລະພາບ CCTV ຂອງຈີນກໍໄດ້ລາຍງານວ່າ ສານປະຊາຊົນຈີນອີກແຫ່ງໜຶ່ງໃນນະຄອນຫລວງປັກກິ່ງ
ໄດ້ສັ່ງລົງໂທດຈຳຄຸກຕະຫລອດຊີວິດ ທ່ານ ຊູ ຊຸ່ນ ຫູ່ ອະດີດຮອງຫົວໜ້າສຳນັກງານຂົນສົ່ງມວນຊົນ ກະຊວງການລົດໄຟ
ຂອງຈີນ ເຊິ່ງເປັນຕຳແໜ່ງງານຮອງຈາກ ທ່ານ ຈັງ ສູ່ ກວງ ທີ່ເປັນຫົວໜ້າໃຫຍ່ຄຸມຢູ່ ໃນຄວາມຜິດຮັບເງິນສິນບົນ ຈຳ
ນວນ 24 ລ້ານຢວນ ຫລື ປະມານ 30 ຕື້ກີບ.
ທັງນີ້ ກະຊວງການລົດໄຟຂອງຈີນ ຖືກຂຸດຮື້ຄັ້ງໃຫຍ່ເມື່ອສອງປີກ່ອນ ຫລັງຈາກເກີດເຫດໂສກນາຕະກຳລົດໄຟຄວາມໄວ
ສູງສອງຂະບວນ ແລ່ນຕຳກັນແບບປະສານງາ ໃນປີ 2011 ເປັນເຫດໃຫ້ມີຜູ້ເສຍຊີວິດກ່ວາ 40 ຄົນ ໂດຍທາງການຈີນໄດ້
ລະດົມເຈົ້າໜ້າທີ່ໜ່ວຍປາບປາມການສໍ້ລາດບັງຫລວງ ເຂົ້າສອບສວນ ແລະ ກວາດລ້າງຄົນວົງໃນຂອງກະຊວງ ຕັ້ງແຕ່
ລະດັບສູງສຸດຢ່າງ ທ່ານ ຫລິວ ຈື້ ຈິນ ອະດີດລັດຖະມົນຕີວ່າການກະຊວງການລົດໄຟ ໄປຈົນຮອດເຈົ້າໜ້າທີ່ລະດັບລຸ່ມລົງ
ມາຢ່າງເດັດຂາດ ຕາມຂະບວນການຍຸດຕິທຳຂອງຈີນ.