ເວັບໄຊ bangkokbiznews ລາຍງານວ່າ ທ່ານ ນາງ ອອງຊານ ຊູຈີ ລະບຸການລະບາດຂອງໂຣກໂຄວິດ-19 ເປັນໄພພິບັດຂອງປະເທດ ເຊິ່ງມຽນມາໄດ້ອອກມາດຕະການກັກຕົວ-ກວດຫາເຊື້ອໂຄວິດ-19 ໃນຜູ້ທີ່ເດີນທາງເຂົ້າເມືອງຫຼວງ ຫຼັງມີລາຍງານພົບຜູ້ຕິດເຊື້ອເພີ່ມຂຶ້ນຫຼາຍເມື່ອວັນພຸດທີ່ຜ່ານມາ.
ລັດຖະບານມຽນມາ ລະບຸວ່າ ຜູ້ເດີນທາງເຂົ້ານະຄອນຫຼວງເນປິດ ຕ້ອງຖືກກັກຕົວ ແລະ ກວດຫາເຊື້ອໂຄວິດ ໂດຍຈະໄດ້ຮັບອະນຸຍາດໃຫ້ເຂົ້າເມືອງກໍ່ຕໍ່ເມື່ອຜົນກວດອອກມາເປັນລົບ ສ່ວນຜູ້ທີ່ເດີນທາງຈາກພື້ນທີ່ທີ່ໄດ້ຮັບຜົນກະທົບໜັກຈະຖືກກັກຕົວໃນສະຖານທີ່ກັກຕົວຢ່າງໜ້ອຍ 7 ວັນ ແຕ່ຫາກຜົນກວດອອກມາເປັນລົບຈະໄດ້ຮັບອະນຸຍາດໃຫ້ອອກຈາກສະຖານກັກຕົວໄວຂຶ້ນ.
ມຽນມາ ພົບການຕິດເຊື້ອພາຍໃນທ້ອງຖິ່ນຄັ້ງທຳອິດໃນຮອບ 1 ເດືອນ ເມື່ອກາງເດືອນສິງຫາ ທີ່ລັດຍະໄຂ່ ຫຼັງຈາກນັ້ນຈຳນວນຜູ້ຕິດເຊື້ອໂຄວິດ-19 ສະສົມຂອງປະເທດເພີ່ມຂຶ້ນເກືອບ 2 ເທົ່າ ທີ່ 1,059 ຄົນ ແລະ ມີຜູ້ເສຍຊີວິດລວມ 6 ຄົນ ໂດຍການຕິດເຊື້ອຮອບໃໝ່ເກີດຂຶ້ນທີ່ເມືອງ ສິດຕະເວ ເມືອງເອກຂອງລັດຍະໄຂ່ ທີ່ເຈົ້າໜ້າທີ່ໄດ້ອອກຄຳສັ່ງໃຫ້ປະຊາຊົນຢູ່ກັບບ້ານ ແລະ ປະກາດພາວະສຸກເສີນ.
ຮຽບຮຽງຂ່າວ: ພຸດສະດີ