ເຟສບຸ໊ກຖະແຫຼງການວ່າ ກຽມດຳເນີນການທາງດ້ານກົດໝາຍຫຼັງຖືກລັດຖະບານໄທໃຫ້ປິດກັ້ນກຸ່ມທີ່ມີເນື້ອຫາສຸ່ມສ່ຽງຕໍ່ການລະເມີດກົດໝາຍ ເຊິ່ງຂັດກັບຫຼັກສິດທິມະນຸດ ແລະ ກະທົບຕໍ່ການສະແດງຄວາມເຫັນຢ່າງເສລີພາບ.
ສຳນັກຂ່າວຣອຍເຕີ ລາຍງານວ່າ ເມື່ອວັນທີ 24 ສິງຫາ ທີ່ຜ່ານມາ ເຟສບຸ໊ກໄດ້ຈຳກັດການເຂົ້າເຖິງກຸ່ມຜູ້ໃຊ້ເຟສບຸ໊ກກຸ່ມໜຶ່ງສຳລັບຄົນທີ່ຢູ່ໃນປະເທດໄທແລ້ວ ຫຼັງຈາກທີ່ລັດຖະບານໄທໄດ້ຂູ່ວ່າຈະໃຊ້ມາດຕະການທາງກົດໝາຍຈັດການກັບເຟສບຸ໊ກ ເພາະບໍ່ຍອມລົບເນື້ອຫາທີ່ມີຄວາມສ່ຽງຕໍ່ການກະທຳທີ່ຜິດກົດໝາຍໃນກຸ່ມດັ່ງກ່າວທີ່ມີສະມາຊິກຫຼາຍເຖິງ 1 ລ້ານຄົນ.
ທາງດ້ານໂຄສົກຂອງເຟສບຸ໊ກ ກ່າວວ່າ “ເຟສບຸ໊ກໄດ້ຮັບແຮງກົດດັນຈາກທາງລັດຖະບານໄທໃຫ້ຈຳກັດການສະແດງອອກທາງການເມືອງບາງປະເພດໃນໄທ ໂດຍລັດຖະບານໄທອອກມາຂູ່ວ່າຈະມີການດຳເນີນຄະດີອາຍາກັບຕົວແທນເຟສບຸ໊ກໃນໄທ ຫາກບໍ່ມີການຈັດການ”.
ແນວໃດກໍ່ຕາມ, ເຟສບຸ໊ກໄດ້ລະບຸວ່າ ປັດຈຸບັນທາງບໍລິສັດກຳລັງພິຈາລະນາກຽມດຳເນີນຄະດີຕາມກົດໝາຍກັບທາງລັດຖະບານໄທ ໂດຍລະບຸວ່າ ຄຳຮ້ອງຂໍຂອງລັດຖະບານໄທຂັດກັບຫຼັກການກົດໝາຍສິດທິມະນຸດ ແລະ ສົ່ງຜົນຕໍ່ຄວາມສາມາດໃນການສະແດງຄວາມຄິດເຫັນຂອງປະຊາຊົນ.
ທັງນີ້, ໂຄສົກເຟສບຸ໊ກກ່າວຕື່ມກັບ CNN ວ່າ “ເຟສບຸກເຮັດວຽກເພື່ອປົກປ້ອງ ແລະ ຄຸ້ມຄອງສິດທິຜູ້ໃຊ້ງານອິນເຕີເນັດທຸກຄົນ ແລະ ກຽມດຳເນີນກົດໝາຍກັບຄໍາຮ້ອງຂໍນີ້”.
ຮຽບຮຽງຂ່າວ: ພຸດສະດີ