ຈາກສະພາບຝົນຕົກຕິດຕໍ່ກັນຫຼາຍວັນ ຍ້ອນພາຍຸພັດຜ່ານ ເຮັດໃຫ້ຫຼາຍປະເທດຖືກນ້ຳຖ້ວມ ສະເພາະ ສປປ ລາວ ກໍມີສະພາບນ້ຳຖ້ວມຢູ່ບາງທ້ອງຖິ່ນ ເປັນຕົ້ນຢູ່ແຂວງໄຊຍະບູລີ, ວັງວຽງ ແລະ ແຂວງບໍລິຄຳໄຊ.
ຕາມການລາຍງານຂ່າວ ມາຮອດຕອນເຊົ້າຂອງວັນທີ 5 ສິງຫາ 2020 ນໍ້າແມ່ນໄດ້ໄຫຼເຂົ້າຖ້ວມເຮືອນຊານພໍ່ແມ່ປະຊາຊົນທີ່ຢູ່ແຄມນໍ້າຊອງ ວັງວຽງ. ບັນດາຮ້ານອາຫານ, ເຮືອນພັກ ແລະ ໂຮງແຮມແລະ ເຮືອນຊານໄດ້ລຽບຕາມແຄມສາຍນໍ້າຊອງປັດຈຸບັນແມ່ນຖືກນໍ້າຖ້ວມເສຍຫາຍໝົດ ນອກນີ້ນໍ້າຍັງໄຫຼເຂົ້າມາເບື້ອງເທດສະບານເມືອງເຮັດໃຫ້ຊັບສິນ, ເຮືອນຊານປະຊາຊົນເສຍຫາຍອີກຈຳນວນຫຼາຍ. ຢູ່ເຂດບ້ານກ້າງປາ ເມືອງແມດ ແຂວງວຽງຈັນ ເກີດມີດີນເສາະເຈືອນ ເຮັດໃຫ້ລະບົບຕາຂ່າຍໄຟຟ້າ 22 ກິໂລໂວນ ແລະ ອຸປະກອນໄຟຟ້າເປ່ເພ ເຮັດໃຫ້ເສົາໄຟຟ້າ ຫັກລົ້ມລົງ ຈຳນວນ 3 ຕົ້ນ. ປັດຈຸບັນ ທາງສູນ ບໍລິການໄຟຟ້າ ເມືອງແມດ ທີ່ຂື້ນກັບລັດວິສາຫະກິດໄຟຟ້າລາວ ສາຂາແຂວງວຽງຈັນ ແມ່ນພວມເລັ່ງສ້ອມແປງ ເພື່ອປະຊາຊົນໄດ້ນໍາໃຊ້ໄຟຟ້າໂດຍໄວ.
ເມືອງບໍລິຄັນ ແຂວງບໍລິຄຳໄຊ ເມື່ອວັນທີ 5 ສິງຫາ 2020 ນ້ຳໄດ້ໄຫຼເຂົ້າເທດສະບານເມືອງດັ່ງກ່າວບາງຈຸດ ເປັນຕົ້ນເຂດບ້ານນາແຫນ, ສີສະຫວາດ, ຫາດດອນຄູນ ແລະ ຈຸດອື່ນໆທີ່ຕ່ຳ ຈຶ່ງຮຽກຮ້ອງທຸກຄົນມີສະຕິກຽມຍົກຍ້າຍເຄື່ອງຂອງ ແລະ ສັດລ້ຽງອອກຈາກຈຸດທີ່ມີຄວາມສ່ຽງ.
ເພື່ອກຽມພ້ອມຕອບໂຕ້ ແລະ ຮັບມືກັບໄພພິບັດນ້ຳຖ້ວມທີ່ອາດຈະເກີດຂຶ້ນໃນຕໍ່ໜ້າ ວັນທີ 4 ສິງຫາ 2020 ຫ້ອງວ່າການປົກຄອງເມືອງບໍລິຄັນ ໄດ້ອອກແຈ້ງການເຖິງຫົວໜ້າຫ້ອງການ ອົງການທຽບເທົ່າ ກອງບັນຊາການ ປກຊ ກອງບັນຊາການ ປກສ ເມືອງ ນາຍບ້ານ ປະຊາຊົນ ແລະ ທຸກພາກສ່ວນ ຊາບວ່າ: ວັນທີ 3-10 ສິງຫາ 2020 ຈະເກີດມີຝົນຕົກເປັນບໍລິເວນກວ້າງ ພ້ອມມີລົມພັດແຮງທົ່ວແຂວງ ໂດຍສະເພາະທົ່ວເມືອງບໍລິຄັນ ຈາກການລົງກວດກາຕິດຕາມສະພາບນ້ຳສາຍຕ່າງໆແມ່ນເພີ່ມຂຶ້ນຫຼາຍ ແລະ ອາດຈະເພີ່ມຂຶ້ນຕື່ມອີກ ຈຶ່ງເຕືອນໃຫ້ທຸກພາກສ່ວນມີສະຕິລະວັງຕົວຕໍ່ພາຍຸລົມແຮງ ຝົນຕົກໜັກ ນ້ຳຖ້ວມຂັງ ນ້ຳເຊາະດິນເຈື່ອນ ແລະ ການແຜນລະບາດຂອງພະຍາດຕ່າງໆ ເພື່ອຮັບມືໃຫ້ໄດ້ຢ່າງທັນການ.
ຮຽບຮຽງຂ່າວ: ພຸດສະດີ