ການລະບາດຂອງໂຄວິດ-19 ໃນຕ່າງປະເທດຍັງໜ້າເປັນຫ່ວງ ຢ່າງປະເທດຫວຽດຫຼ້າສຸດໄດ້ປະກາດປິດເມືອງດານັງ ເມືອງໃຫຍ່ອັນ ດັບສາມຂອງປະເທດຕັ້ງແຕ່ວັນທີ 28 ກໍລະກົດເປັນຕົ້ນໄປ ເປັນເວລາ 15ວັນ ເພື່ອຄວບຄຸມການລະບາດຂອງໂຄວິດ-19 ຫຼັງ ຈາກຊ່ວງໄລຍະ 4 ວັນທີ່ຜ່ານມາ ພົບຜູ້ຕິດເຊື້ອລາຍໃໝ່ໃນປະເທດ 22 ຄົນ ໃນຈຳນວນນີ້ 4 ຄົນເປັນເຈົ້າໜ້າທີ່ສາທາລະນະສຸກ ເຊິ່ງເປັນຄັ້ງທຳອິດໃນຮອບສາມເດືອນທີ່ພົບຜູ້ຕິດເຊື້ອລາຍໃໝ່ ໂດຍທາງລັດຖະບານຫວຽດນາມໄດ້ຫ້າມລະບົບຂົນສົ່ງສາທາລະນະທ້ຽວບິນເຂົ້າ ແລະ ອອກຈາກເມືອງ ລວມທັງກວດສອບຊາຍຫາດໃນດານັງເພື່ອໃຫ້ແນ່ໃຈວ່າບໍ່ມີນັກທ່ອງທ່ຽວແລ້ວ.
ເວັບໄຊ apnews.com ລາຍງານວ່າ ຊາຍຫາດດານັງມີນັກທ່ອງທ່ຽວປະມານ 50,000ຄົນຕໍ່ມື້ ໄດ້ຖືກປິດ ແລະ ມີພຽງເຈົ້າໜ້າທີ່ຮັກສາຄວາມປອດໄພເທົ່ານັ້ນທີ່ລາດຕະເວນຢູ່ຊາຍຫາດ. ການປິດຊາຍຫາດດັ່ງກ່າວສົ່ງຜົນກະທົບຢ່າງຮຸນແຮງຕໍ່ອຸດສາຫະກຳທ່ອງທ່ຽວຂອງເມືອງ ເຊິ່ງຫາກໍ່ໄດ້ຮັບການຟື້ນຟູຫຼັງຈາກການລະບາດຂອງໂຄວິດ-19 ສະຫງົບລົງ.
ຫວຽດນາມ ເປັນປະເທດທີ່ມີປະຊາກອນ 95 ລ້ານຄົນ ມີຍອດຕິດເຊື້ອໂຄວິດ-19 ຕໍ່າກວ່າ 431 ຄົນ ແລະ ບໍ່ມີລາຍງານຜູ້ເສຍຊີວິດ ເຊິ່ງເປັນຜົນມາຈາກມາດຕະການກັກຕົວທີ່ເຂັ້ມງວດ ແລະ ການກວດຫາເຊື້ອທີ່ວ່ອງໄວ, ທົ່ວເຖິງ.
ຮຽບຮຽງຂ່າວ: ພຸດສະດີ