ໜັງສືພິມວຽງຈັນທາມ ລາຍງານວ່າ ກະຊວງພະລັງງານ ແລະ ບໍ່ແຮ່ ແຈ້ງໃຫ້ຮູ້ວ່າ ຮອດປັດຈຸບັນນີ້, ສາມາດສະໜອງໄຟຟ້າຮັບໃຊ້ໄດ້ 100% ແລ້ວ ຢູ່ເທດສະບານແຂວງ, ນະຄອນຫຼວງ, ເທດສະບານເມືອງ, ນະຄອນ, ຈຳນວນບ້ານທີ່ໄດ້ຊົມໃຊ້ໄຟຟ້າແລ້ວກວມເຖິງ 90% ຂອງຈຳນວນບ້ານໃນທົ່ວປະເທດ ແລະ ຄອບຄົວທີ່ໄດ້ຊົມໃຊ້ໄຟຟ້າແບບຖາວອນແລ້ວກວມເຖິງ 95% ຂອງຈຳນວນຄອບຄົວໃນທົ່ວປະເທດ.
ທົ່ວປະເທດມີແຫຼ່ງຜະລິດພະລັງງານໄຟຟ້າແລ້ວທັງໝົດ 78 ແຫ່ງ, ມີກຳລັງຕິດຕັ້ງທັງໝົດ 9.972 ເມກາວັດ, ສາມາດຜະລິດພະລັງງານໄຟຟ້າໄດ້ເຖິງ 52.211 ລ້ານກິໂລວັດໂມງຕໍ່ປີ, ນອກນັ້ນຍັງມີໂຄງການໄຟຟ້າຖ່ານຫີນ 1 ແຫ່ງ, ໂຄງການພະລັງງານໄຟຟ້າຊີວະມວນ 4 ແຫ່ງ ແລະ ໂຄງການໄຟຟ້າແສງຕາເວັນ 5 ແຫ່ງ, ໂຄງການພະລັງງານລົມ 4 ໂຄງການ.
ສຳລັບການສົ່ງອອກໄປຈຳໜ່າຍຕ່າງປະເທດສາມາດບັນລຸໄດ້ 6.457 ເມກາວັດໂດຍມີການສົ່ງອອກໄປປະເທດໄທ, ຫວຽດນາມ ແລະ ມຽນມາ.
ການເຊື່ອມໂຍງ ແລະ ຈໍາໜ່າຍໄປຍັງຕະຫຼາດອາຊຽນ ໃນກຸ່ມປະເທດອາຊຽນ ຊຶ່ງ ສປປ ລາວ ແມ່ນປະເທດ ທຳອິດທີ່ໄດ້ລິເລີ່ມ ສົ່ງຂາຍໄຟຟ້າແບບເຊື່ອມໂຍງໃນກຸ່ມປະເທດ ອາຊຽນ ຫຼື ການເຊື່ອມໂຍງກັບພາກພື້ນ. ປັດຈຸບັນ ໄດ້ສົ່ງອອກແລ້ວ ໂດຍຜ່ານປະເທດໄທ (ລາວ–ໄທ–ມາເລເຊຍ), ພ້ອມດຽວກັນນີ້ຍັງສືບຕໍ່ເຈລະຈາຊື້–ຂາຍ ແລະ ເຊື່ອມໂຍງໄປຮອດປະເທດ ສິງກະໂປ.
ຮຽບຮຽງຂ່າວ: ພຸດສະດີ