ປະຈຸບັນ ແຂວງສະຫວັນນະເຂດ ມີນັກລົງທຶນໃຫ້ຄວາມສົນໃຈເຂົ້າມາລົງທຶນເປັນຈຳນວນຫຼວງຫຼາຍ ເພື່ອສ້າງຕັ້ງ ແລະ
ຂະຫຍາຍຖານການຜະລິດ ແຕ່ແຂວງພັດພວມປະເຊີນກັບບັນຫາແຮງງານ ທີ່ຈະສາມາດຕອບສະໜອງໃຫ້ບັນດາຫົວ
ໜ່ວຍທຸລະກິດເຖິງ 2.500 ກວ່າ ຕຳແໜ່ງ.
ທ່ານຮອງເຈົ້າແຂວງໆສະຫວັນນະເຂດ ໄດ້ກ່າວໃຫ້ຮູ້ເມື່ອບໍ່ດົນມານີ້ວ່າ: ໃນໄລຍະຜ່ານມາສະຫວັນນະເຂດກໍເປັນແຂວງ
ໜຶ່ງທີ່ມີແຮງງານຫຼັ່ງໄຫຼໄປເຮັດວຽກຢູ່ທາງທິດຕາເວັນຕົກເປັນຈຳນວນຫຼາຍ, ເນື່ອງຈາກວ່າພາຍໃນແຂວງບໍ່ສາມາດ
ສະໜອງວຽກເຮັດງານທຳໃຫ້ເຂົາເຈົ້າໄດ້ ຕົ້ນຕໍກໍແມ່ນຂະແໜງອຸດສາຫະກຳ, ແຕ່ຕົກມາໃນປະຈຸບັນ ທົ່ວແຂວງໄດ້ມີ
ນັກລົງທຶນໃຫ້ຄວາມສົນໃຈເຂົ້າມາລົງທຶນເພີ່ມຂຶ້ນ ເພື່ອສ້າງໂຮງງານອຸດສາຫະກຳຢ່າງຫຼວງຫຼາຍ ໂດຍສະເພາະເຂດເສດ
ຖະກິດພິເສດສະຫວັນ-ເຊໂນ ເພື່ອມາຕັ້ງ ແລະ ຂະຫຍາຍຖານການຜະລິດ, ມາດຽວນີ້ສິ່ງທີ່ເປັນອັນທ້າທາຍກວ່າໝູ່ແມ່ນ
ບັນຫາແຮງງານເປັນຕົ້ນ ແມ່ນໂຮງງານປະກອບກ້ອງຖ່າຍຮູບນີຄອນຂອງຍີ່ປຸ່ນ ທີ່ຍ້າຍຖານການຜະລິດມາຈາກປະເທດ
ໄທ ຊຶ່ງມີຄວາມຕ້ອງການແຮງງານ ໂດຍສະເພາະແມ່ນເພດຍິງອາຍຸປະມານ 26-30 ປີ ຫຼາຍ ເຖິງ 2.500 ກວ່າ ຕຳແໜ່ງ
ປະຈຸບັນທາງແຂວງສາມາດຕອບສະໜອງແຮງງານໄດ້ພຽງແຕ່ 1.000 ກວ່າຕຳແໜ່ງ.
ນອກຈາກນັ້ນ ກໍຍັງມີຫຼາຍໂຮງງານທີ່ກຳລັງຕ້ອງການແຮງງານຕົ້ນຕໍແມ່ນ ໂຮງງານ ປະກອບລົດຂອງບໍລິສັດໂຄລາວ,
ບໍລິສັດລົດໂຕໂຢຕ້າ, KP ຜະລິດ ຜົມປອມ ແລະ ອື່ນໆ, ອີກອັນໜຶ່ງທີ່ໃໝ່ຄືໂຮງງານຕັດຫຍິບ, ຕ່ຳແຜ່ນຂອງຮົງກົງທີ່ມີ
ຄວາມຕ້ອງການແຮງງານດ່ວນທີ່ສຸດ 500 ແຮງງານ ແຕ່ແຂວງຍັງບໍ່ສາມາດຕອບສະໜອງໃຫ້ໄດ້.
ທ່ານຮອງເຈົ້າແຂວງຍັງໃຫ້ຮູ້ອີກວ່າ: ສຳລັບມາດຕະການ ທີ່ບໍ່ຢາກໃຫ້ແຮງງານຫຼັ່ງໄຫຼອອກໄປເຮັດວຽກຢູ່ຕ່າງປະເທດນັ້ນ
ແມ່ນການສ້າງວຽກເຮັດງານທຳໃຫ້ເຂົາເຈົ້າ, ປະຈຸບັນທາງແຂວງໄດ້ມີຖານການຜະລິດແລ້ວ, ແຕ່ດຽວນີ້ທີ່ພວມປະເຊີນກໍ
ແມ່ນການປະຊາສຳພັນ ເພື່ອດຶງດູດແຮງງານໃຫ້ກັບມາ ຊຶ່ງທາງແຂວງຍັງເຮັດບໍ່ໄດ້ດີເທົ່າທີ່ຄວນ, ສະນັ້ນ ຈິ່ງເຮັດໃຫ້ແຂວງ
ສະຫວັນນະເຂດຂາດແຄນແຮງງານ.
ແຫລ່ງຂ່າວ: ເສດຖະກິດ – ສັງຄົມ