ເວັບໄຊ ເດລີນິວສ໌ ລາຍງານເມື່ອວັນທີ 20 ກໍລະກົດ 2020ວ່າ ທາງຕະເວັນອອກສຽງເໜືອຂອງປະເທດອິນເດຍກຳລັງປະເຊີນໜ້າກັບສອງບັນຫາທັງອຸທົກກະໄພນໍ້າຖ້ວມໜັກ ແລະ ການແຜ່ລະບາດຂອງໄວຣັດຄວິດ-19 ປະຊາຊົນຕ້ອງອົບພະຍົບໄປຢູ່ສູນພັກອາໄສຊົ່ວຄາວ ເຮັດໃຫ້ການຮັກສາໄລຍະຫ່າງທາງສັງຄົມເຮັດໄດ້ຍາກຂຶ້ນກວ່າເກົ່າ ເຊິ່ງທາງເຈົ້າໜ້າທີ່ໄດ້ຮຽກຮ້ອງໃຫ້ຜູ້ອົບພະຍົບໃສ່ຜ້າປິດປາກ.
ທ່ານ ແສງຮາມິຕຣາ ຊັນຍານ ເຈົ້າໜ້າທີ່ສຳນັກງານບໍລິຫານຈັດການອຸທົກກະໄພລັດອັສສຳທາງຕະເວັນອອກສຽງໃຕ້ຂອງອິນເດຍເປີດເຜີຍວ່າ ລະດັບໃນແມ່ນໍ້າພົມມະຫາບຸດອາດສູງຂຶ້ນອີກ 11 ແມັດ ເພາະສອງອາທິດກ່ອນໜ້ານີ້ລະດັບນໍ້າກໍ່ໄດ້ລົ້ນຕາຝັ່ງ ເຮັດໃຫ້ນໍ້າໄຫຼເຂົ້າຖ້ວມກວ່າ 2,500 ບ້ານ ແລະ ນໍ້າຖ້ວມຕັ້ງແຕ່ເດືອນ ພຶດສະພາ ທີ່ຜ່ານມາ ເຮັດໃຫ້ປັດຈຸບັນມີປະຊາຊົນຂາດທີ່ຢູ່ອາໄສແລ້ວ 2.75ລ້ານຄົນ ແລະ ມີຜູ້ເສຍຊີວິດ 84ຄົນ.
ລັດອັສສຳຍັງເປັນພື້ນທີ່ໃນການປູກຊາທີ່ມີຊື່ສຽງຂອງອິນເດຍ ແຕ່ກໍ່ຖືກນໍ້າຖ້ວມທຸກປີ ເຖິງແມ່ນວ່າຈະມີການປ້ອງກັນນໍ້າຖ້ວມແລ້ວກໍ່ຕາມ, ນອກຈາກນີ້ ນໍ້າຍັງຖ້ວມເຂດອຸທະຍານແຫ່ງຊາດຄາຊິລັງກາ ຖິ່ນອາໄສຂອງແຣດນໍດຽວ ເຊິ່ງໄດ້ສົ່ງຜົນໃຫ້ຕແຣດກວ່າ 2,500ໂຕ ໄດ້ຮັບຄວາມເດືອດຮ້ອນ ມີໂຕແຣດຈົມນໍ້າຕາຍ 9ໂຕ ລວມເຖິງສັດຊະນິດອື່ນອີກ 100ໂຕ.
ຮຽບຮຽງຂ່າວ: ພຸດສະດີ