ກາຍເປັນປະເດັນທີ່ກ່າວເຖິງໃນໂລກອອນລາຍຫຼາຍທີ່ສຸດໃນຕອນນີ້ ຫຼັງຈາກຄລິບວິດີໂອທີ່ຖືກເຜີຍແຜ່ຜ່ານ ເຟສບຸ໊ກເພສ ສະມາຄົມອາສາ ກູ້ໄພ ນະຄອນຫຼວງວຽງຈັນ ແຈ້ງເຫດສຸກເສີນ ໂທ 1624 ເມື່ອຄືນຂອງວັນທີ່ 16 ກໍລະກົດ ທີ່ຜ່ານມາ.
ໂດຍໃນລະຫວ່າງເຈົ້າໜ້າທີ່ອາສາກູ້ໄພກຳລັງນັ່ງຫຼິ້ນລໍຖ້າອອກເຫດຢູ່ຈຸດບ້ານ ດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ກໍ່ມີຊາຍຄົນໜຶ່ງຂັບລົດຜ່ານ ແລະ ເຂົ້າມາຫາເລື່ອງອາສາ (ຄົນທີ່ມີເລື່ອງໃນຄລິບ) ໂດຍຊາຍຄົນດັ່ງກ່າວອ້າງວ່າ ອາສາຄົນນີ້ແນມໜ້າຕົນ ຈຶ່ງເກີດຄວາມບໍ່ພໍໃຈ ຈາກນັ້ນກໍ່ເຂົ້າມາຫາເລື່ອງໂດຍການຊົກເຂົ້າໄປທີ່ໜ້າຂອງອາສາກ່ອນ ຈາກນັ້ນກໍ່ເກີດການຕໍ່ສູ້ກັນ ດັ່ງທີ່ປະກົດໃນຄລິບ. ຈາກນັ້ນ, ຊາຍຄົນດັ່ງກ່າວເຫັນທ່າສູ້ບໍ່ໄຫວຈຶ່ງໄດ້ຖອຍໄປຕັ້ງຫຼັກກ່ອນ ແລະ ອີກບໍ່ດົນກໍ່ໄດ້ພາເພື່ອນມາຊ່ວຍຕົນໃນການກໍ່ອາລະວາດໃນຄັ້ງນີ້.
ທາງອາສາໄດ້ອະທິບາຍວ່າ ພວກຕົນນັ່ງຫຼິ້ນຢູ່ດ້ານໜ້າ ແລະ ກໍ່ໄດ້ແນມເບິ່ງລົດກາຍທາງຕາມປົກກະຕິ ແຕ່ກໍ່ມີຊາຍຄົນດັ່ງກ່າວເຂົ້າມາຫາເລື່ອງ ດັ່ງທີ່ເຫັນໃນຄລິບ.
ສຳລັບເຫດການດັ່ງກ່າວນີ້ເປັນປະກົດການຫຍໍ້ທໍ້ໃນສັງຄົມອີກໜຶ່ງເຫດການທີ່ໄດ້ຮັບສຽງວິພາກວິຈານຈາກສັງຄົມຈຳນວນຫຼາຍເຖິງຄວາມບໍ່ເໝາະສົມຕໍ່ການກະທຳຂອງຄົນກຸ່ມນີ້ທີ່ເຂົ້າມາຫາເລື່ອງອາສາກູ້ໄພ ໂດຍມີສາເຫດມາຈາກການ “ເບິ່ງໜ້າ” ເທົ່ານັ້ນ.
ຫຼ້າສຸດມື້ນີ້ ວັນທີ 17 ກໍລະກົດ 2020 ເຈົ້າໜ້າທີ່ຕຳຫຼວດເມືອງຫາດຊາຍຟອງ ສາມາດຈັບໂຕຫົວໂຈກຜູ້ກໍ່ເຫດດັ່ງກ່າວໄດ້ແລ້ວ, ປັດຈຸບັນກຳລັງຢູ່ໃນຂັ້ນຕອນສືບສວນສອບສວນ ເພື່ອນຳຈັບຜູ້ຮ່ວມຂະບວນການມາດຳເນີນຄະດີຮ່ວມກັນ.
https://www.facebook.com/1624RescueVientiane/videos/pcb.1564659363713452/2768266293452418/?type=3&theater
https://www.facebook.com/1624RescueVientiane/videos/pcb.1564659363713452/273842383912933/?type=3&theater
ຮຽບຮຽງຂ່າວ: ພຸດສະດີ