ເວັບໄຊ bbc.com ລາຍງານວ່າ ໄວຣັດໄຂ້ຫວັດສາຍພັນໃໝ່ຫຼ້າສຸດທີ່ພົບໃນຈີນມີຄວາມຄ້າຍຄືກັບໄວຣັດໄຂ້ຫວັດໝູທີ່ລະບາດໃຫຍ່ໃນປີ 2009, ນັກວິທະຍາສາດຄົ້ນພົບໄວຣັດສາຍພັນໃໝ່ໃນຈີນ ເຊິ່ງມີສັກກະຍາພາບທີ່ຈະກໍ່ໃຫ້ເກີດການລະບາດຄັ້ງໃຫຍ່ໄດ້ ໄວຣັດຊະນິດນີ້ມີໝູເປັນພາຫະນະ ແລະ ສາມາດຕິດຕໍ່ສູ່ຄົນໄດ້ ຜູ້ຊ່ຽວຊານດ້ານໄວຣັດກຳລັງກັງວົນວ່າມັນອາດຈະກາຍພັນຈົນເຮັດໃຫ້ຕິດຕໍ່ຈາກຄົນສູ່ຄົນໄດ້ງ່າຍ ແລະ ກາຍເປັນການລະບາດໃຫຍ່ໃນທີ່ສຸດ.
ແນວໃດກໍ່ຕາມ, ເຖິງແມ່ນວ່າສະຖານະການຂອງໄວຣັດຊະນິດນີ້ຈະຍັງບໍ່ເຖິງຂັ້ນວິຕົກກັງວົນຫຼາຍ ແຕ່ນັກວິທະຍາສາດບອກວ່າມັນມີອົງປະກອບຄົບທຸກຢ່າງທີ່ພັດທະນາກາຍເປັນໄວຣັດທີ່ຕິດຕໍ່ໄປສູ່ມະນຸດ ແລະ ຈຳເປັນທີ່ຈະຕ້ອງຈັບຕາເບິ່ງຢ່າງໃກ້ຊິດ ເນື່ອງຈາກທີ່ເປັນໄວຣັດສາຍພັນໃໝ່ ມະນຸດຈຶ່ງມີພູມຄຸ້ມກັນຕໍ່ໄວຣັດຊະນິດນີ້ຕໍ່າຫຼາຍ ຫຼື ອາດບໍ່ມີເລີຍ.
ໄວຣັດໄຂ້ຫວັດໃຫຍ່ສາຍພັນໃໝ່ນີ້ມີຊື່ຮຽກຢ່າງບໍ່ເປັນທາງການວ່າ G4 EA H1N1 ມັນສາມາດເພີ່ມຈຳນວນໄດ້ເມື່ອເຂົ້າໄປຢູ່ໃນເຊລທາງເດີນຫາຍໃຈຂອງມະນຸດ ຜູ້ຊ່ຽວຊານກວດພົບຮ່ອງຮອຍການຕິດເຊື້ອໄວຣັດນີ້ໃນກຸ່ມຄົນງານໃນໂຮງງານຂ້າສັດ ແລະ ໃນອຸດສາຫະກຳລ້ຽງໝູໃນຈີນ. ວັກຊີນໄຂ້ຫວັດໃຫຍ່ທີ່ມີຢູ່ໃນປັດຈຸບັນບໍ່ສາມາດປ້ອງກັນຊະນິດນີ້ໄດ້ ແຕ່ອາດພັດທະນາໃຫ້ປ້ອງກັນໄດ້ຫາກມີຄວາມຈຳເປັນ.
ຮຽບຮຽງຂ່າວ: ພຸດສະດີ