ສຳນັກຂ່າວສານປະເທດລາວ ລາຍງານໃຫ້ຮູ້ວ່າ ລັດວິສາຫະກິດໄຟຟ້າລາວ ຈະປັບຫຼຸດລາຄາໄຟຟ້າສໍາລັບຄົວເຮືອນທີ່ໃຊ້ໄຟຟ້າຕໍ່າກວ່າ 461 ກິໂລວັດໂມງ ຕໍ່ເດືອນ ຫຼືແຕ່ 151-461 ກິໂລວັດໂມງ (151-461 kwh). ການດັດປັບດັ່ງກ່າວແມ່ນຈະຖືກຈັດຕັ້ງປະຕິບັດສະເພາະພຽງແຕ່ 3 ເດືອນ ຄື: ນັບແຕ່ເດືອນເມສາ, ພຶດສະພາ ແລະ ມິຖຸນາ.
ແຜນການດັດປັບລາຄາໄຟຟ້ານີ້ ແມ່ນໄດ້ຖືກເຜີຍແຜ່ໃນວັນທີ 18 ມີຖຸນາ ຜ່ານມານີ້ ໃນກອງປະຊຸມຖະແຫຼງຂ່າວພາຍໃຕ້ການເປັນປະທານຮ່ວມຂອງ ທ່ານ ຈະເລີນ ເຢຍປາວເຮີ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ໂຄສົກລັດຖະບານ, ທ່ານ ດຣ ຄໍາມະນີ ອີນທິລາດ ລັດຖະມົນຕີກະຊວງພະລັງງານ-ບໍ່ແຮ່ ແລະ ທ່ານ ຈັນທະບູນ ສຸກອາລຸນ ຜູ້ວ່າການອໍານວຍການລັດວິສາຫະກິດໄຟຟ້າລາວ ພາຍຫຼັງກອງປະຊຸມລັດຖະບານປະຈໍາເດືອນມີຖຸນາ ກ່ຽວກັບການຄົ້ນຄວ້າ ກວດກາຄືນ ການກໍານົດໂຄງສ້າງລາຄາໄຟຟ້າ ໃນໄລຍະ 2020 ຫາ 2025 ທີ່ໄດ້ປະກາດໃຊ້ໃນວັນທີ 01 ພຶດສະພາ 2020 ແລະ ປັບປຸງ ການປະຕິບັດນະໂຍບາຍລາຄາໄຟຟ້າຕໍ່ບາງກຸ່ມຜູ້ໃຊ້ໄຟຟ້າ ໃນໄລຍະການແຜ່ລະບາດຂອງພະຍາດ ໂຄວິດ-19.
ການດັດປັບລາຄາໄຟຟ້ານີ້ແມ່ນໜື່ງທີ່ນອນໃນການຈັດຕັ້ງປະຕິບັດມາດຕະການຫຼຸດຜ່ອນຜົນກະທົບຈາກວິກິດການແຜ່ລະບາດຂອງພະຍາດໂຄວິດ-19 ຢູ່ໃນທົ່ວໂລກ ແລະ ສປປ ລາວ ຂອງລັດຖະບານ.
ຮຽບຮຽງຂ່າວ: ພຸດສະດີ