ໜັງສືພິມວຽງຈັນທາມ ລາຍງານໃຫ້ຮູ້ວ່າ ນະຄອນຫລວງວຽງຈັນເລັ່ງແກ້ໄຂບັນຫາສາຍໄຟ, ໂທລະຄົມ, ອິນເຕີເນັດ, ໂທລະສັບ, ສາຍເຄເບີນ ແລະ ສາຍອື່ນໆ ທີ່ແລ່ນ ຫຼື ເກາະຫ້ອຍຢູ່ຕາມເສົາໄຟຟ້າ; ບາງບ່ອນມີສາຍຂາດ, ສາຍຍານ, ບາງສາຍບໍ່ໄດ້ນໍາໃຊ້ແລ້ວ ແຕ່ບໍ່ມີການຮື້ຖອນອອກ ຊຶ່ງບໍ່ເປັນລະບຽບຮຽບຮ້ອຍຕາມເສັ້ນທາງຕ່າງໆ ແລະ ໄດ້ກໍ່ໃຫ້ ເກີດອຸບັດເຫດ ໂດຍສະເພາະມີການເກາະຄໍ ຜູ້ຂັບຂີ່ລົດຈັກ ແລະ ລົດຖີບ.
ການເເກ້ໄຂ ຫຼື ປັບປຸງບັນດາສາຍດັ່ງກ່າວທີ່ບໍ່ເປັນລະບຽບນີ້ ແມ່ນເພື່ອປະຕິບັດຕາມຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ.
ຜ່ານມານະຄອນຫຼວງ ໄດ້ສຳເລັດການແກ້ໄຂບັນຫາສາຍດັ່ງກ່າວທີ່ບໍ່ເປັນລະບຽບ ແລ້ວຢູ່ 4 ເສັ້ນທາງຄື ເສັ້ນທາງສຸພານຸວົງ, ເສັ້ນທາງເຈົ້າອະນຸວົງ, ເສັ້ນທາງໄກສອນພົມວິຫານ ແລະ ເສັ້ນທາງ 13 ເໜືອ ໂດຍໄດ້ຜູກມັດບັນດາຊຸມສາຍທີ່ຂາດຢ່ອນຍານເຂົ້າກັນ ໂດຍມີການຮ່ວມມືກັບ ບັນດາບໍລິສັດທີ່ໃຫ້ບໍລິການໂທລະຄົມມະນາຄົມ ໄຟຟ້ານະຄອນຫຼວງ, ໂຄງການສື່ສານຮັບໃຊ້ການນຳ ແລະ ບໍລິສັດເຄເບີນໃຊ້ສາຍ.
ຮຽບຮຽງຂ່າວ: ພຸດສະດີ