ສຳນັກຂ່າວ ເດີ ສະຕາ ລາຍງານວ່າ ຈີນໂຈະການຊໍາລະໜີ້ໃຫ້ແກ່ 77 ປະເທດ ເຊິ່ງເປັນໜຶ່ງໃນນະໂຍບາຍເພື່ອຊ່ວຍບັນດາປະເທດຕ່າງໆທີ່ມີຄວາມຫຍຸ້ງຍາກ ໃນຂະນະທີ່ມີການແຜ່ເຊື້ອຂອງໄວຣັສໂຄວິດ-19, ເຖິງຢ່າງໃດກໍຕາມ ຍັງບໍ່ມີລາຍຊື່ວ່າປະເທດໃດທີ່ຈະໄດ້ຮັບນະໂຍບາຍນີ້ເທື່ອ.
ທ່ານ ມາ ເຈົາຊູ ຮອງລັດຖະມົນຕີ ກະຊວງການຕ່າງປະເທດຂອງຈີນ ໄດ້ປະກາດໃນງານຖະແຫຼງຂ່າວ ແລະ ໄດ້ເຜີຍແຜ່ບົດຄົ້ນຄວ້າຂອງລັດຖະບານໃນການຕໍ່ສູ້ກັບເຊື້ອໄວຣັດໂຄໂຣນາ. ບົດຄົ້ນຄວ້າດັ່ງກ່າວມີຊື່ວ່າ “Fighting Covid-19: China in Action” ອອກໂດຍ ສຳນັກງານຄະນະກຳມະການຂໍ້ມູນຂ່າວສານຂອງປະເທດ ໃນວັນທີ 7 ມິຖຸນາ 2020.
ທ່ານ ມາ ໄດ້ກ່າວວ່າ ປະເທດຈີນໄດ້ສົ່ງຄວາມຊ່ວຍເຫຼືອໄປໃຫ້ 150 ປະເທດທົ່ວໂລກໃນຮູບການຕ່າງໆ ລວມໄປເຖິງ ການສົ່ງທີມແພດອອກໄປຊ່ວຍເຫຼືອ. ”ເວລາທີ່ພວກເຮົາຕົກຢູ່ໃນສະຖານະການທີ່ລໍາບາກທີ່ສຸດ, ຜູ້ນໍາໃນຫຼາຍກວ່າ 170 ປະເທດ, ຫົວໜ້າອົງການສາກົນຕ່າງໆຫຼາຍກວ່າ 50 ອົງການ ແລະ ພັກການເມືອງກວ່າ 300 ພັກ ໄດ້ສົ່ງກຳລັງໃຈ ແລະ ການສະໜັບສະໜູນມາໃຫ້ພວກເຮົາ.“
”ມີ 77 ປະເທດ ແລະ 12 ອົງການຈັດຕັ້ງສາກົນໄດ້ສົ່ງເຄື່ອງຊ່ວຍເຫຼືອມາໃຫ້ພວກເຮົາ ເພື່ອຕໍ່ສູ້ກັບໄວຣັສດັ່ງກ່າວ, ແລະ ຜູ້ຄົນທົ່ວໂລກຕ່າງສົ່ງການສະໜັບສະໜູນໃຫ້ ສປ ຈີນ ໃນຮູບແບບຕ່າງໆ. ພວກເຮົາຈະບໍ່ລືມມິດຕະພາບອັນດີງາມນີ້“.
ຮຽບຮຽງໂດຍ: ລັດສະໝີ ພອນວິໄລ