ໜັງສືພິມເສດຖະກິດ-ການຄ້າ ລາຍງານໃຫ້ຮູ້ວ່າ ຂົວເຫຼັກເກົ່ານໍ້າພະນາຍ ບ້ານເກິນກາງ ເມືອງທຸລະຄົມ ແຂວງວຽງຈັນ ຫັກຊຸດໂຕລົງພ້ອມລົດພວງແກ່ຊີມັງ ພາໃຫ້ການສັນຈອນເປັນອໍາມະພາດ ແລະ ຕັດຂາດລະບົບນໍ້າປະປາ ບໍລິເວນໃກ້ຄຽງ ເຊິ່ງອໍານາດການປົກຄອງ ເມືອງທຸລະຄົມ ແຂວງວຽງຈັນ ກໍາລັງກໍ່ສ້າງເສັ້ນທາງເວັ້ນ ເພື່ອໃຫ້ພາຫະນະສັນຈອນໄປໄດ້ເປັນປົກກະຕິ.
ທ່ານ ສຸລິກັນ ປະຊາຊົນ ບ້ານເກິນ ຜູ້ເຫັນເຫດການໄດ້ໃຫ້ສຳພາດວ່າ: ເຫດຂົວຫັກແມ່ນໄດ້ເກີດຂຶ້ນເວລາປະມານ 7 ໂມງເຊົ້າ ເຊິ່ງກ່ອນເກີດເຫດມີລົດພວງແກ່ສີມັງ 3 ຄັນ ຂີ່ຜ່ານຂົວດັ່ງກ່າວ ຄັນທີ 1 ແມ່ນຜ່ານໄປຫວິດຂົວ ສ່ວນຄັນທີ່ເກີດເຫດແມ່ນຄັນທີ 2 ກຳລັງແລ່ນມາຮອດກາງຂົວໆກໍ່ຍຸບໂຕລົງ ເຮັດໃຫ້ລົດຄັນດັ່ງກ່າວນີ້ຕົກລົງໄປນຳ ເຊິ່ງໂຊເຟີແມ່ນເປັນຄົນຈີນ, ຜ່ານມາກໍ່ບໍ່ຄ່ອຍມີລົດໃຫຍ່ປານນີ້ຂີ່ຜ່ານ ເພາະເພິ່ນຈະມີທາງເວັ້ນໃຫ້ ແຕ່ນີ້ອາດຍ້ອນໂຊເຟີບໍ່ຄ່ອຍຮູ້ທາງ ຫຼື ແນວໃດຈຶ່ງຂັບຜ່ານຂົວນີ້ແບບບໍ່ສັງເກດ ຫຼື ຄິດໄລ່ວ່າສະພາບຂົວຈະຮັບນໍ້າໜັກລົດຕົນເອງໄດ້ບໍ່.
ທ່ານ ຄຳພູທອນ ສີຫາປັນຍາ ຮອງນາຍບ້ານໆເກິນກາງ ໄດ້ໃຫ້ສຳພາດວ່າ: ຂົວແຫ່ງນີ້ສ້າງມາດົນແລ້ວ ຕັ້ງແຕ່ສ້າງທາງເລກ 10 ແລະ ກ່ອນໜ້ານີ້ປະມານ 6-7 ປີ ກໍ່ໄດ້ຫັກລົງເທື່ອໜຶ່ງແລ້ວເພິ່ນກໍ່ໄດ້ມີການປັບປຸງສ້ອມແປງຄືນ, ເຊິ່ງຢູ່ສົ້ນຂົວທັງ 2 ຟາກກໍ່ຈະມີປ້າຍເຕືອນວ່າຂົວນີ້ສາມາດຮັບນໍ້າໜັກໄດ້ບໍ່ເກີນ 25 ໂຕນເທົ່ານັ້ນ, ພາຍຫຼັງຂົວນີ້ຫັກລະບົບນໍ້າປະປາກໍ່ໃຊ້ບໍ່ໄດ້ ເພາະທໍ່ນໍ້າປະປາທີ່ແລ່ນໄປຕາມຂົວກໍ່ໄດ້ຫັກລົງເຊັ່ນດຽວກັນ ແລະ ການສັນຈອນໄປມາຂອງພໍ່ແມ່ປະຊາຊົນກໍ່ຍາກຂຶ້ນອີກເພາະຕ້ອງໄດ້ໄປທຽວທາງເວັ້ນ ເຊິ່ງມັນຈະໄກ ແລະ ເປັນທາງປ່ຽວອາດສ່ຽງຕໍ່ຄວາມປອດໄພ ເພາະກ່ອນໜ້ານີ້ທີ່ຂົວນີ້ຫັກປະຊາຊົນກໍ່ໄປໃຊ້ເສັ້ນທາງນັ້ນກໍ່ໄດ້ເກີດເຫດການປຸ້ນຈີ້ເອົາຊັບເກີດຂຶ້ນ.
ທ່ານ ນາງ ວົງເດືອນ ວັດຕະໂສ ເຈົ້າເມືອງທຸລະຄົມ ແຂວງວຽງຈັນ ໄດ້ກ່າວຕໍ່ທີມຂ່າວວຽງຈັນທາຍວ່າ: ຜູ້ຂັບລົດຄັນດັ່ງກ່າວ ໄດ້ຮັບບາດເຈັບສົມຄວນ ແລະ ໄດ້ຖືກນໍາສົ່ງໄປປິ່ນປົວຢູ່ໂຮງໝໍ ເປັນທີ່ຮຽບຮ້ອຍແລ້ວ.
ດ້ານຫ້ອງການໂຍທາທິການ ແລະ ຂົນສົ່ງ ເມືອງທຸລະຄົມ ແຂວງວຽງຈັນ ໄດ້ໃຫ້ຮູ້ວ່າ: ການສັນຈອນຂອງພໍ່ແມ່ປະຊາຊົນຫຍຸ້ງຍາກຂຶ້ນຕື່ມ ເພາະຕ້ອງໄປໃຊ້ທາງເວັ້ນທີ່ໄກກວ່າ, ສ່ວນດ້ານເຕັກນິກຂົວນີ້ແມ່ນເປັນຂົວເຫຼັກທີ່ຮອງຮັບນໍ້າໜັກໄດ້ພຽງແຕ່ 25 ໂຕນລົງມາ ເຊິ່ງພວກເຮົາກໍ່ມີປ້າຍຕິດຕັ້ງຢູ່ 2 ເບື້ອງກ່ອນເຂົ້າຂົວ, ສ່ວນແຜນຈະສ້ອມແປງອັນຮີບດ່ວນກໍ່ຈະສ້ອມແປງຂົວເຫຼັກໃຫ້ກັບມາສາມາດສັນຈອນໄດ້ເປັນປົກກະຕິ ສ່ວນວ່າເຫດການຄັ້ງນີ້ແມ່ນຕ້ອງກວດສອບເບິ່ງກ່ອນວ່າເປັນຍ້ອນເຕັກນິກຂອງຂົວ ຫຼື ເປັນຍ້ອນນໍ້າໜັກຂອງລົດຄັນທີ່ເກີດເຫດ.
ຮຽບຮຽງຂ່າວ: ພຸດສະດີ