ໜັງສືພິມວຽງຈັນໃໝ່ລາຍງານໃຫ້ຮູ້ວ່າ ໂຄງການກໍ່ສ້າງເສັ້ນທາງເບຕົງສີ່ແຍກໄຟອຳນາດຕານມີໄຊ ຫາສາມແຍກສີເກີດ ນະຄອນຫຼວງວຽງຈັນ ເປັນເສັ້ນທາງທີ່ມີປະລິມານການສັນຈອນໜາແໜ້ນ ແລະ ເປັນເສັ້ນທາງທີ່ບໍ່ມີທາງເວັ້ນ ເຮັດໃຫ້ການກໍ່ສ້າງຂອງບໍລິສັດຜູ້ຮັບເໝົາພົບຄວາມຫຍຸ້ງຍາກ. ປັດຈຸບັນ, ໂຄງການດັ່ງກ່າວໄດ້ດຳເນີນການກໍ່ສ້າງມີຄວາມຄືບໜ້າ 85% ແລະ ຄາດວ່າຈະສຳເລັດ 100% ໃນເດືອນ ກໍລະກົດ 2020.
ພະແນກໂຍທາທິການ ແລະ ຂົນສົ່ງນະຄອນຫຼວງວຽງຈັນເປັນເຈົ້າຂອງໂຄງການ ໂດຍມີ ກຸ່ມບໍລິສັດ ຕັງຈະເລີນ ຈຳກັດຜູ້ດຽວເປັນຜູ້ຮັບເໝົາກໍ່ສ້າງ ແລະ ການກໍ່ສ້າງຕາມສັນຍາໃຫ້ສຳເລັດພາຍໃນ 24 ເດືອນ (13/92016-13/92018) ພາຍຫຼັງໝົດອາຍຸສັນຍາສະບັບຕົ້ນ ບໍລິສັດໄດ້ຕໍ່ສັນຍາຄັ້ງທີ 1 ເພີ່ມອີກ 9 ເດືອນ ນັບແຕ່ເດືອນຕຸລາ 2018 ຮອດເດືອນກໍລະກົດ 2019 ໂຄງການຄືບໜ້າ 71,06% ທຽບໃສ່ແຜນການຫຼ້າຊ້າ 28,94% ເພື່ອສືບຕໍ່ໜ້າວຽກໃຫ້ສຳເລັດ ບໍລິສັດຮັບເໝົາກໍ່ສ້າງຈຶ່ງສະເໜີຂໍຕໍ່ສັນຍາຄັ້ງທີ 2 ເພີ່ມອີກ 12 ເດືອນ ຮອດເດືອນກໍລະກົດ 2020 ເພື່ອຈະປະຕິບັດໃຫ້ສຳເລັດ 100%. ຜົນສຳເລັດການຈັດການກໍ່ສ້າງຮອດເດືອນກຸມພາ 2020 ບໍລິສັດຮັບເໝົາປະຕິບັດບັນດາໜ້າວຽກທີ່ລະບຸໄວ້ໃນສັນຍາຄື: ວຽກທົ່ວໄປປະຕິບັດ 100%, ວຽກດິນປະຕິບັດໄດ້ 125,5%, ວຽກໂຄງສ້າງທາງ ປະຕິບັດໄດ້ 81,23%, ວຽກລະບົບລະບາຍນໍ້າ ປະຕິບັດໄດ້ 93,48%, ວຽກຕົບແຕ່ງ ແລະ ວຽກອື່ນໆ ປະຕິບັດໄດ້ 32,47%; ທຽບໃສ່ແຜນການປະຕິບັດໄດ້ 85,01% ທຽບໃສ່ແຜນການລວມແມ່ນຫຼ້າຊ້າ 14,99%.
ເຊິ່ງສາເຫດທີ່ພາໃຫ້ຊັກຊ້າ ຍ້ອນການຍົກຍ້າຍສິ່ງກີດຂວາງຢູ່ໃນຂອບເຂດກໍ່ສ້າງ ເປັນຕົ້ນລະບົບນໍ້າປະປາ, ສາຍໄຍແກ້ວ, ຕາຂ່າຍໄຟຟ້າ ແລະ ສິ່ງປຸກສ້າງຂອງປະຊາຊົນມີຄວາມຫຼ້າຊ້າ ໃຊ້ເວລາດົນໃນການໄກ່ເກ່ຍ ເຮັດໃຫ້ການກໍ່ສ້າງພົບຄວາມຫຍຸ້ງຍາກ ການສະໜອງທຶນຮອນເຂົ້າໃນການຈັດຕັ້ງປະຕິບັດກໍ່ສ້າງ ບາງຄັ້ງຊັກຊ້າ ບໍ່ສາມາດຕອບສະໜອງຕາມແຜນການໜ້າວຽກຕົວຈິງທີ່ວາງໄວ້ ເປັນຕົ້ນແມ່ນ ວັດສະດຸ, ກົນຈັກ, ແຮງງານ ແລະ ງົບປະມານທີ່ໄດ້ຮັບການແບ່ງປັນຈາກລັດຖະບານ ເພື່ອຊຳລະໃຫ້ຜູ້ຮັບເໝົາແມ່ນມີໜ້ອຍ ບໍ່ສາມາດຕອບສະໜອງໄດ້ຕາມສັນຍາທີ່ກຳນົດໄວ້.
ຮຽບຮຽງຂ່າວ: ພຸດສະດີ