ໜັງສືພິມວຽງຈັນທາມ ລາຍງານໃຫ້ຮູ້ວ່າ ກະຊວງສຶກສາທິການ ແລະ ກິລາ (ສສກ) ໄດ້ມີມະຕິຕົກລົງທີ່ກອງປະຊຸມໃນວັນທີ 27 ເມສາ 2020 ທີ່ຜ່ານມາ ໂດຍໄດ້ແນະນໍາໃຫ້ຜູ້ປະກອບການໂຮງຮຽນພາກເອກະຊົນ ຫາທາງຮ່ວມກັນກັບບັນດາຄູອາຈານ ແລະ ຜູ້ປົກຄອງນັກຮຽນ ເລື່ອງການຈ່າຍພັນທະຄ່າຮຽນ ແລະ ເງິນເດືອນຂອງຄູ.
ທັງນີ້, ສືບເນື່ອງຈາກ ໃນວັນທີ 24 ເມສາ 2020 ກະຊວງ ສສກ ໄດ້ອອກແຈ້ງການໃຫ້ຜູ້ປະກອບການສະຖາບັນການສຶກສາເອກະຊົນ ຈ່າຍເງິນເດືອນໃຫ້ຄູ-ອາຈານ ແລະ ພະນັກງານ ປົກກະຕິໃນເດືອນເມສາ 2020 ບໍ່ໃຫ້ຫຼຸດ 50% ຂອງເງິນເດືອນປົກກະຕິ ແລະ ບໍ່ໃຫ້ຫຼຸດຄ່າແຮງງານຂັ້ນຕໍ່າ ທີ່ກະຊວງ ແຮງງານ ແລະ ສະຫວັດດີການສັງຄົມ ກໍານົດໄວ້.
ພ້ອມກັນນັ້ນ ກໍ່ຮຽກຮ້ອງ ໃຫ້ຜູ້ປົກຄອງຈ່າຍຄ່າຮຽນໃຫ້ສະຖາບັນການສຶກສາພາກເອກະຊົນ ປົກກະຕິໃນເດືອນ ເມສາ 2020 ບໍ່ໃຫ້ຫຼຸດ 50% ຂອງຄ່າຮຽນປົກກະຕິ. ຜ່ານການລາຍງານຂອງສະມາຄົມການສຶກສາພາກເອກະຊົນ ເຫັນວ່າສະຖາບັນການສຶກສາພາກເອກະຊົນມີຫຼາຍລະດັບ ແລະ ໄດ້ຮັບຜົນກະທົບທີ່ແຕກຕ່າງກັນໃນຊ່ວງການແຜ່ລະບາດຂອງພະຍາດໂຄວິດ-19. ຕໍ່ບັນຫາດັ່ງກ່າວ ກະຊວງ ສສກ ຈຶ່ງໄດ້ມີມະຕິໃນກອງປະຊຸມຄັ້ງວັນທີ 27 ເມສາ 2020 ໂດຍເຫັນດີໃຫ້ສະມາຄົມການສຶກສາພາກເອກະຊົນ ໄປປຶກສາຫາຫຼືກັບບັນດາຜູ້ປະກອບການສະຖາບັນການສຶກສາພາກເອກະຊົນ ເພື່ອປະສານສົມທົບກັບພໍ່ແມ່ຜູ້ປົກຄອງ ແລະ ຄູ-ອາຈານ ເພື່ອຫາທາງອອກທີ່ເໝາະສົມຮ່ວມກັນຕາມແຕ່ລະກໍລະນີ.
ຮຽບຮຽງຂ່າວ: ພຸດສະດີ