ສຳນັກຂ່າວຕ່າງປະເທດລາຍງານໃຫ້ຮູ້ວ່າ ຈີນປະກາດມອບເງິນສະໜັບສະໜູນອົງການອະນາໄມໂລກ 30 ລ້ານໂດລາ ຫຼັງຈາກທີ່ປະທານາທິບໍດີ ໂດນັລ ທຣັມ ສັ່ງລັດຖະບານອາເມລິກາຢຸດຕິການສະໜັບສະໜູນອົງກອນດັ່ງກ່າວ.
ທ່ານ ເກິ້ງ ສ່ວງ ໂຄສົກກະຊວງການຕ່າງປະເທດຂອງຈີນລະບຸວ່າ ການບໍລິຈາກເງິນ 30 ລ້ານໂດລາ ເປັນສ່ວນເພີ່ມເຕີມຈາກເງິນສະໜັບສະໜູນ 20 ລ້ານໂດລາ ທີ່ລັດຖະບານຈີນສັນຍາວ່າຈະມອບໃຫ້ກັບອົງການອານາໄມໂລກ ໂດຍການມອບເງິນຊ່ວຍເຫຼືອນີ້ເປັນການສະທ້ອນເຖິງຄວາມເຊື່ອໝັ້ນທີ່ລັດຖະບານຈີນ ແລະ ປະຊາຊົນມີຕໍ່ອົງກອນນີ້ ພ້ອມເປັນການຊ່ວຍເພີ່ມສັກກະຍາພາບຂອງລະບົບສາທາລະນະສຸກໃນປະເທດຕ່າງໆ.
ການມອບເງິນຊ່ວຍເຫຼືອເພີ່ມເຕີມຈາກລັດຖະບານຈີນເກີດຂຶ້ນຫຼັງຈາກອາທິດທີ່ຜ່ານມາ ທີ່ປະທານາທິບໍດີ ໂດນັລ ທຣັມ ຜູ້ນຳອາເມລິກາປະກາດຢຸດຕິການມອບເງິນຊ່ວຍເຫຼືອໃຫ້ແກ່ອົງການອານາໄມໂລກ ເຊິ່ງທຣໍ້າໄດ້ກ່າວຫາວ່າ WHO ປົກປິດຄວາມຮຸນແຮງຂອງການແຜ່ລະບາດໄວຣັດໂຄວິດ-19 ໃນຈີນ ກ່ອນແຜ່ກະຈາຍໄປທົ່ວໂລກ.
ນອກຈາກນີ້, ທຣັມ ຍັງສະແດງຄວາມບໍ່ພໍໃຈທີ່ລັດຖະບານອາເມລິກາຕ້ອງຈັດສັນງົບປະມານປີລະ 400 – 500 ລ້ານໂດລາ ເພື່ອສະໜັບສະໜູນການເຮັດວຽກຂອງອົງການອານາໄມໂລກ ໃນຂະນະທີ່ຈີນຈ່າຍເງິນພຽງປີລະ 40 ລ້ານໂດລາເທົ່ານັ້ນ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: www.pptvhd36.com