ພາຍຫຼັງສຳເລັດການປະຕິບັດວຽກງານໃນເບື້ອງຕົ້ນຢູ່ທີ່ນະຄອນຫຼວງວຽງຈັນ ໃນວັນທີ 7 ເມສາ 2020 ຄະນະແພດຜູ້ຊ່ຽວຊານ ຈາກ ສປ ຈີນທັງ 12 ທ່ານ ກໍໄດ້ສືບຕໍ່ລົງເຄື່ອນໄຫວຢູ່ຕ່າງແຂວງ ໂດຍໄດ້ແບ່ງເປັນ 2 ທີມ ເພື່ອລົງພື້ນທີ່ແຂວງ ຫຼວງພະບາງ ແລະ ແຂວງ ຈຳປາສັກ.
ການເຄື່ອນໄຫວຫຼັກກໍແມ່ນລົງສຳຫຼວດ-ປະເມີນໃນພື້ນທີ່ສ່ຽງເປັນຕົ້ນແມ່ນຂົງເຂດນະຄອນຫຼວງພະບາງ, ນະຄອນປາກເຊ ແລະ ອື່ນໆ ພ້ອມທັງເຂົ້າຮ່ວມປຶກສາຫາລື ແລະ ແລກປ່ຽນຄວາມຮູ້ວິຊາການ ກັບບຸກຄະລາກອນການແພດຝ່າຍລາວທີ່ປະຈຳຢູ່ໂຮງໝໍແຂວງ ກໍຄືບັນດາຄະນະນຳ, ເຈົ້າໜ້າທີ່ພາກສ່ວນທີ່ກ່ຽວຂ້ອງກັບວຽກງານຕ້ານການແຜ່ລະບາດຂອງພະຍາດໂຄວິດ 19.
ໂຮງໝໍແຂວງຈຳປາສັກ ຮ່ວມກັບຊ່ຽວຊານທີ່ມາຈາກ ສປ ຈີນ ຊ່ຽວຊານມາຈາກສູນກາງ ກະຊວງ ສາທານະລະສຸກ ແລະ ຊ່ຽວຊານອົງການອະນາໄມໂລກ ໃດ້ທຳການຕິດຕັ້ງປະກອບເຄື່ອງກວດ polymerase chain reaction (PCR) R (real-time) ເຄື່ອງກວດຊອກຫາເຊື້ອອັກເສບປອດ COVID-19 ເຄື່ອງໃຫຍ່ ທີ່ສາມາດກວດໃດ້ເຖິງ 92 ຕົວຢ່າງ ອ່ານຜົນໃນເວລາ 120 ນາທີ ຫຼື 2 ຊົ່ວໂມງ ເຊິ່ງຈະສາມາດຮອງຮັບຕົວຍ່າງທີ່ສົ່ງມາຈາກ 4 ແຂວງພາກໃຕ້ໄດ້ ເຊິ່ງມັນຈະສາມາດກວດຈຳນວນຫຼາຍ ແລະ ສະດວກໃນການສົ່ງຕົວຢ່າງ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: vientianemai.net