ທ່າມກາງສະຖານະການໂຄວິດ-19 ທີ່ກຳລັງລະບາດຢ່າງຕໍ່ເນື່ອງໃນຂະນະນີ້ ຫຼາຍບໍລິສັດ, ຫ້າງຮ້ານຕ່າງໆຕ້ອງປິດຊົ່ວຄາວເພື່ອສະກັດກັ້ນການແຜ່ລະບາດ ບາງຜູ້ປະກອບການໃຫ້ພະນັກງານເຮັດວຽກຢູ່ເຮືອນແທນ, ມີຄົນຈຳນວນຫຼາຍເດືອດຮ້ອນ ບາງຄົນຕົກງານເພາະຖືກເລີກຈ້າງ, ບາງຄົນຖືກຫຼຸດເງິນເດືອນລົງເພາະຜູ້ປະກອບການບໍ່ມີລາຍຮັບໃນຊ່ວງໂຄວິດ-19 ຫຼື ບາງຄົນອາດບໍ່ໄດ້ຮັບເງິນເດືອນໃນຊ່ວງພັກວຽກ ຖ້າຕອນນີ້ທ່ານຕ້ອງການຫາອາຊີບເພື່ອສ້າງລາຍຮັບ ວັນນີ້ລາວໂພສຈະມາສະເໜີອາຊີບທີ່ສ້າງງານ ສ້າງລາຍຮັບໃຫ້ກັບທ່ານໄດ້ໃນຍາມວິກິດແບບນີ້:
- ຂາຍເຄື່ອງອອນລາຍ: ໃນໄລຍະນີ້ແມ່ນຫ້າມພົບປະຜູ້ຄົນເພາະຈະສ່ຽງຕໍ່ການແຜ່ເຊື້ອ ແລະ ຕິດເຊື້ອ. ດັ່ງນັ້ນ, ການຂາຍເຄື່ອງອອນລາຍເຊັ່ນ: ການຂາຍເຈລລ້າງມື, ຜ້າປິດປາກ-ດັງ, ອາຫານແຫ້ງ ຫຼື ສິ່ງຂອງຈຳເປັນ ແມ່ນຈະໄດ້ຂາຍດີໃນໄລຍະນີ້ ເພາະຄົນສ່ວນຫຼາຍແມ່ນບໍ່ກ້າອອກເຮືອນໄປຈັບຈ່າຍຊື້ເຄື່ອງຄືກັບເວລາປກກະຕິ.
- ຫຍິບຜ້າປິດປາກ-ດັງຂາຍ: ໃນໄລຍະໂຄວິດ-19 ໃຜທີ່ມີຄວາມຮູ້ເລື່ອງການຫຍິບຜ້າ ຫຼື ເຮັດອາຊີບຕັດເຄື່ອງຢູ່ແລ້ວໃນໄລຍະນີ້ອາດຈະບໍ່ໄດ້ຕັດເຄື່ອງນຸ່ງຮົ່ມ ການຕັດຫຍິບຜ້າປິດປາກ-ດັງຂາຍກໍ່ຖືເປັນທາງເລືອກທີ່ດີສຳລັບຕອນນີ້.
- ຮັບຈ້າງຂົນສົ່ງອາຫານ ແລະ ສິ່ງຂອງຕ່າງໆ: ມີຄົນຈຳນວນຫຼາຍທີ່ບໍ່ກ້າອອກເຮືອນ ເພາະຢ້ານຕິດໂຣກ ກໍ່ມັກຈະເລືອກໃຊ້ບໍລິການຂົນສົ່ງ ຫຼື Delivery ເພາະສະດວກສະບາຍ ທັນໃຈ ແລະ ປອດໄພຈາກການຕິດໄວຣັດ ນີ້ຈຶ່ງເປັນອາຊີບໜຶ່ງທີ່ໜ້າສົນໃຈໃນເວລານີ້.
- ຮັບສອນພິເສດທາງອອນລາຍ: ຄົນທີ່ມີຄວາມຮູ້ດ້ານພາສາຕ່າງປະເທດ ຫຼື ດ້ານອື່ນໆ ກໍ່ລອງເປີດການຮຽນ-ການສອນທາງອອນລາຍ ເນື່ອງຈາກໄລຍະນີ້ຄົນບໍ່ສາມາດໄປຮຽນໃນສະຖາບັນໄດ້ເນື່ອງຈາກປ້ອງກັນການລະບາດຂອງໄວຣັດ ສະນັ້ນ, ການຮຽນຜ່ານທາງອອນລາຍຈຶ່ງເປັນອີກທາງເລືອກໜຶ່ງສຳລັບຜູ້ທີ່ຕ້ອງການເພີ່ມຄວາມຮູ້.
- ຮັບເຮັດງານຟຣີແລນຊ໌ ເຊັ່ນ: ງານຕັດຕໍ່, ອອກແບບ, ງານຂຽນຄອນເທັນອອນລາຍ ຫຼື ງານຕ່າງໆ ທີ່ຕົນເອງຖະນັດ ເພາະການຮັບເນັດງານພວກນີ້ ນອກຈາກຈະບໍ່ປ່ອຍເວລາໃຫ້ຜ່ານໄປລ້າແລ້ວຍັງສ້າງລາຍຮັບຂອງທ່ານໄດ້ອີກດ້ວຍ.
- ຮັບງານຣີວິວສິນຄ້າ: ຫາກວ່າທ່ານເປັນຄົນໜຶ່ງທີ່ມີຄວາມກ້າ ແລະ ມີທັກສະການຂາຍ ແຕ່ບໍ່ມີທຶນ ອາຊີບຮັບຣີວິວສິນຄ້າເປັນອີກທາງເລືອກໜຶ່ງທີ່ໜ້າສົນໃຈ ເພາະນອກຈາກຈະຊ່ວຍຜູ້ປະກອບການສ້າງລາຍຮັບໄດ້ແລ້ວ ທ່ານເອງກໍ່ຈະມີງານເຮັດ ມີລາຍຮັບກັບການຣີວິວສິນຄ້າໃນແຕ່ລະຄັ້ງເຊັ່ນດຽວກັນ.
- ປູກຝັງ-ລ້ຽງສັດ: ສຳລັບຄົນທີ່ມີເນື້ອທີ່ດິນ ພໍເຮັດສວນ ຫຼື ລ້ຽງສັດ ມັນເຖິງເວລາແລ້ວທີ່ຕ້ອງນຳໃຊ້ເນື້ອທີ່ດິນເປົ່າວ່າງທີ່ທ່ານມີໃຫ້ເກີດປະໂຫຍດ ເນື່ອງຈາກວ່າອາຫານການກິນເປັນສິ່ງທີ່ຄົນເຮົາຕ້ອງການ ສຳລັບອາຊີບນີ້ແມ່ນເປັນອາຊີບທີ່ໝັ້ນຄົງບໍ່ວ່າຈະເປັນຊ່ວງໄລຍະເວລາໃດມັນກໍ່ສ້າງລາຍຮັບເຮັດໃຫ້ທ່ານມີຢູ່ມີກິນໄດ້ສະເໝີ.
ບົດໂດຍ: ພຸດສະດີ