ອີງຕາມແຈ້ງການຂອງ ແຂວງ ໄຊຍະບູລີ ເລກທີ 94/ຈຂ.ຊຍ ລົງວັນທີ 4 ເມສາ 2020 ກ່ຽວກັບ ໃຫ້ຢຸດການເດີນທາງເຂົ້າ-ອອກຂອງບຸກຄົນພາຍໃນແຂວງ ແລະ ພາຍໃນ 11 ເມືອງ ໃນທົ່ວແຂວງ ໄຊຍະບູລີ.
ປະຈຸບັນສະພາບການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃຫມ່ ໂຄວິດ-19 ໃນຫຼາຍປະເທດຍັງສືບຕໍ່ຂະຫຍາຍເປັນວົງກວ້າງ, ມີການລາຍງານກໍລະນີຕິດເຊື້ອ ແລະ ເສຍຊີວິດເພີ່ມຂື້ນໃນແຕ່ລະວັນ, ເພື່ອເປັນການປ້ອງກັນ ແລະ ສະກັດກັ້ນ ພ້ອມທັງເປັນການຫຼຸດຜ່ອນຄວາມສ່ຽງ ທີ່ອາດຈະເກີດການຕິດເຊື້ອ ແລະ ແຜ່ລະບາດຂອງເຊື້ອພະຍາດໂຄວິດ ຈຶ່ງໃຫ້ປິດການເຂົ້າ-ອອກຊົ່ວຄາວ ລະຫວ່າງ ແຂວງຕໍ່ແຂວງ, ເມືອງຕໍ່ເມືອງ ຍົກເວັ້ນລົດການນໍາຂອງແຂວງ-ຂອງເມືອງ ແລະ ລົດຄະນະສະເພາະກິດເພື່ອປ້ອງກັນ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃຫມ່ ໂຄວິດ-19 ແລະ ກໍລະນີທີ່ມີຄວາມຈໍາເປັນໃຫ້ມີການຢັ້ງຢືນຈາກພາກສ່ວນທີ່ກ່ຽວຂ້ອງ ແລະ ເລີ່ມຈັດຕັ້ງປະຕິບັດແຕ່ວັນທີ 5-19 ເມສາ 2020.
ສໍາລັບພາຫະນະຂົນສົ່ງສິນຄ້າ ແມ່ນໃຫ້ຈັດຕັ້ງປະຕິບັດຕາມບົດແນະນໍາ ທີ່ໄດ້ກໍານົດໄວ້ໃນຂໍ້ 6 ຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດ ໂຄວິດ-19 ສະບັບເລກທີ 02/ສະກ, ລົງວັນທີ 2 ເມສາ 2020.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: ແຂວງໄຊຍະບູລີ